Read Batak Angkola HAMALIMON 2 Bible Online

HAMALIMON 2 - Batak Angkola bible

HAMALIMON 2

¹Muda adong sada halak na giot manghaulkon gandum tu TUHAN i, angkon jolo nigiling do gandum i lamot gabe topung. Dung i diusehon ma tu topung i miak zetun jana di ginjangna nipayakkon hamonyan,

²dung i dioban ma tu malim pomparan ni si Harun. Buaton ni malim na markarejo hatiha i ma sanggolom sian topung i dohot miak zetun bope hamonyan i sude, lalu ditutung ia ma di ginjang ni langgatan na gabe songon tanda bahaso haul i na dung dihaulkon sude tu TUHAN. Uap ni haul situtungon i ma pajop roha ni TUHAN.

³Na lobi sian haul gandum i, i ma bagian ni malim. Na badia do gandum i, angke na nibuat sian panganon na dung nihaulkon tu TUHAN do i.

⁴Muda roti na ditutung di panutungan ni roti do na nisombahon i, angkon roti na so marragi. Tola do hapal roti i, nibaen di pangguluan ni topung na nibaen dohot miak zetun, tola muse do nipis, hum niapusan dohot miak zetun.

⁵Muda roti na nitutung di bagasan pamanggangan do sisombahonon i, angkon roti na nibaen sian topung do na nibaur dohot miak zetun, tapi ulang marragi.

⁶Hatiha manghaulkon angkon nitapor do roti i, dung i niusehon tu miak zetun.

⁷Muda roti na nigoreng di bagasan huali do sisombahonon i, angkon roti na nibaen sian topung dohot miak zetun do.

⁸Nioban ma roti i songon haul tu TUHAN, nipasahat ma i tu malim na giot maroban tu langgatan.

⁹Na gabe tanda ma i bahaso haul i na dung disombahon tu TUHAN, buaton ni malim ma deba sian roti i, dung i tutungonna ma di ginjang ni langgatan. Uap ni haul sipanganon i ma pajop roha ni TUHAN.

¹⁰Na lobi sian haul i, i ma bagian ni angka malim. Na badia do roti i, angke na nibuat sian sipanganon na dung nihaulkon tu TUHAN.

¹¹Nada tola mamake ragi sanga aer ni loba tu angka panganon sisombahonon tu TUHAN.

¹²Deba sian gandum na nisabi parjolo ganop taon, angkon obanonmunu sisombahonon tu TUHAN. Nada situtungon gandum i di ginjang ni langgatan.

¹³Sude haul gandum angkon siraanmunu, angke sira i do na gabe tanda parjanjianmunu dohot Debata. (Sude silehen-lehenmunu angkon baenonmunu sira.)

¹⁴Muda marhaul hamu tu TUHAN sabagian sian gandum na parjolo nisabi, oban ma gandum na dung disaok sanga na dung diduda.

¹⁵Angkon niusehon do miak zetun tu gandum i jana nibaen hamonyan di ginjangna.

¹⁶Tutungon ni malim i ma sabagian sian gandum dohot miak i bope sude hamonyan songon tanda bahaso sudena i madung dihaulkon tu TUHAN songon haul sipanganon.