Read Batak Angkola HAMALIMON 16 Bible Online

HAMALIMON 16 - Batak Angkola bible

HAMALIMON 16

¹Dung mate anak ni si Harun na dua i, di hatiha na nipasahat ni halahi tu TUHAN api na so nihagiotanNia, didok TUHAN ma tu si Musa.

²Ning Ia ma, “Pabolkas ma tu angkangmu si Harun, anso hum di hatiha na dung ditontuhon do tola masuk ia tu Bilik Na Sun Badia di pudi ni hire-hire i, angke disi do giot patidahononKu diringKu di bagasan ombun di ginjang ni Poti Parjanjian i. Muda dilaosi si Harun do parenta i, hona bunu ma ia.

³Dung dipasahat ia lombu jantan na poso na gabe haul hasesaan ni dosa, dohot sada biri-biri jantan gabe haul situtungon, disi pe anso tola ia masuk tu Bilik Na Sun Badia i.”

⁴Dung i dilehen TUHAN muse dope angka paraturan. Taran so masuk si Harun tu Bilik Na Sun Badia i, angkon maridi ia jolo, dung i dipake ia pakean ni malim, i ma baju dohot saraor pendek sian abit linen, bobat dohot saroben.

⁵Dung i pasahaton ni bangso Israel ma tu si Harun dua hambeng jantan gabe haul hasesaan ni dosa, dohot sada biri-biri jantan gabe haul situtungon.

⁶Angkon pasahaton ni si Harun sada lombu jantan gabe hasesaan ni dosania dohot sude halahi sabagas.

⁷Hambeng jantan na dua i na sian bangso Israel i angkon obanon ni si Harun ma i tu pintu ni Bandar Parmianan Ni TUHAN.

⁸Marundi ma ia disi mamake dua batu, na sada ditandai “di TUHAN”, na asing “tu Asasel”.[1]

⁹Hambeng na tarpili tu TUHAN i, angkon dipasahat gabe haul hasesaan ni dosa.

¹⁰Hambeng na tarpili tu si Asasel angkon nipasahat mangolu tu TUHAN i, anso dipakehe tu si Asasel di parhorsihan anso disesa dosa ni bangso Israel.

¹¹Hatiha dipasahat si Harun lombu jantan i gabe haul hasesaan ni dosania sandiri dohot keluargana,

¹²angkon buatonnia sian langgatan inganan ni api dohot banggar ni api, dohot duanggolom hamonyan na halus, lalu dioban ia tu Bilik Na Sun Badia.

¹³Di jolo ni TUHAN angkon baenonnia hamonyan i tu bagasan api. Digohi timus i ma tutup ni Poti Parjanjian i, anso ulang tarpaida si Harun — angke, muda diida ia i, mate noma ia.

¹⁴Dung i angkon buaton ni si Harun ma saotik sian mudar ni lombu i, lalu dipispiskon ia dohot jari-jarinia tu sabola sian jolo ni tutup ni Poti i dung i dipispiskon ia muse pitu noli tu jolo ni Poti i.

¹⁵Dung songon i, sambolon ni si Harun ma hambeng na gabe haul hasesaan ni dosa ni rayat i. Mudar ni hambeng i angkon obanon tu Bilik Na Sun Badia, lalu dipispiskon tu ginjang ni Poti Parjanjian i dohot tu jolo ni Poti i, songon na dung dibaen dos dohot mudar ni lombu jantan i.

¹⁶Songon i ma pangalahona laho paiaskon Bilik Na Sun Badia sian haramunon ni bangso Israel dohot sian sude dosa ni halahi. Bandar Parmianan i angkon badia baenon, angke ingananna di tonga-tonga ni halahi i do, jana hona tu haramunon ni halahi.

