Read Batak Angkola HAMALIMON 12 Bible Online

HAMALIMON 12 - Batak Angkola bible

HAMALIMON 12

¹Dilehen TUHAN ma angka aturan tu si Musa songon on,

²adop bangso Israel. Muda tubuan dakdanak sada ina, muda halaklahi na sorang i, hodar ma ina i pitu ari honokna dos dohot hatiha marorot pamatangnia.

³Di ari pasalapankon angkon sunaton ma dakdanak i.

⁴Dung sorang dakdanak i, lolot ni tolu pulu tolu ari, hodar do etongon ina i angke hahurangan mudar. Dung i pe anso taretong ias. Taran so sidung aturan haiason i, nada tola dais ina i tu angka barang sipakeon di bagasan parugamoan jana nada tola masuk tu Inganan Na Badia i.

⁵Muda manubuhon dakdanak sada ina, dakdanak na sorang i dadaboru, gabe hodar ma ina i opat bolas ari honokna dos dohot hatiha marorot pamatangnia. Lolot ni onom pulu onom ari hodar do ina i, angke hahurangan mudar ia. Dung i pe anso nietong ia ias.

⁶Dung salpu hatiha upacara pangiasonna bope hara ni na manubuhon anak halaklahi sanga dadaboru, angkon obanon ni ina i ma silehen-lehen sipasahaton tu malim di pintu ni Bandar Parmianan Ni TUHAN. Silehen-lehen i, i ma sada anak ni biri-biri na marumur sataon sanga haul situtungon dohot sada darapati sanga hatutu gabe haul hasesaan ni dosa.

⁷Angkon pasahaton ni malim i ma tu TUHAN jana patuluskon sada hatiha laho manyesa haramunan ni ina i, anso ias ia di bagasan ugamo. I ma angkon karejohonon ni ina na baru manubuhon dakdanak.

⁸Muda so tarpatupa ina i mangalehen anak ni biri-biri angkon obanonnia ma dua darapati sanga dua hatutu. Sada ma i gabe haul situtungon, na asing i gabe haul hasesaan ni dosa. Baenon ni malim i ma sada hatiha laho manyesa hahodaran ni ina i, anso gabe ias.