Read Batak Angkola JESAYA 59 Bible Online

JESAYA 59 - Batak Angkola bible

JESAYA 59

¹Satutuna, nada na hurang ginjang tangan ni TUHAN laho paluahon, jana parbinegeanNia nada na hurang tajom mambege.

²Hara ni angka dosamunu i do umbaen na so ditangihon Ia hamu. Patunda ni angka hajahatanmunu i do umbaen na sirang hamu sian Debata di na so marsomba hamu tuSia.

³Harana tanganmu madung diramuni mudar, jana angka jarimu dohot hajahatan; pamanganmu mandokkon gabus, jana dilamu mandokkon na jahat.

⁴Nada adong na mangajuhon parkaro na maralasan na tutu, jana nada adong na manguhumi, dohot alasan na togu. Halak na mangasahon na so hasaya dohot gabus, halak na adong mara dohot manubuhon hajahatan.

⁵Mangkorhon hamatean do angka sangkapmunu na jahat i songon pira ni ulok na marbisa. Muda ditaporkon hamu pira ni ulok i, gabe ruar ma ulok sian i! Hape umpe bagi aha guna ni sangkapmunu i di hamu, tudos tu pakean na nibaen sian asar ni tamboung!

⁷Sai matua na mambaen sangkap na jahat do hamu jana mopop laho mandalankonsa. Nada jungada sak rohamunu mamunu halak na so marsala. Sanga na tu dia hamu kehe, matua na manderetkon hasesego ma hamu dohot hamamago.

⁸Nada daionmunu hasonangan ni roha. Sude do parbuatanmunu na so tigor. Marbulut-bulut do dalanmunu, jana nada sonang sanga ise halak na mangihutkon dalanmunu i.

⁹Ninna bangso i ma tu Debata: “Saonnari hami boto ma biasi inda dipalua Ho hami sian na pasiak-siak hami. Hami painte do hatiuron tapi hagolapon do na ro.

¹⁰Dadap-dadap do hami songon na mapitung, di torang ni ari pe tartuktuk hami, songon na di potang ni ari jana na juguk di na golap songon halak na mate.

¹¹Sude do hami mangorong songon gompul; sai morong-orong songon darapati. Hami painte-inte hatigoran, tapi nada adong, painte-intehon haluaan tapi sai mandao sian hami.

¹²Tutu, bahat do hasalaannami maradopkon Ho; angka dosanami pasalahon hami. Satutuna sadar do hami di hajahatannami, dohot di sude dosa-dosa nami.

¹³Madung mardosa hami jana mangalo maradopkon Ho, jana nada ra mangihutkon Ho. Madung hami parkanciti halak na asing jana marbalik hami sian Ho. Nada tutu be pikirannami, jana hatanami pe gabus noma.

¹⁴Uhum na tigor madung tarsosak tu pudi jana hatigoran hami padao. Hajujuran nada digoarkon di jolo ni halak na bahat, jana bulus ni roha pe ditulak halak.

¹⁵Marhite na songon i, hatigoran madung mago, jana sanga ise na mandao sian hajahatan, gabe panganon ni hajahatan.” Madung diida TUHAN sudena i, jana nada sonang rohaNia na so adong be jolma na mambaen haputusan na tigor.

¹⁶Longang Ia marnida na so adong be halak mangurupi na niparkancitan. Gabe pakeonNia noma kuasoNia sandiri laho paluahon halahi jana lehenonNia hamonangan di halahi.

¹⁷PakeonNia ma hatigoran songon baju bosi jana hamonangan songon kupia baja. Dipasada Ia rohaNia laho manyalosehon na masa i jana baloskononNia hajahatan na niae ni jolma.

¹⁸UhumanNia noma angka musuNia marguru tu pambaenan ni halahi, salang angka bangso na dao-dao pe nada malua sian uhumanNia.

¹⁹Sian Habincaran lalu tu Hasundutan mabiar be noma halak mida Ia hara ni godang ni kuasoNia. Ro ma Ia songon batang aek na doras sanga songon alogo na gogo.

²⁰Didok TUHAN ma tu bangsoNia, “Ro noma Au tu Sion laho mangondihon dohot paluahon hamu sude na paubahon roha sian angka dosamunu.

²¹BaenonKu ma parjanjian dohot hamu: LehenonKu kuaso dohot pangajaranKu tu hamu. Ingot jana patulus hamu ma angka pangajaranKi jana ajarkon hamu ma i tu angka dakdanakmunu dohot tu pomparanmunu, anso laing dohot halahi marningot dohot patuluskonsa.”