¹⁷Mamungka sian dung masuk si Harun tu Bilik Na Sun Badia i mangkarejohon pangalaho habadiaan lopus tu na haruar ia, sahalak pe inda tola masuk tu Bandar Parmianan, dung salose patulus upacara taringot tu dirina sandiri, tu halahi sabagas dohot tu sude halak na bahat i,

¹⁸haruar ma si Harun kehe tu langgatan ni haul situtungon laho pabadiahon langgatan i. Angkon buatonnia saotik sian mudar ni lombu dohot hambeng i, anso diusehon tu ginjang ni angka tanduk na di suhi-suhi ni langgatan i.

¹⁹Dohot jari-jarinia dipispiskon ia saotik sian mudar i pitu noli tu ginjang langgatan i. Songon i ma angkon baenonnia paiaskon langgatan i sian angka dosa ni bangso Israel, anso gabe badia langgatan i.

²⁰“Dung salose si Harun patulus karejo habadiaan ni Bilik Na Sun Badia dohot angka bagian na asing sian Bandar Parmianan Ni TUHAN bope langgatan, angkon pasahatonnia ma tu TUHAN hambeng na mangolu na dung dipili tu si Asasel.

²¹Diampehon ia ma tangannia dua-dua tu ginjang ni ulu ni hambeng i lalu mangoku sude hasalaan, dosa, bope pangalaosion ni bangso Israel. Marhite na songon i, sude hajahatan ni bangso Israel dipayakkon tu ginjang ni ulu ni hambeng i. Dung i adong do sada halak na dung nitontuhon hian mangayak hambeng i tu parhorsihan.

²²Obanon ni hambeng i ma dosa ni bangso Israel tu sada luat na gariang na so diingani jolma.

²³Dung salpu songon i masuk ma si Harun tu bagasan Bandar Parmianan mambuka pakean malim na nipakenia taran so masuk tu Bilik Na Sun Badia i anso ditinggalkon ia pakean i disi.

²⁴Dung i angkon maridi ia di sada inganan na badia mamake pakeannia sandiri. Dung i haruar ma ia lalu pasahatkon haul situtungon na gabe hasesaan ni dosania sandiri dohot angka dosa ni bangso Israel.

²⁵Tabo-tabo ni pahan-pahanan na gabe haul hasesaan ni dosa i angkon tutungonnia di langgatan i.

²⁶Halak na mangayak hambeng i tu si Asasel di halongonan angkon basuonnia pakeannia jana maridi taran so mulak ia tu parbandaran i.

²⁷Lombu jantan dohot hambeng na gabe haul hasesaan ni dosa i, na dung dioban mudarna tu Bilik Na Sun Badia gabe hasesaan ni dosa, angkon obanon tu balian ni parbandaran lalu ditutung. Bobakna, juhutna dohot pangisi ni butuha ni pahan-pahanan na dua i angkon sude tutungon.

²⁸Halak na manutung i, angkon mamasu pakeanna lalu maridi taran so mulak ia tu parbandaran.”

²⁹“Angka aturan on pe angkon patuluson tu zaman na giot ro sapanjangna. Di ari sampulu bulan pitu, sude halak Israel dohot angka halak na leban na rap dohot halahi, angkon marpuaso do jana nada tola mangkarejohon sanga aha pe, angke ari na sun badia do ari i. Di ari i angkon baenon do pesta paiaskon bangso Israel sian sude dosa ni halahi, anso ias halahi mangihutkon aturan ni ugamo.

³²Malim Godang na dung nitontuhon jana na nipili ni Debata laho manggonti amana angkon patuluskon karejo haiason i. Angkon pakeonnia pakean ni malim,

³³lalu mandalankon upacara laho paiaskon Bilik Na Sun Badia dohot bagian na asing na masuk tu Bandar Parmianan Ni TUHAN, dohot langgatan bope angka malim dohot sude rayat di Israel.

³⁴Pesta on angkon baenon sanoli sataon laho paiaskon Israel sian dosa ni halahi. Songon i ma angka aturan na nigoaran i angkon patuluson ro di salolot-lolotna.” Si Musa pe dikarejohon ia ma songon na dung diparentahon ni TUHAN i.