Read Batak Angkola JESAYA 7 Bible Online

JESAYA 7 - Batak Angkola bible

JESAYA 7

¹Di hatiha ni Raja Ahas anak ni si Jotam, pahompu ni si Usia na mamarenta di Juda, masa ma porang. Satahi ma si Resin raja ni Siria dohot si Pekah anak ni si Remalya raja ni Israel. Diporangi halahi ma Jerusalem, tapi nada tartaluhonsa.

²Di na tarbege tu si Ahas raja ni Juda na masuk tentara ni Siria tu luat ni Israel, gabe sun ma biar ni rohania dohot bangsona, jabat humitir halahi songon bona ni hayu na niombus ni alogo.

³Didok TUHAN ma tu si Jesaya, “Oban ma anakmu si Sear Jasub[2] jana dapotkon ma Raja Ahas. Dapotonmu ma ia di ujung ni bondar dalan ni aek na tu sumur parginjang i.

⁴Dokkon ma tusia: Patogu ma rohamu jana pasonang, ulang ma mabiar sanga puntol rohamu, hara ni surpu ni api na dua i, i ma hamumuruk ni si Resin dohot Aram dohot anak ni si Remalya.

⁵Harana madung martahi si Aram, Efraim dohot anak ni si Remalya mambaen na jat tu hamu, na mandok:

⁶Beta ma hita mamorangi Juda jana mambiar-biari dohot mangarampasisa, dung i hita angkat ma anak ni si Tabeel gabe raja di tonga-tonga ni halahi.

⁷Dung i songon on ma hata ni Tuhan DEBATA: Nada masa na songon i, jana nada tarjadi,

⁸harana Damsik i ma kota sabungan ni Aram, jana Resin i ma raja ni Damsik. Di bagasan onom pulu lima taon on, mabola ma Efraim jana nada gabe bangso be.

⁹Samaria i ma kota sabungan ni Efraim, anak ni si Remalya ma rajana. Muda nada porsaya hamu, bagi na bia pe nada martahan hamu.”

¹⁰Dipabolkas TUHAN tona na asing tu si Ahas:

¹¹“Pangido ma anso dilehen TUHAN Debatamu di ho sada tanda, sanga pe i sian inganan ni halak na mate sian toru, sanga pe na sian banua ginjang.”

¹²Dialusi si Ahas ma, “Nada ra au mangido tanda. Nada ra au manguji TUHAN.”

¹³Dung i didok si Jesaya ma, “Antong anggo songon i, tangihon ma ale pomparan ni Raja Daud! Na so tuk dope he hum jolma lojaanmu, umbaen jabat lojaanmu dope Debatangku?

¹⁴Hara ni i Tuhan sandiri ma mangalehen sada tanda di hamu: Sasintongna, sada halak anakboru angkon mardenggan pamatang jana manubuhon sada anak, jana goaronnia ma Anak i “Immanuel”.[3]

¹⁵Angkon panganonnia do susu dohot aer ni loba, lopus diboto ia manulak na jat dohot mamili na denggan.

¹⁶Harana painte so diboto anak i manulak na jat bope mamili na denggan anggo luat ni raja na dua na nihabiaranmi, gabe tarulang noma i.

¹⁷Paroon ni TUHAN ma raja ni Asur, jadi daionmu ma angka ari na gok hasusaan, ho dohot rayatmu, umjorbut sian na dung jungada dibolus hamu mamungka sian dung mabola harajaan Israel dohot Juda.

¹⁸Di ari i piohonon ni TUHAN ma halak Mesir dohot halak Asur, jadi ro ma bangso na dua i songon parharkar ni lanok dohot loba mangarongomi angka rura na margaba-gobi dohot rigang-rigang ni batu; tutupan ni halahi ma sandok potpot na marduri dohot inganan na marduhut.

²⁰Pakeon ni TUHAN ma raja ni Asur manaluhon, pabilehon dohot mangaroncohon Israel. Baenon ni raja Asur ma Israel songon pambaen ni sada tukang cukur na mangabisi sude obuk dohot imbulu na di pamatang.

²¹Anggo di ari i, hum sada lombu dohot dua hambeng sajo ma na tolap partani marmahanisa.

²²Susu ni pahan-pahanan i pe madung lobi sian na tuk laho manggohi haporluan ni partani i tu haporluanna hara ni hurangna bahat ni jolma na mangingani luat i. Tutu do, sanga na piga-piga halak nari na tading di luat i mangan susu ma dohot aer ni loba.

²³Angka kobun anggur na denggan, na nisuanan dohot sasaribu be bona ni anggur na mararga saribu hoping perak, hatubuan ni ramba-ramba ma i dohot sihupi.

²⁴Nada puluk halak be tusi anggo inda maroban sior dohot pana, sap noma sude luat i ramba-ramba dohot sihupi.

²⁵Jana sude partoran na somal dikarejohon dohot disuani, gok ma i dohot sihupi jana hum panjampalan ni lombu dohot biri-biri noma guna ni i. Sada halak pe nada adong be na ra tusi.”