Read Batak Angkola HAMALIMON 17 Bible Online

HAMALIMON 17 - Batak Angkola bible

HAMALIMON 17

¹Disuru TUHAN ma si Musa

²mangalehen angka aturan muse tu si Harun, tu angka anakna dohot tu sude bangso Israel.

³“Muda adong sahalak sian Israel pasahatkon sada lombu tu TUHAN, biri-biri sanga hambeng pe, angkon sambolonnia pahan-pahanan i di pintu ni Bandar Parmianan Ni TUHAN. Muda di inganan na asing do disambol ia, madung mangalaosi Uhum do i, angke madung manyaburkon mudar ia. Jadi, angkon agohonon ma ia sian tonga-tonga ni bangsona.

⁵Na nipangido ni parenta on, i ma mamungka saonnari anso sude halak Israel angkon maroban tu Bandar Parmianan Ni TUHAN, i ma angka pahan-pahanan na dung somal disambol di ladang. Saonnari angkon obanon ni halahi noma i jana pasahatonna tu malim di pintu ni Bandar Na Badia jana disi ma disambol na gabe haul haluaan.

⁶Angkon siramkonon ni malim do mudar ni pahan-pahanan i tu topi-topi ni langgatan di pintu ni Bandar Parmianan, lalu manutung tabo-tabona, anso jop roha ni TUHAN hara ni uapna i.

⁷Bangso Israel sude angkon tongtong unduk tu TUHAN jana nada tola manyambol angka pahan-pahanan di ladang i songon na giot pasahaton tu jihin na jahat na manyarupai hambeng. Angkon ihutkonon do paraturan on tongtong lalu tu pudian ni ari salolot-lolotna.

⁸Muda adong sahalak sian Israel sanga halak na leban na dung honok rap dohot halak Israel, pasahatkon haul situtungon, bope haul na asing

⁹tu TUHAN, angkon di pintu ni Bandar Parmianan do pasahatonnia. Muda di inganan na asing dipasahat ia, nada etongon be ia halak ni Debata.

¹⁰Muda adong sahalak Israel sanga sahalak na leban na dung honok rap dohot halak Israel, mangankon juhut na marmudar dope, gabe aloon ni TUHAN ma halahi, jana nada etongon be ia sada sian halakNia.

¹¹Hosa ni ganop na mangolu, di bagasan mudarna do. Hara ni i ma dibaen diparentahon TUHAN anso sude mudar diduruskon di ginjang ni langgatan anso sesa sude dosa. Sarupa dohot hosa do mudar i manyesa dosa.

¹²Hara ni i muse ma sude halak Israel dohot halak na leban na rap dohot halahi, diantahi mangankon juhut na laing marmudar dope.

¹³Muda adong sahalak sian Israel sanga sahalak sian halak na leban na dung lolot rap dohot halak Israel, manangkup binatang sanga unggas na so haram marhite na marburu, angkon padiaronnia mabaor mudarna i tu tano jana ditutup ia dohot tano.

¹⁴Ngolu ni ganop na mangolu, di bagasan mudarna do. Hara ni i ma dibaen diantahi TUHAN halak Israel mangankon juhut na laing marmudar dope. Ganop halak na mangkarejohon karejo na nirarang, nada nietong be i halak ni Debata.

¹⁵Ganop halak Israel sanga halak na leban na mangankon juhut ni pahan-pahanan na mate haram, sanga na nisoro ni binatang panyoro, angkon dibasu ia pakeannia lalu maridi jana painte andospotang pe anso ias ia mangihutkon ugamo.

¹⁶Muda so dibaen ia songon i, angkon taononnia sandiri panginonaanna.”