Read Batak Angkola HAMALIMON 9 Bible Online

HAMALIMON 9 - Batak Angkola bible

HAMALIMON 9

¹Dung salpu karejo na mangangkat i, ancogotna i dipio si Musa ma si Harun dohot angka anakna i bope angka hatobangon ni bangso Israel.

²Didok si Musa ma tu si Harun, “Buat ma sada lombu jantan na poso dohot sada biri-biri jantan rap na so adong tihasna. Haulkon ma pahan-pahanan na dua i tu TUHAN; lombu jantan i ma gabe haul hasesaan ni dosa jana biri-biri jantan i gabe haul situtungon.

³Dung i suru muse ma halak Israel maroban haul na gabe hasesaan ni dosa sada hambeng jantan bope gabe haul situtungon sada anak ni lombu dohot sada anak ni biri-biri rap marumur sataon jana na so adong tihasna.

⁴Dung i na gabe haul haluaan angkon obanon ni halahi sada lombu jantan dohot sada hambeng jantan. Pasahaton ma sudena i tu TUHAN rap dohot haul gandum na nicampur dohot miak. Angkon baenon ni halahi songon i, angke di ari i ma ro TUHAN manopot halahi.”

⁵Sude na nitonahon ni si Musa i, dioban halahi ma tu jolo ni Bandar Parmianan, lalu marlagut ma sude na bahat i disi laho manyomba TUHAN.

⁶Dung i didok si Musa ma, “Sude hamu madung disuru TUHAN i mambaen songon on, anso tarligi hamu sinondang na silo i na ro sian inganan ni TUHAN.”

⁷Jana didok ia ma tu si Harun, “Kehe ma ho tu langgatan i, jana pasahat ma disi haul hasesaan ni dosa dohot haul situtungon anso disesa TUHAN i dosamu dohot dosa ni bangso i. Baen ma songon i songon na dung ditonahon ni TUHAN i.”

⁸Dung i kehe ma si Harun tu langgatan i, disambol ia ma lombu jantan na giot haulkononkon gabe hasesaan ni dosania sandiri.

⁹Dung i dioban anak ni si Harun ma mudar sihaulkonon i tu si Harun, lalu disornopkon ia ma jari-jarinia tu mudar i, dung i didaiskon ia tu na opat suhi ni langgatan i, dung i disiramkon ia mudar na lobi i tu pat ni langgatan i.

¹⁰Tabo-tabo, pia dohot juhut na dumenggan sian sihaulkonon i ditutung ia di ginjang ni langgatan i songon na dung didok TUHAN i hian tu si Musa.

¹¹Tapi juhut dohot bobak ni pahan-pahanan i, ditutung ia di balian ni parbandaran i.

¹²Dung i dibuat si Harun ma pahan-pahanan na giot baenon haul situtungon disia, lalu disambol ia. Dioban angka anak ni si Harun ma mudar i tusia lalu diusehon ia tu na opat topi ni langgatan i.

¹³Dung songon i dipasahat halahi ma uluna dohot angka bagian na asing ni binatang i lalu ditutung ia di ginjang ni langgatan.

¹⁴Dibasu ia ma butuhana dohot pat pudi ni binatang i lalu ditutung ia di langgatan i di ginjang ni haul situtungon na lobi i.

¹⁵Dung salpu songon i dipasahat ia muse ma haul na nioban ni halak na bahat i. Hambeng sihaulkononkon na gabe haul hasesaan ni dosa ni na bahat i dibuat ia lalu disambol ia, dung i dipasahat ia ma i songon pambaen ni haul hasesaan ni dosania sandiri.

¹⁶Dung i dibuat ia ma pahan-pahanan na dung ditontuhon hian gabe haul situtungon lalu dipasahat ia mangihutkon paraturan.

¹⁷Dipasahat ia muse ma haul gandum, dibuat ia sanggolom lalu ditutung ia di ginjang ni langgatan i. (Songon tamba-tambana do on tu haul situtungon ganop manyogot.)

¹⁸Lombu jantan dohot hambeng jantan disambol ia gabe haul haluaan hara ni na bahat i. Dioban angka anaknia ma mudar ni pahan-pahanan i tusia lalu disiramkon mudar i tu na opat topi ni langgatan i.

¹⁹Juhut na martabo-tabo sian lombu dohot hambeng i dibaen ia,

²⁰di ginjang ni andora ni pahan-pahanan na dua i, lalu dioban tu langgatan. Ditutung ma tabo-tabo i di ginjang ni langgatan.

²¹Andora dohot patna pudi ni binatang i dipasahat gabe silehen-lehen na mardohonan tu TUHAN hara ni angka malim songon na dung diparentahon ni si Musa hian.

²²Dung sidung sude haul i dipasahat, dipahirbang si Harun ma tangannia tu ginjang ni halak na bahat i mamasu-masu halahi, dung i mijur ma ia.

²³Dung i masuk ma si Musa dohot si Harun tu Bandar Parmianan Ni TUHAN, di hatiha haruar halahi, dipasupasu halahi ma na bahat i. Marsinondang ma inganan ni TUHAN silo sinondangna diida na bahat i.

²⁴Dung i dipaijur TUHAN ma api na manutung sude haul situtungon dohot goar-goaran na martabo-tabo di ginjang ni langgatan i. Di na niida ni angka jolma i na masa i, sude ma halahi marsurak jana unduk manyomba.