Read Batak Angkola HAMALIMON 27 Bible Online

HAMALIMON 27 - Batak Angkola bible

HAMALIMON 27

¹Dilehen TUHAN ma tu si Musa

²deba nari paraturan tu halak Israel, “Muda dilehen sada halak tu TUHAN i panggarar ni niet na mardohonan, tola do gararon ni halahi dohot hepeng, songon on pangalahona.

³Mangihutkon arga na dung ditotopkon: — halaklahi sian umur dua pulu tu onom pulu taon, 50 hepeng perak — dadaboru na magodang 30 pulu hepeng perak — anak halaklahi, umur lima tu dua pulu taon, 20 hepeng perak — anak dadaboru 10 hepeng perak — anak halaklahi na menek di toru ni lima taon 5 hepeng perak — anak dadaboru na menek 3 hepeng perak — halaklahi di ginjang ni 60 taon, 15 hepeng perak — dadaboru di ginjang ni 60 taon, 10 hepeng perak.

⁸Muda pogos situtu do halak na marniet i angkon dioban do ia tu jolo ni malim. Malim i sandiri do manontuhon arga na tumoruk, na targarar halak na marniet i.

⁹Muda niet taringot tu binatang na halal sipasahaton tu TUHAN do nietnia i, nada tola gontion ni na marniet i dohot binatang na asing angke sude silehen-lehen silehenon tu TUHAN, na badia do i. Muda laing dibaen ia, gabe TUHAN noma nampuna pahan-pahanan na dua i.

¹¹Tapi muda binatang na haram do nietnia i, na so tarjagit gabe silehenon tu TUHAN, angkon obanon ni halak na marniet i do pahan-pahanan i tu jolo ni malim.

¹²Tontuhonon ni malim i ma arga ni i, mangihutkon pangalahona. Jadi argana dung ditotopkon i nada tola be tawaron.

¹³Muda giot tobusonnia mangulahi binatang i, gararonnia ma saargana i ditamba dua pulu porsen.

¹⁴Muda dilehen sada halak bagasnia tu TUHAN, tontuhonon ni malim ma argana mangihutkon pangalaho ni bagas i. Arga na dung ditontuhon i nada tola be tawaron.

¹⁵Muda giot tobuson ni na pasahat bagas i mangulahi bagas i angkon gararonnia ma argana ditamba dua pulu porsen.

¹⁶Muda adong sahalak mangalehen sabagian sian tanonia tu TUHAN, arga ni tano i ditontuhon mangihutkon bahat ni same na masuk tu tano i. Ganop dua pulu kilogram gandum ditontuhon ma sampulu hepeng perak.

¹⁷Muda dilehen torus tano i dung Taon Haluaan, gok ma argana.

¹⁸Muda dung sanga piga-piga taon dung i, disi pe dilehen tano i, timbangon ni malim ma arga kontan mangihutkon bahat ni taon na lobi lalu tu Taon Haluaan na giot ro, dung i ditotopkon ma arga na ummura.

¹⁹Muda giot tobuson ni halak na mangalehen ladang i mangulahi ladang i, angkon gararonnia ma argana ditamba dope dua pulu porsen.

²⁰Muda digadis ia ladang i so jolo ditobus ia sian TUHAN, nada adong haknia be manobus ladang i mangulahi.

²¹Di Taon Haluaan na giot ro gabe ladang ni TUHAN noma i ro di salolotna, jana lehenon ma i tu malim.

²²Muda dilehen sada halak ladang na baru ditobusi ia tu TUHAN,

²³angkon timbangon ni malim i ma argana mangihutkon taon na lobi lalu tu Taon Haluaan na giot ro. Dung i gararon ni halahi ma argana laing di ari i. Hepengna i gabe TUHAN ma nampunasa.

²⁴Di Taon Haluaan angkon paulahon ma ladang i tu nampunasa parjolo sanga tu pomparanna.

²⁵Sude arga ditontuhon mangihutkon arga na dung ditotopkon.

²⁶Pahan-pahanan na adong parjolo TUHAN do nampuna i. Jadi sahalak pe nada tola mangalehen i tu TUHAN gabe haul jop ni roha. Anak ni lombu, anak ni biri-biri sanga anak ni hambeng na adong parjolo TUHAN do nampuna i.

²⁷Binatang na haram na adong parjolo tola ditobus mangihutkon arga na ditontuhon ditamba dua pulu porsen. Muda so ditobus, tola do gadison binatang i tu halak na leban mangihutkon arga na rasmi.

²⁸Sada pe nada tola manggadis sanga manobusi mulak sanga aha na dung dilehen tu TUHAN, sanga na jolma pe i, pahan-pahanan sanga tano. TUHAN do nampuna i ro di salolotna.

²⁹Haru jolma na nilehen nada tola ditobus, pasti do ia dibunu.

³⁰Saparsampulu sian sude suha ni tano bagi na gandum, parbatu ni hayu, di TUHAN do i.

³¹Muda giot tobusan ni sasahalak mangulahi sabagian, angkon gararonnia argana i ditamba dua pulu porsen.

³²Sada sian sampulu pahan-pahanan, TUHAN do nampuna i. Muda dietong pahan-pahanan i, ganop na pasampuluhon, TUHAN do nampuna i.

³³Nada tola aturon ni nampuna pahan-pahanan i pahan-pahanannia hum songon i sajo gabe hum na jatna i tarpili. Nada tola muse gontionnia pahan-pahanan i. Muda digonti ia dohot pahan-pahanan na asing, angkon lehenon ma dua-dua pahan-pahanan i tu TUHAN nada tola ditobusi mangulahi.”

³⁴I ma angka parenta na nilehen ni TUHAN di ginjang ni Dolok Sinai tu halak Israel marhite si Musa.