Read Batak Angkola HAMALIMON 6 Bible Online

HAMALIMON 6 - Batak Angkola bible

HAMALIMON 6

¹Dilehen TUHAN dope angka aturan on tu si Musa.

²Mardosa do sada halak maradopkon TUHAN muda so dipaulak ia barang na nipasimpankon ni donganna halak Israel tusia, sanga muda ditangko ia barang ni halak sanga dikicu ia sanga pe na so ra mangoku na dapotnia barang na mago jana na puluk marsumpa hara ni i. Muda songon i pangalahona, angkon sombahononnia ma haul partobus.

⁴Angkon gararonnia do mulak sanga aha na dapotnia sian dalan na so tigor. Muda tardapot sahalak marsala hatiha dibaen ia hasalaan i, angkon gok do gararonnia tu nampuna i ditamba muse dope duapulu porsen.

⁶Songon haul partobus ni hasalaan tu TUHAN, angkon obanon ni halahi ma tu malim sada biri-biri sanga sada hambeng jantan na so martihas. Asamon ma argana mangihutkon arga na dung ditontuhon.

⁷Angkon pasahaton ni malim ma i gabe haul hara ni dosa ni halakna i, dung i sesaon ni TUHAN i ma dosana.

⁸Disuru TUHAN ma si Musa,

⁹mangalehen tu si Harun dohot tu angka dakdanakna deba nari angka aturan taringot tu haul situtungon. Angkon tinggalkonon ni malim do haul i di ginjang ni langgatan saborngin i, bope api ni langgatan i angkon dipadiar marjilam.

¹⁰Dung i angkon pakeonnia do saraor pendek dohot baju juba na nibaen sian abit linen, lalu mambangkit abu na martabo-tabo na lobi sian langgatan jana mamayakkon tu topi ni langgatan i.

¹¹Dung i angkon gontion ni malim i ma pakeanna lalu maroban abu i tu balian ni bandar, di inganan na ias mangihutkon ugamo.

¹²Angkon jagoan do api na di ginjang langgatan i anso tongtong marjilam, nada tola padiaron mintop. Ganop manyogot angkon baenon ni malim i do soban tu langgatan i, bope manyusun haul situtungon na di ginjangna i jana manutung tabo-tabo sian haul haluaan i.

¹³Angkon tongtong do marjilam api i, nada tola padiaron mintop.

¹⁴Songon on ma angka aturan taringot tu haul gandum di TUHAN. Sahalak malim sian pomparan ni si Harun angkon maroban tu jolo ni langgatan.

¹⁵Dung i angkon buatonnia ma sude hamonyan na adong di ginjang ni haul i, dohot sanggolom topung bope miak. Sude na nibuatnia i angkon nitutung di ginjang ni langgatan na gabe tanda ma i bahaso sudena i madung nihaulkon tu TUHAN. Uap ni haul i ma na pajop roha ni TUHAN.

¹⁶Topung na lobi i baenon ma roti na so marragi, angkon panganon ni angka malim ma i di inganan na badia, i ma di alaman ni Bandar Parmianan Ni TUHAN. I do bagian ni angka malim na nilehen ni TUHAN di halahi sian haul sipanganon. Sipanganon na badia situtu do i, dos dohot haul hasesaan ni dosa dohot haul tobus ni hasalaan.

¹⁸Di sude hatiha di pudian ni ari, sude pomparan ni si Harun halaklahi, tola do mangankon roti i, i ma da bagian ni halahi na dung ditontuhon sian sipanganon na nipasahat tu TUHAN. Halak na asing na dais tu sipanganon na dung dihaulkon gabe badia hara hagogoan ni habadiaan ni haul i.

¹⁹Dilehen TUHAN i dope angka aturan on tu si Musa,

²⁰taringot tu na mangojakkon sada malim sian pomparan ni si Harun. Di ari pangojakkon ni malim i, angkon obanonnia ma topung gandum sakilo di TUHAN. (Dos bahatna songon haul gandum ari-ari.) Satonga ma i sihaulkononkon manyogot i, lobina i di andospotangna.

²¹Angkon campuron do topung i dohot miak, dung i ditutung di ginjang ni pamanggangan lalu disarsar, dung i disombahon ma i gabe haul gandum. Uap ni haul i ma pajopkon roha ni TUHAN.

²²Lopus tu pudian ni ari sude pomparan ni si Harun, markarejo ma i gabe Malim Godang laho pasahatkon haul on. Sudena i angkon ditutung, na gabe somba-somba tu TUHAN.

²³Haul gandum na nipasahat ni malim i angkon tutungon do lopus masak sude, saotik pe nada tola panganon.

²⁴Didok Debata ma tu si Musa

²⁵anso dilehen tu si Harun dohot tu angka dakdanaknia angka aturan deba nari taringot tu hasesaan ni dosa. Angkon sambolon do pahan-pahanan sibaenon haul i di topi ni langgatan sabola sian Utara gabe haul situtungon. Na sun badia do haul i.

²⁶Malim na manghaulkon pahan-pahanan i pe angkon panganonna do sian i di sada inganan na badia, i ma di alaman ni Bandar Parmianan Ni TUHAN.

²⁷Sanga ise jana barang aha pe na dais tu juhut ni pahan-pahanan i, angkon hona mara hara ni gogo ni habadiaanna. Muda mamistik saotik sian mudar ni pahan-pahanan i tu sada baju, angkon basuon baju i di sada inganan na badia.

²⁸Hudon tano pamolgang juhut na gabe haul i angkon ditaporkon. Muda hudon bosi do na nipake i, angkon gosohon ma hudon i, dung i dipaias dohot aek.

²⁹Sude halaklahi sian horong ni malim tola do mangankon haul na sun badia i.

³⁰Pahan-pahanan nampuna mudar na dioban tu bagasan Bandar Parmianan, na nipake i laho mangido hasesaan ni dosa, angkon tutungon do sude, nada tola i panganon.