Read Batak Angkola HAMALIMON 19 Bible Online

HAMALIMON 19 - Batak Angkola bible

HAMALIMON 19

¹Disuru TUHAN i ma si Musa,

²pabolkaskon tu bangso Israel, parenta na songon on, “Angkon badia do hamu, harana Au, TUHAN Debatamunu na badia do.

³Ganop halak angkon pasangap inana dohot amana jana marningot Ari Sabat, songon na dung Huparentahon, angke Au do TUHAN Debatamu.

⁴Ulang marbalik hamu sian Au, gabe kehe hamu manyomba gana-ganaan. Ulang baen hamu angka gana-ganaan sian angka logam jana manyomba tusi. Au do TUHAN Debatamu.

⁵Muda manyambol pahan-pahanan hamu sipasahatonmunu gabe haul haluaan, angkon ihutkononmunu do angka paraturan na dung Hulehen i, gabe jagitonKu ma haulmunu i.

⁶Juhut ni pahan-pahanan i angkon panganon di ari i, disi nisambol pahan-pahanan i, sanga ancogotna i. Juhut na lobi di ari patoluhon angkon nitutung sude

⁷angke na haram do juhut i. Muda laing dipangan do nada jagitonKu be haul i.

⁸Sanga ise mangankon juhut i, madung sala ia angke barang na dung mardohonan tu Au gabe songon barang hasomalan dibaensa. Nada etongon be halak na songon i halakKu.

⁹Muda manyabi hamu ulang sabi hamu angka gandum na tubu di topi-topi ni ladang i, jana ulang ulahi hamu manyabi turiangna.

¹⁰Ulang ulahi hamu tu kobun anggurmu papungu batuna na tinggal i sanga palagut batuna na mardabuan. Tinggalkon ma i di halak na pogos bope di halak na leban. Au do TUHAN Debatamu.

¹¹Ulang ho manangko, mangicu sanga margabus.

¹²Ulang janjihon sanga aha pe marhite goarKu, muda so giot patulusonmu janjimi. Au do TUHAN Debatamu.

¹³Ulang paksa sanga rampas barang ni donganmu. Ulang simpan gaji ni halak na ni gajianmu, haru pe hum saborngin.

¹⁴Ulang burai na maingol, jana ulang baen sanga aha tu jolo ni halak na mapitung anso tartuktuk ia. Habiari ma Au, Au do TUHAN Debatamu.

¹⁵Angkon tigor jana bonar do ho mandabu uhum di parkaro, ulang ampini na miskin di na so dalanna jana ulang mabiar ho mida halak na mora.

¹⁶Ulang sai dokkon barita-barita gabus sanga tu ise pe. Muda marguru di parkaro ni sada-sada halak noma ngoluna sanga hamamatena hatiha ditimbang parkarona i, mangkuling ma ho muda tarbaen hasaksianmi mangurupisa. Au do TUHAN.

¹⁷Ulang ho marhosom sanga tu ise pe. Pasidung ma salisimu dohot halak i anso ulang mardosa ho hara ni ia.

¹⁸Ulang baloskon na jat sanga tu ise pe sanga magigi ho tusia, tapi haholongi ma donganmu songon pangkaholongimu di dirimu sandiri. Au do TUHAN.

¹⁹Oloi ma angka parentangKu. Dua rupa pahan-pahanan, ulang dipacampur na sarupa tu na sarupa nari. Ulang suan dua ragam same di sada ladang. Ulang pake ulos na nitonun sian dua rupa bonang.

²⁰Umpamana sada halaklahi madung marjanji giot manggadis dadaboru hatobannia tu sada halaklahi na asing gabe tunangannia. Taran so digarar halak na manobusi hatoban i, hape marcampur nampuna hatoban i dohot hatobanna i, gabe uhumon ma na dua i, tapi ulang jabat mate, angke sanga na bia pe laing hatobannia do i.

²¹Angkon obanon ni halaklahi i ma sada biri-biri jantan tu pintu ni Bandar Parmianan Ni TUHAN gabe haul hasesaan ni dosa.

²²Haulkonon ni malim ma biri-biri i di bagasan upacara mambaen badia anso sesa dosa ni halakna i, gabe ampunan ni Debata ma halakna i.

²³Muda masuk hamu tu Kanaan, jana manyuan hayu na marparbatu sanga aha pe i, angkon etongon ni rohamunu do na haram batuna i salolot tolu taon parjolo. Salolot ni i nada tola panganonmunu parbatuna.

²⁴Di taon paopatkon sude batuna angkon lehenon gabe haul laho patidahon hatarimakasion tu Au, TUHANmu.

²⁵Dung pe di taon palimahon anso tola panganonmu batuna. Muda dipatulus ho sude paraturan on mur martamba ma batu ni suan-suananmu. Au do TUHAN Debatamu.

²⁶Ulang pangan juhut anggo laing marmudar dope. Ulang mamake elmu na songon dia pe.

²⁷Ulang gunting obuk di topi ni ulumu sanga mancukur janggutmu.

²⁸Ulang tulduhi huling-kulingmu sanga manggaruti pamatangmu songon tanda hamarsahan hara ni na matean. Au do TUHAN.

²⁹Ulang patoruk sangap ni angka dadaboru mambaen halahi gabe siboru jalang di angka inganan parsombaan ni debata sileban.[2] Muda dibaen hamu songon i, gabe sombaonmunu ma angka debata sileban i, gabe bahat ma karejo na so tupa di luatmu.

³⁰Ingot ma Ari Sabat jana pasangap ma sanga di dia inganan manyomba Au. Au do TUHAN.

³¹Ulang ho kehe mangido sipaingot sian halak na mambaen pardomuan tu angka tondi ni na mate. Muda dibaen hamu songon i, gabe ramun ma hamu. Au do TUHAN Debatamu.

³²Halak na dung matobang angkon habiaran jana pasangaponmu. Habiari jana pasangap ma Au, angke Au do TUHAN.

³³Tu halak na leban na maringanan di luatmu, ulang baen tu halahi na so pade.

³⁴Baen ma tu halahi songon na nibaenmu tu bangsomu sandiri jana haholongi halahi songon pangkaholongimu di dirimu sandiri. Ingot, hamu pe jungada do gabe halak na leban di Mesir. Au do TUHAN Debatamu.

³⁵Ulang tipu halak na asing mamake suhat-suhat na palsu, bope ukuran ginjang, ukuran borat sanga takaran pe.

³⁶Meter, timbangan bope takaran na tigor do pakeonmu. Au do TUHAN Debatamu, jana madung Huoban hamu haruar sian Mesir.

³⁷Ihutkon ma sude aturan dohot parentangKu, Au do TUHAN.”