Read Batak Angkola JEREMIA 10 Bible Online

JEREMIA 10 - Batak Angkola bible

JEREMIA 10

¹O ale halak Israel, tangihon hamu ma tona ni TUHAN tu hamu.

²Didok Ia do, “Ulang tiru hamu hasomalan ni angka bangso na leban, jana ulang gamang hamu mida angka tanda na di langit na nihabiaran ni angka bangso i.

³Saotik pe nada adong guna ni ugamo ni angka bangso i. Ditaba halahi hayu di harangan, jana dipatukangkon halahi ma i tu tukang hayu. Dikarejohon ia ma i gabe patung gana-ganaan;

⁴lalu dipajeges ia ma i marhite sere dohot perak. Dipagomos ia ma i dohot paku, anso ulang tinggang.

⁵Songon halak-halak na di kobun ancimun do patung gana-ganaan i. Nada mangkuling, nada mardalan, jana angkon angkaton do i dibaen na so malo mardalan. Ulang hamu mabiar mida i, angke na so tarbaen i do mambaen na jahat tu hamu; mambaen na denggan pe nada margogo i muse.”

⁶Nada adong tudosanMu, ale TUHAN! Sangap jana marsahala do goarMu.

⁷Ise ma he na so mabiar marnida Ho, ale Raja ni sandok bangso? Tutu ma da, Ho do na patut sipujion jana na patut pasangapon. Sian sandok na pistar di tonga-tonga ni angka bangso dohot sian sude angka raja ni halahi, sahalak pe nada adong martudosan tu diriMu ale TUHAN.

⁸Sude halahi oto jana bodo angke sombaonna hum hayu sajo do, nada tarajarkonsa na marguna.

⁹Dilampis perak ma i dohot sere na dioban sian Spanyol dohot sian kota Ufas, sudena i karejo ni tangan ni halak na malo. Pakeanna sian abit na bunga torung na tobang dohot na poso na nikarejohon ni angka partonun na malo.

¹⁰Hape Ho do ale TUHAN, Debata na tutu, Raja na Hot, Debata Silehen ngolu. Muda jabat muruk Ho, gumalusak do tano, muda tarrimas Ho nada manahan angka bangso. (

¹¹Hamu ale angka bangso, angkon paboaonmunu do tu halahi, sisegohonon do angka debata na so manompa langit dohot tano. Mago do halahi sian portibi on.)

¹²Ditompa TUHAN do portibi marhite kuasoNia; marhite hamaloanNia digana Ia tanoon; dipahembang Ia langit marhite hapistaranNia.

¹³Hum parenta do dilehen Ia, gumadobur ma aek ni parlangitan[4] dipanaek Ia ombun sian ujung ni tano on. Dibaen Ia hilap na margurasa di bagasan udan, ditongos Ia alogo sian panyimpananna.

¹⁴Marnida sudena i, mamoto ma jolma, na oto do hape ia jana na soada hapistaranna. Maila ma angka na mambaen patung angke na so marguna jana na so marhosa do gana-ganaan na nipaulina.

¹⁵Nada mararga angka gana-ganaan i, sipalayason jana sipabileon do i. Di hadudumpang ni hatihana mago ma halahi sudena.

¹⁶Nada songon angka gana-ganaan i anggo Debata ni si Jakob; Ia do manompa sandok na adong. TUHAN Na Markuaso do goarNia; ditodo Ia do Israel gabe bangsoNa.

¹⁷Hona hobuk do hamu halak na maringanan di Jerusalem! Antong marhobas ma hamu!

¹⁸Danggurkonon ni TUHAN ma hamu tu habuangan; abiskononNia noma hamu. I ma parenta ni TUHAN.

¹⁹Mangangguk ma halak Jerusalem, “Banga do bugangnami jana nada be tarpamalum. Najolo hami ambang do tartaon hami parkancitan on, hape aha soada.

²⁰Madung masego bandarnami jana mangkagotap angka talina i. Nada adong be tarbaen pajongjong bandar dohot mamasang angka tenda-tendana, harana madung kehe sude angka dakdanak.”

²¹Hualusi ma, “Angka na oto do pamimpinta i; na so mangido panogu-noguon do halahi sian TUHAN, patunda ni i ma umbaen na so manjadi halahi jana gabe marserak hita on sun tu dia.

²²Tangihon hamu ma! Adong barita na paboahon sada bangso di Utara na mambaen hagaoran. Gabe mamolngit jana gabe lobu ma angka kota ni Juda baenon ni tentarana. Martabuni disi ma angka sorigala.”

²³Huboto do ale TUHAN, sahalak pe nada margogo manontuhon dalanna sanga mangatur pardalan ni ngoluna.

²⁴Ajar ma hami ale TUHAN, dohot na sapatutna. Ulang ma dohot hamumurukMu, anso ulang gabe mago hami.

²⁵Tu angka na manghudukkon Ho ma, palalu parpiar ni murukMu dohot tu na so marsomba tu joloMu. Angke madung diabisi halahi sude pomparan ni si Jakob jana na mangaroncohon tano ni halahi.