Read Batak Angkola HAMALIMON 3 Bible Online

HAMALIMON 3 - Batak Angkola bible

HAMALIMON 3

¹Muda giot sombahonon ni sada halak sada lombu gabe haul haluaan, angkon lombu jantan sanga boru-boru na so martihas.

²Halak na maroban haul, angkon dipayakkon do tanganna tu ginjang ni ulu ni lombu i lalu disambol di pintu ni Bandar Parmianan Ni TUHAN. Dung i dipispiskon angka malim pomparan ni si Harun ma mudar ni lombu i tu na opat topi ni langgatan i.

³Songon haul sipanganon di TUHAN angkon nisombahon goar-goaran ni juhut ni pahan-pahanan i. Tabo-tabo na mamaluti butuhana,

⁴pia dohot tabo-tabona, dohot bagian na dumenggan sian ate-atena.

⁵Sudena i rap dohot haul situtungon na asing i, tutungon ni malim ma i di ginjang ni langgatan i. Uap ni haul sipanganon i ma pajop roha ni TUHAN.

⁶Muda biri-biri sanga hambeng do na nisombahon gabe haul haluaan, tola do jantan sanga boru-boru tapi ulang na martihas.

⁷Muda disombahon sada halak sada biri-biri, angkon boanonnia do i tu jolo ni TUHAN.

⁸Jana angkon payakkononna ma tanganna tu ginjang ulu ni biri-biri i lalu disambol ia ma i di jolo ni Bandar Parmianan. Lalu diduruskon malim i ma mudarna i tu na opat topi ni langgatan i.

⁹Songon haul sipanganon tu TUHAN angkon sombahonon ni malim i ma goar-goaran ni juhut na nilapa i. Tabo-tabona, sude lalaina na marisi tabo-tabo jana digotap donok tu hayu tanggurungna, tabo-tabo na mamalut butuhana,

¹⁰pia dohot tabo-tabona, dohot bagian na dumenggan sian ate-atena.

¹¹Angkon tutungon ni malim na markarejo disi sudena i di ginjang ni langgatan gabe haul sipanganon di TUHAN.

¹²Muda hambeng do na giot sombahononna

¹³angkon payakkonon ni na maroban haul i ma tanganna tu ginjang ulu ni hambeng i lalu disambol ia ma i di jolo ni pintu ni Bandar Parmianan Ni TUHAN. Pispiskonon ni malim i ma mudar ni hambeng i tu na opat topi ni langgatan i.

¹⁴Songon haul sipanganon di TUHAN pasahaton ni malim i ma goar-goaran ni juhut ni hambeng na nilapa i. Sude tabo-tabo na mamalut isi ni butuha,

¹⁵pia dohot tabo-tabona dohot bagian na dumenggan sian ate-atena.

¹⁶Tutungon ni malim i ma sudena i di ginjang ni langgatan, gabe haul sipanganon na pajop roha ni TUHAN. Sude tabo-tabona i di TUHAN do i.

¹⁷Sahalak pe sian halak Israel nada tola mangankon tabo-tabo dohot mudar. Hot do aturan on ro di salolotna angkon sioloan ni ganop halak Israel sanga di dia pe halahi maringanan.