Read Batak Angkola HAMALIMON 26 Bible Online

HAMALIMON 26 - Batak Angkola bible

HAMALIMON 26

¹Didok TUHAN ma, “Nada tola baenonmunu gana-ganaan sanga pajongjong patung sanga pe tiang batu na niuhir gabe sombaon, Au do TUHAN Debatamu.

²Pestahon ma Ari SabatKu jana pasangap ma inganan na badia sanga di dia disomba hamu Au. Au do TUHAN.

³Muda marpungu hamu mangihutkon angka aturan na sian Au jana dipatulus angka parentangKu,

⁴Huparo pe udan di hatihana, gabe dilehen tano i ma suhana jana marbatu ma hayu na nisuanmunu.

⁵Suha ni tanomunu gabe marlipat ganda, pola tehe dung dapot hatihana mambuat batu ni anggur, laing manyabi dope hamu. Jana dung dapot hatiha manyabur same ni gandum, laing mambuat batu ni anggur dope hamu. Gabe tuk ma panganonmunu jana sonang ngolumunu di luatmunu.

⁶Sonang pe Hubaen luatmunu, gabe sonang hamu modom so adong habiaran sanga tu ise pe. Huagohon pe sude angka binatang na parohon parmaraan sian luatmunu, jana porang pe nada masa disi.

⁷Taluhononmunu ma musumunu.

⁸Lima pe sian hamu tarbaen mangalo saratus, jana saratus tarbaen mangalo sampulu ribu.

⁹Hupasupasu pe hamu jana Hulehen bahat pomparanmunu. Sude na dung Hujanjihon tu hamu, angkon patulusonKu.

¹⁰Sabionmunu marlipat ganda, jabat tuk sataon. Pola tehe mangambungkon na lobi di sabion na salpu anso adong inganan ni suha ni sabion na baru.

¹¹Rap do Au dohot hamu di bagasan Bandar Na Badia, jana nada unjung Hutinggalkon hamu.

¹²Rap do Au dohot hamu, Au do gabe Debatamunu jana hamu gabe bangsongKu.

¹³Au do TUHAN Debatamu na maroban hamu ruar sian tano Mesir anso ulang diparhatoban hamu. Madung Huponggolkon kuaso na mandondoni hamu, jana Hubaen hamu gabe halak na dung malua.”

¹⁴Didok TUHAN ma, “Muda nada dioloi hamu parentangKu uhumonKu ma hamu.

¹⁵Muda dilanggar hamu janji na Hubaen dohot hamu jana nada ra hamu mangoloi angka aturan na sian Au dohot parentangKu,

¹⁶uhumonKu ma hamu. ParoonKu ma bala tu hamu, nyae dohot arun na so haubatan, gabe mapitung ma hamu jana marhancit ngolumunu. Saburonmunu ma same, tapi nada daionmunu suhana, angke angka musumunu giot ro patunduk hamu jana manyabi na nisuanmunu.

¹⁷Au do alomunu, gabe ditaluhon hamu jana halak na mangkagigihon hamu, gabe mangkuasoi hamu. Gok biar ma hamu, gabe marlojong hamu haru so adong mangayak-ayak.

¹⁸Muda dung ditaon hamu sudena i, hape laing so dioloi hamu Au, Hutamba ma uhum tu hamu pitu lipat.

¹⁹Tarlobi do sombongmunu, tapi Au patunduk hamu. Nada ro be udan, gabe hiang ma tanomi pir songon batu.

²⁰Sude halojaonmu nada adong gunana, angke tanomunu nada marsuha, jana suan-suananmu nada marbatu.

²¹Muda sai torus dope aloonmunu Au jana nada dioloi hamu Au, tambaanKu dope uhum pitu noli lompit.

²²ParoonKu ma angka binatang na parohon parmaraan tu tonga-tongamunu. Soroanna ma angka anakmu, mamunu pahan-pahananmu pasudehon hamu, gabe saotik ma bilanganmunu, gabe lungun angka dalan na adong di luatmunu.

²³Dung ditaon hamu songon i sude uhuman i, hape laing nada dioloi hamu Au, mur mangalo hamu tu Au

²⁴Au ma alomunu manguhum hamu pitu lompit umborat sian parjolo.

