Read Batak Angkola JESAYA 6 Bible Online

JESAYA 6 - Batak Angkola bible

JESAYA 6

¹Di taon hamamate ni Raja Usia, huida ma Tuhan. Juguk do Ia di ginjang ni habangsaNia na gincat jana marmulia. Digohi ujung ni jubaNia i do Bagas Na Badia i.

²Jongjong do humaliang Ia angka Serafim na marjilam songon api, na marhabong onom be. Dua habongna i manutupi bohina, dua manutupi patna jana habongna na dua nari dipake laho habang.

³Marsipioan ma halahi: “Na badia, na badia, na badia ma da TUHAN Na Markuaso i. Digohi hamuliaonNia do portibi on.”

⁴Humutur ma ojahan ni pintu dibaen sora ni halahi i, jana bagas i pe gok ma dohot timus.

⁵Dung i hudok ma, “O ale, mate noma au, angke mardosa do au markite-hite sude hatangku, boti muse na maringanan di tonga-tonga ni bangso na songon i muse do au. Umporan dope, harana madung diida matangku sandiri Raja, TUHAN Na Markuaso i!”

⁶Dung i mijur ma sada sian Serafim i tu au maroban banggar na nigampitnia sian langgatan i.

⁷Didaiskon Ia ma banggar i tu bibirku jana didok Ia ma, “Madung dais tu banggar on bibirmu. Saonnari madung nisesa sude hasalaanmu dohot dosamu pe madung diampuni Tuhan.”

⁸Hubege muse ma Tuhan mandok hata, “Ise do sisuruonKu? Ise do na gabe sioban barita sian hita?” Jadi ningku ma, “Dison do au suru ma au!”

⁹Dung i disuru Ia ma au maroban tona sisongon on tu bangsoNia: “Torus do hamu sai manangihon, tapi nada mangastui. Sai torus do nian hamu mamparrohahon, hape nada diboto hamu sanga aha na masa.

¹⁰Pamajal ma pikiran ni angka jolma i, paingol pinggolna i jana papitung matana i, anso ulang marnida sanga marbinege sanga mangarti jana anso ulang ro tu Au jana malum.”

¹¹Marsapa ma au, “Sadia honok ma na songon on ale Tuhan?” AlusNia, “Lopus gabe tinggal sego-segona sajo angka kota jana mamolngit, lopus nada diingani be angka bagas, lopus rumar tano i jana nada tubuan sanga aha.

¹²Paoroton ni TUHAN ma angka jolma tu inganan na dao, gabe rumar ma tano i sudena.

¹³Salang sugari adong saparsampulu halak nari sian bangso na tading di luat i, i pe angkon dimatehon. Angkon songon hayu baringin na di taba halahi, hum tungkona noma tinggal. Sian tungko i ma muse ruar tunas, na badia.”