Read Batak Angkola HAMALIMON 23 Bible Online

HAMALIMON 23 - Batak Angkola bible

HAMALIMON 23

¹Dilehen TUHAN ma tu si Musa

²angka aturan on taringot tu Ari Pesta Ugamo. “Di angka ari i angkon marlagut halak Israel laho pasangapkon Au.

³Sanga di dia sajo pe hamu maringanan angkon sumurung Ari Sabat i baenonmunu di Au. Onom ari honokna hamu markarejo tapi ingot ma, ari papituhon, Ari Sabat ari paradianan do i. Nada tola markarejo di ari i, hum marpungu do laho pasangap Au.

⁴Di hatiha na dung ditontuhon angkon umumkononkon do angka ari pesta on.”

⁵Ari Pesta Paskah na nipestahon pasangap TUHAN mamungka sian na lusut mataniari di tanggal opat bolas bulan sada.

⁶Ancogotna i tanggal lima bolas mamungka ma Pesta Roti Na So Marragi. Pitu ari honokna, nada tola panganonmunu roti na nipauli mardongan ragi.

⁷Salolot pitu ari angkon lehenonmunu haul sipanganon tu TUHAN. Di ari parjolo dohot ari papituhon pesta i, angkon marlagut do hamu pasangap Au jana nada tola karejohononmunu sanga aha pe.

⁹Dung bolkas hamu tu tano silehenon ni TUHAN i tu hamu jana dung manyabi gandum hamu disi, parbatu ni gandum na parjolo angkon obanonmunu tu malim.

¹¹Di ari dung salpu Ari Sabat angkon pasahaton ni malim i ma gandum i gabe haul na mardohonan di TUHAN i anso jop roha ni TUHAN i di ho.

¹²Di ari hatiha dilehen hamu haul gandum i, angkon laing lehenonmunu do na gabe haul situtungon tu TUHAN sada anak ni biri-biri na marumur sataon jana na so martihas.

¹³Rap dohot i angkon lehenonmunu dope haul sipanganon dua kilo gram topung dicampur dohot miak zetun. Uap ni haul i ma na pajop roha ni TUHAN. Lehen hamu muse ma rap dohot i anggur saliter bahatna.

¹⁴Taran so dioban hamu silehenon i tu TUHAN, ulang pangan hamu saotik pe sian gandum na baru i, bope na mata sanga na nisaok sanga ditutung pe. Aturan on angkon ihutkonon ni sude pomparanmu lopus tu ari parpudi.

¹⁵Mamungka di ari dung salpu Sabat, hatiha manghaulkon parbatu ni gandum na parjolo hamu tu TUHAN, etongonmunu ma pitu minggu honokna.

¹⁶Di ari palima puluhon, i ma ari dung Sabat papituhon, angkon obanonmunu ma mangulahi gandum sihaulkonon tu TUHAN.

¹⁷Ganop ripe angkon maroban duakamata roti silehenon gabe silehen-lehen na mardohonan tu TUHAN. Ganop roti i nipauli sian dua kilo gram topung na marragi jana nilehen ma i tu TUHAN gabe haul gandum na parjolo na giot sabion.

¹⁸Rap dohot roti i, angkon lehenon ni halak na bahat i ma pitu biri-biri marumur sataon, sada lombu jantan dohot dua hambeng. Sudena i nada tola na martihas. Sude pahan-pahanan i lehenon ma i gabe haul situtungon tu TUHAN, rap dohot haul gandum dohot haul aek ni anggur. Uap ni haul i ma na pajop roha ni TUHAN.

¹⁹Lehen muse ma sada hambeng jantan gabe haul hasesaan ni dosa, dohot dua anak ni biri-biri jantan na marumur sataon gabe haul hasesaan ni dosa.

²⁰Roti dohot anak ni biri-biri na dua i dihaulkon malim ma i gabe silehen-lehen na mardohonan tu TUHAN, gabe malim i nampunasa. Na badia do angka na dihaulkon i.

