Read Batak Angkola JESAYA 58 Bible Online

JESAYA 58 - Batak Angkola bible

JESAYA 58

¹Marsurak ma sagogomu, ulang ma tahan-tahan. Marsurak ma sagogomu songon sarune. Paboa ma tu bangsongKu taringot tu hasalaan ni halahi dohot tu pomparan ni si Jakob taringot tu dosa ni halahi!

²Dijalahi halahi do Au ganop ari, jana marpor ni roha giot mananda nasa dalanKu. Songon bangso na mangkarejohon na tutu dohot na so maninggalkon aturan ni Debatana disapai halahi do Au taringot tu aturan na tigor, jop do roha ni halahi mangadop tu Debata.

³Disapai bangso i do, “Aha gunana puaso hita anggo na so niida ni Debata! Aha gunana tapaserep rohanta, anggo na so diparrohahon Ia do?” Ninna TUHAN, “Satutuna muda hatiha puaso hamu, na marsijalahi untungna be do hamu jana mamoro sian angka halak na niupaanmunu.

⁴Puaso pe hamu hum anso patubu bada do dohot parsalisian jana mur gasa-gasaon hamu mambalbali. Diambang hamu do lakna puaso na songon i ma mambaen Au targorak laho manangihon angka tangiangmunu?

⁵Muda marpuaso hamu, diparkanciti hamu dirimunu; dipaunduk hamu ulumunu maradu puhung songon bulung ni duhut. Dipahembang hamu abit goni dohot abuan anso modom hamu di ginjangna i. Songon i ma didok hamu lakna na puaso? Diambang hamu jop ma lakna roha ni TUHAN mida pangalaho na songon i?

⁶Songon on do puaso na Huhagioti: Harkari hamu ma rante ni hajahatan dohot tali ni angka auga, jana palua hamu angka halak na niparkancitan ponggolkon hamu ma sude auga.

⁷Bagi hamu ma panganonmunu tu halak na malean jana jagit hamu ma masuk tu bagasmu angka halak na mompas-ompas. Muda diida hamu halak na marsaemara lehen hamu pakean tu halahi, jana ulang tulak hamu sisolkotmu na manghaporluhon pangurupionmu.

⁸Jadi marsinondang ma hatiuranmu songon mataniari bincar, jana angka gasamunu pe manigor malum ma. Hasintongan ma mardalan di jolomunu jana hasangapan ni TUHAN mangihut di pudimunu baen haluaanmunu.

⁹Muda martangiang hamu, patulusonKu ma i. Muda pio-pio hamu tu Au, alusanKu ma hamu. Antak hamu ma na mamparkanciti, na manudui halak dohot jari-jarimu dohot angka hata na jahat.

¹⁰Usehon ma rohamu tu halak na malean, jana pasombu ma roha ni halak na targogot. Muda dibaen hamu songon i gabe bincar ma sinondangmunu di bagasan hagolapan jana hagolapanmunu gabe songon torang ni ari.

¹¹Sai na toguon ni TUHAN do hamu jana angkon pasombuonNa rohamunu di tano na gariang. Sai parata-rataonNa do gogomunu anso tongtong horas torkis hamu. Gabe songon kobun ma hamu na tuk aekna, sanga mualna nada jungada mate.

¹²Kota na dung honok tarulang, bangunonmunu ma mangulahi di ginjang ni ojahan na lolot i. Tarbarita ma hamu songon sada bangso na mambangun mangulahi angka tembok dohot angka dalan na dung maronco anso hainganan mangulahi.”

¹³“Muda nada didege-dege hamu aturan ni Sabat jana nada dikarejohon hamu siurusonmunu di aringKu na badia i, muda didok hamu Ari Sabat i ari na marhasonangan, jana ari na badia ni TUHAN i ari na marmulia; muda dipasangap hamu ari i marhite na so mangkarejohon karejomunu dohot na so mambaen urusanmu sanga na marhata na rumar,

¹⁴jadi gabe marjop ni roha ma hamu hara ni TUHAN i. BaenonKu ma hamu marsangap di tano on sudena, jana sonang ma hamu mangolu baenonKu di tano na Hulehen tu ompumunu si Jakob. Au TUHAN, madung mandok songon i.”