Read Batak Angkola JESAYA 61 Bible Online

JESAYA 61 - Batak Angkola bible

JESAYA 61

¹Dirajai Tondi Ni Tuhan DEBATA i ma au; dipili jana disuru Ia au, laho maroban jamita na denggan tu halak na pogos dohot na lebak, jana pamalumkon halak na magopu rohana; laho pabotohon tu halak tahanan paboa na tibu noma halahi dapotan haluaan, dohot tu angka jolma na di hurungan bahaso halahi na dung mardeka.

²Diutus do au laho mamaritahon paboa na tibu noma TUHAN ro paluahon. PaluaonNia ma bangsoNa, jana musu ni halahi taluhononNa. Madung disuru TUHAN muse au laho mangapoi na marsak roha.

³Mangalehen parhiasan ni ulu gonti ni abu, miak pesta gonti ni abit goni, ende puji-pujian gonti ni roha na gale, anso dohonon ni halak ma halahi “Hayu tarbantin hasintongan”. “Suan-suanan ni TUHAN laho pataridahon hagodanganNia.”

⁴Sego-sego ni kota na dung honok mamolngit pajongjongon ni halahi mangulahi.

⁵Ale bangsongKu, halak na asing noma marmahani pahan-pahananmu dohot mangkarejohon ladang maradu kobun anggurmu.

⁶Gonan ma hamu gabe naposo ni Debatanta jana digoaran angka malim ni TUHAN. Hamu noma nampuna arta ni angka bangso, jana pakeonmunu ma i manggodang diri.

⁷Nada be maila sanga dipabile hamu mangulahi; tanomunu i hamu sandiri noma mangingani. Hamoraonmunu marlompit ganda, jop ni rohamunu hot ma salolotna.

⁸Angke TUHAN do Au, “Huhaholongi do hatigoran jana magigi do Au mida na kejam dohot hajahatan. TumbasonKu bangso on marhite hadengganan, Hupudun janji na hot dohot halahi.

⁹Tarbarita angka pomparan ni halahi sun tu dia, tarbonggal di tonga-tonga ni sandok bangso. Jadi sude ma halak marhatutuhon, na Hupasupasu do bangso on.”

¹⁰“Jop ma rohangku hara ni TUHAN, hara ni Debata, tondingku marhamogaan. Songon pangoli di ari parbagasonna mamake pakean na sumurung jegesna, madung dipapakehon TUHAN tu au baju haluaan dohot hamonanganku.

¹¹Songon same na nisabur tubu ma i jana gabe suan-suanan, songon i ma Tuhan DEBATA paluahon bangsoNia jana sandok bangso ma giot mamuji Ia.”