Read Batak Angkola HAMALIMON 18 Bible Online

HAMALIMON 18 - Batak Angkola bible

HAMALIMON 18

¹Disuru TUHAN ma si Musa,

²pabolkaskon angka aturan on tu halak Israel, “Au do TUHAN Debatamu.

³Ulang tiru pangalaho ni halak Mesir na dung jungada diingani hamu luat ni halahi, sanga pe maniru halak Kanaan, na giot masuhanmunu luat ni halahi mardongan partolonganKu.

⁴Radoti ma angka uhum na sian Au jana karejohon ma na Huparentahon. Au do TUHAN Debatamu.

⁵Karejohon ma angka aturan bope angka uhum na dung Hulehen di ho. Muda dibaen hamu songon i, malua ma ho. Au do TUHAN.”

⁶Dilehen TUHAN dope angka aturan. Sanga ise pe nada tola marcampur dohot sada halak sian sisolkotna.

⁷Ulang marcampur ho dohot inangmu anso ulang gabe martilako natorasmu halaklahi dohot natorasmu dadaboru.

⁸Ulang palayas amangmu marhite na marcampur dohot sada halak sian angka dadaborunia na asing.

⁹Nada tola marcampur dohot ibotomu sanga pe ibotomu na asing ina, haru pe na nipagodang sabagas dohot ho sanga nada.

¹⁰Ulang ho marcampur dohot pahompumu, harana parohon tilako do i di ho sandiri.

¹¹Ulang ho marcampur dohot ibotomu donganmu saama sanga saina, angke ibotomu do ia.

¹²Ulang ho marcampur dohot bujingmu sanga pe iboto ni amangmu sanga anggi ni inangmu.

¹⁴Ulang ho marcampur dohot dadaboru ni udamu, sanga inangtuamu, angke inangmu do i.

¹⁵Nada tola marcampur dohot parumaenmu,

¹⁶sanga dohot dadaboru ni angkangmu.

¹⁷Ulang marcampur dohot boru sanga pahompu dadaboru ni sada dadaboru na jungada dicampuri ho. Angke tontu adong do parmudaron ni halahi tu ho, angke pangalaho na mangalaosi adat do i.

¹⁸Ulang baen gabe dadaborumu anggi ni dadaborumu, anggo laing mangolu dope dadaborumi.

¹⁹Nada tola marcampur dohot sada dadaboru salolot ro bulanna, angke hatiha na ramun do ia.

²⁰Ulang marcampur dohot dadaboru ni halak na asing, pangalaho na songon i mambaen ramun ho.

²¹Ulang lehen sada pe sian anakmu gabe dihaulkon tu Debata Molok, angke pangalaho na songon i na palayas goar ni TUHAN do i.

²²Nada tola pardadaboruon ni halaklahi donganna halaklahi, hagigian ni Debata do pangalaho na songon i.

²³Sude hamu, halaklahi sanga dadaboru nada tola marcampur tu angka pahan-pahanan, pangalaho na jahat songon i mambaen ho ramun.

²⁴Ulang pahodar dirimu hara ni angka pangalaho na songon i, angke songon i do halak parbegu mambaen ramun dirina, i ma halak na maringanan di Kanaan taran so hamu. Hara ni i ma dibaen dipakehe TUHAN halahi, anso taringani hamu luat i.

²⁵Dibaen madung dikarejohon halahi sude angka karejo hagigian i, gabe ramun ma tano i. Gabe diuhum TUHAN ma halahi, nada diloas be halahi maringanan disi. Tapi anggo hamu, ulang ma karejohon hamu angka karejo na songon i. Sude hamu halak Israel dohot halak na leban na tinggal rap dohot hamu, angkon karejohononmunu do sude aturan ni TUHAN,

²⁸anso ulang diuhum TUHAN i hamu jana ulang dipakehe songon halak parbegu na mangingani luat i taran so masuk hamu.

²⁹Boto hamu ma, sanga ise na mangkarejohon karejo sihagigian i, angkon agohonon ma ia sian tonga-tonga ni bangsona.

³⁰Dung i didok TUHAN i ma, “Ihutkon ma sude angka parenta na dung Hulehen i, ulang tiru hamu pangalaho ni halak na mangingani Kanaan andorang so diingani hamu. Ulang dibaen ramun diriniba sandiri marhite karejo na songon i. Au do TUHAN Debatamu.”