²¹Di ari i nada tola karejohononmunu sanga aha pe, angkon marlagut do hamu pasangap Au. Angkon patuluson ni pomparanmu do paraturan on sapanjangna sanga di dia pe hamu maringanan.

²²Muda manyabi hamu, ulang sabi hamu gandum na tubu di topi ni ladang i jana nada tola mulak hamu papungu turiangna. Tinggalkon ma i baen di halak na dangol dohot di halak na leban. TUHAN do Debatamu.

²³Tanggal sada bulan pitu angkon pestahononkon gabe ari na dung nitontuhon ari paradianan. Di ari i di na tarbege sora ni sarune angkon marlagut hamu pasangap Au.

²⁵Lehen hamu ma haul sipanganon tu TUHAN jana nada tola mangkarejohon sanga karejo aha pe.

²⁶“Tanggal sampulu bulan pitu i ma pamasaon ari upacara taonan laho manyesa dosa ni rayat. Di ari i angkon marpuaso do hamu, marpungu pasangap Au, jana mangalehen haul sipanganon tu TUHAN.

²⁸Nada tola karejo di ari i, angke di ari i do upacara manyesa dosa.

²⁹Sanga ise na mangan bagi aha di ari i, nada etongon be ia halak ni Debata.

³⁰Jana ise na markarejo di ari i, mate hona uhum ni TUHAN ma.

³¹Marlaku do paraturan on tu anak dohot pahompumunu marsundut-sundut sanga di dia halahi maringanan.

³²Di hatiha mamungka lusut mataniari di tanggal sambilan bulan i lopus tu na lusut mataniari di tanggal sampulu angkon pestahononmunu gabe ari paradianan na nitotopkon. Angkon marpuaso sadari i nada tola mangankon sipanganon saotik pe.”

³³“Ari Pesta Undung-undung Bulung Rata mamungka sian tanggal lima bolas bulan pitu honokna pitu ari.

³⁵Sapanjang na pitu ari i, ganop ari angkon pasahatonmunu haul sipanganon. Di ari parjolo dohot pasalapankon angkon marlagut hamu di pesta i pasangap Au mangalehen haul sipanganon jana nada tola mangkarejohon sanga karejo aha pe.

³⁷Jadi, angka i ma ari pesta ugamo na angkon pestahononmunu. Di angka ari pesta i angkon pasangaponmunu TUHAN marhite na marlagut laho maribadat tu Au lalu mangalehen haul sipanganon, haul situtungon, haul gandum, haul pahan-pahanan dohot haul aek ni anggur, bahatna songon na ditontuhon ganop ari.

³⁸Angka parayaan i songon tamba-tamba ni Ari Sabat na somal do angka ari pesta i. Jadi angka haul i pe tamba-tamba do i tu silehen-lehen na somal, tambana tu haulmu di na manggarar niet bope tamba-tamba tu haul jop ni roha na nilehenmu tu TUHAN.

³⁹Dung salpu sabion, baenonmunu muse ma pesta pitu ari honokna, mamungka sian tanggal lima bolas bulan pitu. Ari parjolo dohot pasalapankon, ari na dung nitontuhon do i gabe ari paradianan.

⁴⁰Di ari parjolo i ma ho mambuat parbatu ni suan-suananmu, buat muse ma angka bulung ni harambir dohot bulung sian dangka na rimbun, dung i mamungka ma pesta parayaan ugamo i laho pasangapkon TUHAN Debatamu.

⁴¹Angkon baenonmu parayaan i pitu ari lolotna di bagasan sataon. Pomparanmunu pe angkon patulusonna do aturan i ganop bulan papituhon lopus tu ari na ro.

⁴²Pitu ari honokna, sude halak Israel tinggal di undung-undung i

⁴³anso diboto pomparanmu, TUHAN do na manyuru halak Israel tinggal di bagasan undung-undung, hatiha dioban Ia halahi haruar sian Mesir. Ibana do TUHAN Debatamu.”

⁴⁴Songon i ma dipaboa si Musa tu bangso Israel angka aturan salaho tu na patuluskon angka pesta ugamo laho pasangapkon TUHAN.