Read Batak Angkola JESAYA 9 Bible Online

JESAYA 9 - Batak Angkola bible

JESAYA 9

¹Tapi nada jabat sadia honok nari, malua ma halahi sian hasusaan i. Angka luat na niinganan ni Marga Zebulon dohot Naftali jungada do dietong i na bile. Tapi anggo tu hatiha na giot ro, sude luat i sian sabola Habincaran ni Laut Tonga lopus taripar ni Batang aek Jordan, lopus tu Galilea tehe na niinganan ni halak na asing, gabe mandapot sangap ma.

²Bangso na mangolu di bagasan hagolapan, madung marnida sinondang na godang. Na maringanan di bagasan halinu ni hamatean madung disondangi hatiuran ni sinondang.

³Tuhan, dilehen Ho do jop ni roha godang, padumpangkon halahi tu na torang. Hara ni denggan ni rohaMu marmoga-moga halahi, songon halak na marjop ni roha di na palagutkon suha ni karejona sanga di na marbagi taban.

⁴Madung diropuhi Ho tinggala sian takkuhukna dohot lanja-lanja sian abarana, madung ditaluhon Ho bangso na mambaen susa bangsoMu, songon panaluhonMu di halak Midian na jolo.

⁵Sipatu ni tentara na mangolat dohot bajuna na margulu mudar, gabe bagian ni api lopus puntung sasudena.

⁶Madung sorang di hita sada dakdanak; dibasa-basahon di hita sada anak. Ia ma na gabe pamimpinta. Digoari do Ia: “Panuturi Na Marroha”, “Debata Parkuaso”, “Ama Salolot ni lolotna”, “Raja Ni Hadameon”.

⁷Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni TUHAN Na Markuaso i.

⁸Madung dipaboa TUHAN uhum tu Israel angka pinompar ni si Jakob.

⁹Padiar ma sude bangso i umbotosa, i ma Efraim dohot rayat Samaria na marhite gakgak dohot ginjang ni rohana mandok,

¹⁰“Madung mangkarumpak angka bagas na sian batu bata, tapi baenonnami ma angka bagas na imbaru sian batu. Ma pola nitabaan angka balok sian hayu ara; gontionnami ma i dohot hayu sampinur Libanon na dumenggan i.”

¹¹Madung dipatubu TUHAN tu roha ni musu laho mangalo halahi.

¹²Rampason ni bangso Siria na sian Habincaran dohot bangso Pilistin di Hasundutan ma Israel. Tapi laing muruk dope anggo TUHAN jana sai giot manguhumi.

¹³Laing na so manyosal dope bangso Israel haru pe na dung hona uhum ni TUHAN Na Markuaso i; laing na so tunduk dope halahi tu angka parentaNia.

¹⁴Hara ni i, di bagasan sadari sajo, hona uhum ni TUHAN ma angka pamimpin ni Israel dohot rayatNa i. Ponggolan jana ambungkononNia ma uluna dohot ihurna.

¹⁵Uluna, i ma bagian hatobangon dohot halak na marsangap; ihurna, i ma angka panurirang na mangalehen angka pangajaran na mangaliluhon!

¹⁶Madung dipalilu jana digaor angka pamimpin ni bangso i rayat i.

¹⁷Madung marbalik bangso i jana marpangalaho na hodar, jana hata ni halahi sude jahat do. Jadi hara ni i, sian tonga-tonga ni angka doli-doli umpe sahalak na giot malua baenon ni TUHAN. Inda ra Ia maribo ni roha mida angka na mabalu dohot na so marama so marina. Tapi laing torus dope TUHAN muruk jana sai giot manguhumi.

¹⁸Songon api na gara mangankon ramba dohot potpot na marduri songon i do hajahatan ni bangso i. Songon parmosok ni harangan do pargarana i martimbual timusna i.

¹⁹Muruk situtu TUHAN Na Markuaso i jana panguhumNa pe songon api na marsigorgor jana bangso i ma songon purunan siabiskononna. Umpe adong sahalak na maribo ni roha mida kahanggina.

²⁰Di sude luat i marsirampas ma halak jana dipangan be ma sanga aha sipanganon na dapot, hape nada marnabutong. Salang dakdanak ni halahi sandiri pe dipangan halahi!

²¹Marsiporangan ma halak Manase dohot halak Efraim, jana rap mamorangi ma i tu Juda. Tapi laing muruk dope TUHAN jana sai giot manguhumi.