²⁵ParoonKu ma parporangan laho manguhum hamu, angke madung dilaosi hamu aturanKu, dung i muda marlagut hamu di kotamunu manjalahi paronding-ondingan, paroonKu ma tu hamu nyae na so haubatan gabe tunduk hamu tu musumunu.

²⁶Gabe sude ma balanjomunu, jabat sampulu dadaboru mangalompa di sada tataring pamasakkon roti na adong di halahi. Dibagi dos panganon i, dung i dilehen di hamu, hape sai tongtong male hamu.

²⁷Dung ditaon hamu sude na songon i, hape laing so ditangihon hamu Au jana nada dioloi hamu Au

²⁸mardongan muruk aloonKu hamu. Dung i Huuhum hamu pitu noli dumokdok sian na parjolo i.

²⁹Gabe tangkuraparon ma hamu, pola panganonmunu anakmunu sandiri.

³⁰RoncohononKu ma inganan parsombaanmunu, angka na di tor, Hurumpakkon angka langgatan inganan panutungan ni hamonyan jana Hupardanggurkon angka bangkemunu tu angka gana-ganaan na marumpak i. Hara ni pangkilalaan na magigi.

³¹Angka kota Hugonti dohot banggar na mosok, inganan panyombaanmu angkon Huroncohon bope angka haulmunu nada jagitonKu.

³²Maronco ma luatmu sude, pola tarsonggot angka musumu na marnida i hara ni bahat ni na maronco i.

³³ParoonKu ma parporangan di luatmunu jana manyarsar hamu di luat na leban. Angka ladangmu gabe tarulang jana kotamu gabe abu.

³⁴Apala di hatiha i ma sude tanomu na so diloas ho maradian, gabe tutu maradian. Dompak di bagasan habuangan hamu tu luat ni musumu, tarulang ma tanomu. Marhite na songon i ma maradian tano i.

³⁶Angkon tarbuang do hamu muse tu luat na leban, baenonKu habiaran tu hamu pola tehe hum umbege sora ni bulung-bulung na niombus ni haba-haba pe gabe mabiar hamu. Gabe marlojong ma hamu songon na diayak di parporangan, martinggangan ma hamu di hatiha so adong musu humaliang hamu.

³⁷Marlojong ma hamu martomboman na sada tu na sada nari, hatiha so adong na mangayak, jana nada adong gogomunu marporang mangalo sanga musu aha pe.

³⁸Marmatean ma hamu di habuangan, dironcohon musumunu ma angka luatmunu.

³⁹Saotik sian hamu na laing mangolu di luat ni musumunu gabe marhancit hara ni dosamunu sandiri dohot dosa ni ompumunu.

⁴⁰Tapi anggo pomparanmu dioku halahi do dosa ni halahi sandiri dohot dosa ni ompu ni halahi, na dung mardosa hara ni na dialo halahi Au,

⁴¹gabe Hualo halahi jana Huusir halahi tu habuangan di luat ni musu ni halahi. Di pudi dung tunduk angka pomparanmu jana dung mardalan uhuman hara ni dosa dohot pangaloon ni halahi,

⁴²ingotonKu ma parjanjian dohot si Jakob, si Ishak dohot si Abraham. PaimbaruonKu ma janjingKu laho mangalehen tano tu bangsongKu.

⁴³Tapi angkon jolo rumar do tano i dibaen pangisina, anso tarbaen sonang maradian. Jana bangsongKu angkon mandalani sude uhuman na hona tu halahi hara ni na so ra halahi mangihutkon angka tonangKu dohot parentangKu.

⁴⁴Tapi haru pe laing di luat ni musu halahi tinggal, nada tinggalkononKu sanga roncohononKu halahi. Angke muda Huroncohon halahi, na manggotapkon parjanjian do Au tu halahi, hape Au do TUHAN Debata ni halahi.

⁴⁵PaimbaruonKu ma janji na Hubaen dohot ompu ni halahi hatiha Hupatidahon kuasongKu tu angka bangso jana Huoban bangsongKu ruar sian Mesir, anso Au TUHAN gabe Debata ni halahi.”

⁴⁶Sudena i, i ma angka aturan dohot angka parenta na nilehen ni TUHAN di Dolok Sinai tu halak Israel marhite si Musa.