Read Batak Angkola JESAYA 62 Bible Online

JESAYA 62 - Batak Angkola bible

JESAYA 62

¹Hara ni Sion au giot mandok hata, hara ni Jerusalem giot torus au marusaho lopus torang marsinondang hamonangannia, jana haluaannia songon obor di borngin ni ari.

²Diida angka bangso do hamonanganmu, ditatap angka raja hagodanganmu. Pioon ma ho marhite goar na imbaru, TUHAN i sandiri do na pasahat goarmu.

³Songon tuku na jeges sun do ho di TUHAN, tuku harajaan di tangan ni Debatamu.

⁴Goarmu nada be, ‘Na Nitadingkon’, tanomu nada be, ‘Na Lungun-lungunan’. Goaron ma ho, ‘Hasian Ni Debata’, jana tanomi goaran, ‘Na Dung Marbagas’. Dibaen sonang do roha ni TUHAN mida ho, songon halaklahimu do Ia tu ho.

⁵Songon sada doli-doli na mambuat boru na bujing, songon i ma na manompa ho giot marripehon ho. Songon pangoli na marjop ni roha tu na nibuatnia, songon i ma sonang ni roha ni Debata mida ho.

⁶Madung hubaen halak di tembok ni Jerusalem; nada jabat maradian jagoan ni halahi do ho arian na borngin. Angkon sunggulan ni halahi do Debata di janji na dung dibaenNia di Sion.

⁷Angkon torus do halahi mangido ulang padiar Ia maradian sampe dibangun Ia Jerusalem, jana anso gabe kota na godang di sandok portibi.

⁸Marhite sumpa TUHAN madung marjanji, hara ni kuasoNia pasti do manjadi: “Nada be panganon ni musumu sian gandummu, halak na asing nada be inumonna anggurmu.

⁹Tapi hamu na manyuan dohot na palagut suhana, panganonmunu ma suhana jana pujionmunu ma TUHAN. Hamu na palagutkon batu ni anggur, inumonmunu ma aekna di alaman ni BagasKu.”

¹⁰Ruar ma hamu sian horbangan, parade hamu ma dalan di halak na marmulahan. Baen ma dalan godang, paduru batuna, pajongjong ma mandera di angka bangso.

¹¹Lopus tu sandok ujung ni portibi on dilehen TUHAN tona on, “Dok ma tu boru Sion, ‘Ligi da, ro ma disadu TUHAN sipalua. Dohot Ia laing dohot muse do da angka halak na nipaluaNia.’ ”

¹²Goaron ma halahi: ‘Bangso Ni Debata’, ‘Bangso Na Nipalua ni TUHAN’. Goaron ma Jerusalem ‘Kota na nihalungunan’, ‘Kota na so nitadingkon ni TUHAN’.