Read Batak Angkola JESAYA 8 Bible Online

JESAYA 8 - Batak Angkola bible

JESAYA 8

¹Didok TUHAN ma tu au, “Buat ma sada batu tulis na godang, jana suratkon ma dohot hurup na tangkas: ‘Maher-Salal dohot Has-Bas.’[4]

²Hupio ma dua halak saksi haposan, i ma Malim Uria dohot si Zakaria anak ni si Jeberekia.”

³Dung adong sadia honok denggan ma pamatang ni dadaborungku. Di na sorang anaknami, didok TUHAN ma tu au, “Baen ma goarna ‘Maher-Salal dohot Has-Bas.’

⁴Harana painte so tuk umur ni dakdanak i laho mandok ‘Amang’ dohot ‘Inang’, sasude sinadongan ni Damaskus dohot sude barang na nirampas ni Samaria, haldungon ni raja Asur ma i.”

⁵Didok TUHAN ma mangulahi tu au,

⁶ning Ia ma, “Ditulak bangso on do aek na sonang na sian anak ni Batang aek Siloa,[5] jana mar jop ni roha mida Raja Resin dohot anak ni si Remalya.

⁷Jadi hara ni i, Au, Tuhan, paroonKu ma raja ni Asur dohot sude tentarana i laho mamorangi Juda. Nada haambatan be i songon pangalantap ni Batang aek Efrat na mambaen bonom angka tobing-tobingna i.

⁸Masuhan ni halahi ma Juda songon aek magodang na mangalantap jabat liput abara jana mambaen bonom sasudena; jana habongna na mangirbang i ma manutupi sude luatmu; ale Immanuel!”

⁹Marlagut ma hamu mardongan biar, hamu ale angka bangso! Tangihon ma ale ujung ni portibi on. Marbobat jana mabiar ma, marbobat jana mabiar ma!

¹⁰Baen ma sangkap, tapi nada marguna sudena i. Roha-rohamu ma mandokkon hata! Nada adong guna ni i sudena, angke Debata do na mandongani hami.

¹¹Marhite kuasoNia na godang i dilehen Ia ma sipaingot tu au anso ulang hutiru pangalaho ni bangso i.

¹²Ning Ia ma, “Ulang ho dohot marpokat dohot bangso i, jana ulang ho mabiar mida na nihabiaran ni halahi i.

¹³Ingot ma, anggo Au TUHAN Na Markuaso, na badia do. Hum Au sajo do angkon sihabiaranmu.

¹⁴Dibaen na sun badia do Au, gabe batu partuktuhan ma Au di rayat ni Juda, Israel dohot Jerusalem. Songon tirangkap do Au na giot manangkup halahi.

¹⁵Bahat do halak na giot tartuktuk dohot na mabugang. Julung tu bagasan tirangkap noma halahi.”

¹⁶Hamu angka siseanku, angkon jagoonmunu jana momosanmunu do angka tona na nilehen ni Debata tu au.

¹⁷Madung ditabunihon TUHAN diriNa maradopkon bangsoNia, tapi anggo au porsaya jana mararop roha do tuSia.

¹⁸On ma da au rap dohot angka dakdanak na nipasahat ni TUHAN tu au. TUHAN Na Markuaso i na mamarenta di Dolok Sion, Ia do na marsuru hami gabe angka saksi na mangolu tu halak Israel.

¹⁹Tapi muda di dokkon halak tu hamu: “Pangido ma piruang tu angka tondi dohot tu angka datu na marhusipi jana mubit-ubit,” alusi ma: “Nada he patut sada bangso mangido piruang tu debatana? Sanga na angkon do mangido piruang tu jolma na dung mate domu tu haporluan ni jolma na mangolu?”

²⁰Songon on ma dok alusna, “Tangihon ma ajaran ni TUHAN! Ulang patangi-tangi datu. Nada adong guna ni na nidok ni halahi di ho.”

²¹Malat-alat ma angka halak na malang bagian dohot halak na haleon di luat i. Sun malena dohot murukna, jabat diburai halahi raja dohot Debata ni halahi. Sanga na tu dia pe manatap halahi, tu langit

²²sanga tu tano, umpe bagi aha idaon ni halahi asing sian hasusaan dohot hagolapan maradu haholomon na mandondoni, jana tu inganan na songon i ma halahi ditogu.