Read Batak Angkola HAMALIMON 22 Bible Online

HAMALIMON 22 - Batak Angkola bible

HAMALIMON 22

¹Disuru TUHAN ma si Musa

²pabolkaskon parenta on tu si Harun dohot tu angka anakna, “Ulang pahodar hamu goarKu na badia i. Hara ni i baen hamu mardongan sangap angka silehenonmu sian halak Israel na mardohonan di Au, Au do TUHAN.

³Muda adong sahalak sian pomparanmu na ramun padonokkon tu haul na giot silehenon na nilehen ni halak Israel di Au, gabe nada patolaon be ia mangoloi di langgatan. Mardalan ma paraturan on ro di pudian ni ari, Au do TUHAN.

⁴Sada sian pomparan ni si Harun na hona kusta sanga na mangharuarkon aek, nada tola mangankon sian silehen-lehen na badia i, salolot so dipaboa na dung ias ia mangihutkon ugamo. Gabe ramun do sada malim muda dais ia tu sada na ramun hara ni na hona tu bangke. Gabe ramun muse do ia muda haruar same ni pamatangnia

⁵sanga muda dais ia tu binatang sanga tu halak na ramun.

⁶Sahalak malim na gabe ramun, laing ramun do ia lopus tu andospotang. Jana haru dung salpu pe andospotang, nada tola dope panganonnia haul na badia i anggo so maridi dope ia.

⁷Dung lusut mataniari, ias ma ia jana tola ma dipangan ia haul na badia i angke i do panganonnia.

⁸Nada tola panganonnia juhut ni binatang na mate haram sanga na nisoro ni binatang panyoro. Muda dipangan ia i gabe ramun do ia. Au do TUHAN.

⁹Sude malim angkon patuluskon angka aturan na dung Hulehen. Muda nada, sala do halahi jana angkon mate, patunda ni na mangalaosi angka aturan na badia i. Au do TUHAN jana na mamili halahi gabe hapunjunganKu.

¹⁰Haul na mardohonan di Au, hum sabagas ni malim i do tola mangankon, halak na asing nada tola, haru pe sabagas halahi sanga parkarejo ni malim.

¹¹Tapi anggo angka hatoban ni malim, na ditobusi dohot hepeng ni malim i sandiri sanga na sorang di bagas ni malim, tola do mangankon panganon na nijagit ni malim i.

¹²Boru ni sada malim na marbagas tu sahalak na so malim nada tola mangankon sipanganon na nipasahat tu Au.

¹³Tapi boru ni malim na dung marando sanga na disirangkon tapi nada adong anakna, jana madung mulak tu bagas ni amangna jana ngolunia margantung tu halahi tola do mangankon sanga aha pe na nijagit ni amangna sian hamalimon. Hum sabagas ni malim i do na tola mangankon haul sisongon i.

¹⁴Muda adong sahalak sian na so sabagas ni malim, sian na so disangajo ia hape tarpangan ia haul na badia i, angkon gararonnia tu malim mangulahi sude arga ni haul i ditamba dope dua pulu porsen.

¹⁵Nada tola pahodaron ni angka malim haul na mardohonan tu Au,

¹⁶marhite na padiarkon sada-sada halak na so patut mangankon sian haul i. Halak na sala do songon i jana angkon uhumon. Au do TUHAN jana Au do pabadiahon angka haul i.”

¹⁷Disuru TUHAN ma si Musa

¹⁸mangalehen tu si Harun, tu angka anakna dohot tu sude bangso Israel angka paraturan songon on, “Muda dipasahat halak Israel sanga halak na leban na tinggal di Israel haul situtungon giot manggarar nietnia sanga haul sian jop ni roha, angkon pahan-pahanan jantan na so martihas do anso tarjagit.

²⁰Muda dilehen hamu pahan-pahanan na martihas, nada dijagit TUHAN i.

²¹Muda dilehen sada-sada halak tu TUHAN haul haluaan baen panggarar ni nietnia sanga haul sian jop ni roha, nada tola pahan-pahanan na martihas, anso tarjagit.

²²Ulang haulkon hamu tu TUHAN pahan-pahanan na mapitung, na maponggol holi-holina sanga na mabugang, sanga marnana barona, bobak na mahancit sanga na rasaon. Pahan-pahanan na songon i ulang lehen hamu gabe haul sipanganon di langgatan i.

²³Songon haul sian jop ni roha tola do haulkononmunu pahan-pahanan na so satimpal pamatangna tu umurna sanga na so jeges potongonna, tapi anggo manggarar niet, nada sah pahan-pahanan na songon i.

²⁴Ulang haulkon hamu tu TUHAN pahan-pahanan na nipaias hara ni na hona tanduk sanga tarhapit sanga dihorot batu ni dongan magodangna. Na songon i nada tola masa di luatmunu.”

²⁵Pahan-pahanan na nijagit sian halak na leban nada tola lehenon gabe haul sipanganon. Pahan-pahanan na songon i na martihas do i etongon gabe nada dijagit TUHAN i.

²⁶Anak ni lombu, anak ni biri-biri sanga anak ni hambeng na baru adong, angkon padiaron rap dohot inangna lolot ni pitu ari. Dung i pe anso tarjagit gabe haul sipanganon.

²⁸Ulang haulkon hamu lombu dohot anakna, sanga biri-biri dohot anakna sanga hambeng dohot anakna di sada ari.

²⁹Muda dilehen hamu haul puji-pujian tu TUHAN, angkon mangihutkon paraturan do dijagit haulmunu i.

³⁰Pangan hamu ma haul i laing di ari i jana ulang adong be na tinggal tu ari ancogot.

³¹Didok TUHAN i, “Patulus hamu ma angka parentangKu; Au do TUHAN.

³²Ulang pahodar hamu goarKu na badia i. Sude halak Israel angkon mangoku na badia do Au. Au do TUHAN na pabadia hamu.

³³Au do maroban hamu sian Mesir, anso Au gabe Debatamunu. Au do TUHAN.”