Read Batak Angkola HAMALIMON 7 Bible Online

HAMALIMON 7 - Batak Angkola bible

HAMALIMON 7

¹On ma angka aturan taringot tu haul partobus ni hasalaan, haul na sun badia do i.

²Pahan-pahanan na gabe haul i, sambolon ma i di topi sabola sian Utara ni langgatan i, i ma inganan panyambolan ni pahan-pahanan na gabe haul situtungon, dung i mudarna i usehononkon ma i tu opat topi ni langgatan i.

³Sude tabo-tabo angkon paasingon. Lalaina na martabo-tabo, bope tabo-tabo na mamalut butuhana angkon pasahaton tu ginjang ni langgatan,

⁴pia na dua i dohot tabo-tabona dohot angka na dumenggan sian ate-atena.

⁵Angkon tutungon ni malim i ma sude tabo-tabo i di ginjang langgatan gabe haul situtungon di TUHAN. Haul i ma gabe haul partobus ni hasalaan.

⁶Sude halaklahi sian horong ni malim tola do mangankon juhut na nihaulkon i, tapi angkon di inganan na badia do panganonna, angke na sun badia do haul i.

⁷Dos do aturan sibaenon tu haul hasesaan ni dosa dohot tu haul partobus ni hasalaan, i ma: Juhut ni pahan-pahanan haul i, i ma bagian ni malim na pasahat haul i.

⁸Bobak ni pahan-pahanan na nipasahat gabe haul situtungon, bagian ni malim na pasahat haul do i.

⁹Sude haul gandum na nitutung sanga dilompa di hudon sanga na dipanggang, gabe malim na pasahat haul i tu Debata do nampuna i.

¹⁰Tapi sude haul gandum na so dilompa, bope na nicampur dohot miak, bope na mahiang, i ma tumpuk ni sude malim pomparan ni si Harun, jana angkon dos do bagian ni halahi.

¹¹Angka on ma aturan taringot tu haul pardonganan sipasahaton tu TUHAN.

¹²Muda dilehen sada halak haul on songon haul haluaan tu Debata, rap dohot angka pahan-pahanan sihaulkonon i, angkon pasahaton dope roti na so marragi. Roti i tola do na hapal, sian pangguluan ni topung na nicampur dohot miak zetun.

¹³Songon tambana angkon pasahaton muse roti na marragi.

¹⁴Sian sude rupa-rupaan ni roti i, sabagian angkon lehenon gabe somba-somba na mardohonan di TUHAN, jana i ma bagian ni malim na mambuat mudar ni binatang sihaulkonon i anso disiramkon tu langgatan.

¹⁵Juhut ni pahan-pahanan i angkon panganon laing di ari nihaulkon pahan-pahanan i, nada tola adong na tinggal tu ancogotna.

¹⁶Muda adong sahalak na maroban haul haluaan laho patulus baga-bagana, sanga haul na nionjar ni rohana nada pola angkon sude panganon sadari i. Angka na lobi tola do panganon ancogotna i.

¹⁷Muda laing adong dope lobina di ari patoluhon, angkon nitutung ma juhut i lopus abis.

¹⁸Tapi anggo laing dipangan muse dope lobina i, nada dijagit Debata haulna i. Nada gabe pasupasu haul i di halakna i, tapi na haram do i etongon. Sanga ise mangankon haul na haram, angkon manaon hara ni hasalaanna sandiri.

¹⁹Muda dais juhut i tu sada na hodar, nada tola panganon be i, angkon tutungon noma. Halak na ias do na tola mangankon juhut i. Hum halak na ias mangihutkon ugamo do na tola mangankon juhut haul haluaan.

²⁰Muda dipangan halak na so ias mangihutkon ugamo juhut na songon i, nada etongon be ia halak ni Debata.

²¹Sada-sada halak nada etongon be halak ni Debata, muda dipangan ia juhut na nihaulkon i, muda dais ia tu na hodar mangihutkon ugamo, bope na ro sian jolma, bope na ro sian binatang-binatang.

²²Dilehen TUHAN dope angka aturan tu si Musa

²³di halak Israel songon on. Tabo-tabo ni lombu, biri-biri sanga hambeng, nada tola panganon.

²⁴Tabo-tabo sian bangke ni binatang, sanga na nisoro ni binatang panyoro, nada tola panganon, tapi tarpake do i tu angka haporluan na asing.

²⁵Halak na mangankon tabo-tabo ni binatang haru pe tabaen do i nian gabe haul tu Debata, nada etongon be i halak ni Debata.

²⁶Barang di dia pe halak Israel maringanan, nada tola panganon ni halahi mudar ni unggas sanga mudar ni binatang na asing pe.

²⁷Sanga ise na mangalaosi aturan on, nada etongon be i halak ni Debata.

²⁸Dilehen TUHAN dope angka aturan on

²⁹tu halak Israel, sanga ise na maroban haul haluaan, angkon paasingonnia deba sian haul i gabe somba-somba na mardohonan tu TUHAN.

³⁰Angkon obanonnia sandiri ma i gabe haul sipanganon. Tabo-tabo dohot andora ni pahan-pahanan sihaulkonon i, angkon pasahaton gabe silehen-lehen na mardohonan tu TUHAN.

³¹Tutungon ni malim i ma tabo-tabo ni pahan-pahanan i di ginjang ni langgatan, tapi anggo andorana, i ma bagian ni angka malim.

³²Patna pudi sabola siamun dilehen gabe sumbangan na mardohonan,

³³tu na pasahat mudar dohot tabo-tabo ni haul sipanganon i.

³⁴Andora dohot patna pudi sabola siamun, i ma silehen-lehen na mardohonan na nibuat ni TUHAN sian bangso Israel bagian ni angka malim. I ma silehenon ni bangso Israel tu angka malim sapanjangna.

³⁵I ma bagian sian haul sipanganon na nilehen ni TUHAN tu si Harun dohot tu angka anakna, di hatiha na diojakkon i halahi gabe malim.

³⁶Di ari i ma didok TUHAN tu bangso Israel, anso sian haul na nioban ni halahi, sian i ma angkon lehenon ni halahi tu angka malim. Aturan on angkon oloan ni halak Israel sapanjangna.

³⁷Songon i ma angka aturan taringot tu haul situtungon, haul gandum, haul hasesaan ni dosa, haul partobus ni hasalaan, haul mangojakkon dohot haul haluaan.

³⁸Di ginjang ni Dolok Sinai di parhorsihan i, dilehen TUHAN ma angka parentaNa tu si Musa di na nisurunia halak Israel pasahat haulna.