Read Batak Angkola JEREMIA 11 Bible Online

JEREMIA 11 - Batak Angkola bible

JEREMIA 11

¹Didok TUHAN ma tu au,

²“Parrohahon ma angka na nipangido ni parjanjianKu. Paboa ma tu halak Juda dohot tu halak Jerusalem bahaso

³Au TUHAN, Debata ni Israel, Huburai do sanga ise na so mangoloi angka na nipangido ni parjanjianKi.

⁴Na dung Hubaen do parjanjianKi dohot angka ompu ni halahi di na Huoban halahi ruar sian Mesir, i ma luat na tudos tu narako di halahi. Husuru halahi marpangoloion tu Au dohot patuluskon sandok na Huparentahon tu halahi. Laing Hudok muse do, muda marpangoloion halahi tu Au, halahi ma gabe bangsongKu jana Au Debata ni halahi.

⁵Muda dipatulus halahi sudena i, patulusonKu ma janjingKu tu ompu ni halahi, bahaso lehenonKu ma tu halahi tano napu jana na sonang na niinganan ni halahi saonnari.” Hualusi ma, “Denggan ale TUHAN.”

⁶Dung i didok TUHAN ma tu au, “Kehe ma ho mandapotkon angka kota na di Juda dohot tu angka dalan na di Jerusalem. Palalu ma jolo tonangKon tu angka jolma na disi. Suru ma halahi mamparrohahon dohot mangoloi angka na nipangido ni parjanjianKu.

⁷Dompak na Huoban ompu ni halahi ruar sian Mesir, torang do Hupaingot tu halahi anso marpangoloion tu Au. Lopus tu sadari on laing marpupu dope Hupaingot bangsongKi salaho tu pangalaho i,

⁸jana Husuru halahi mangoloi parjanjianKi, hape nada ra halahi manangihon jana nada marpangoloion. Hara ni i, sandok uhuman na adong di bagasan parjanjian i madung Hutimpalkon tu halahi.”

⁹Dung i didok TUHAN muse ma tu au, “Madung martahi halak Juda dohot halak na maringanan di Jerusalem mangalo Au.

¹⁰Madung dipambaeni halahi dosa na nibaen ni ompu ni halahi narobi; disomba halahi do angka debata jana nada ra halahi mangoloi parentangKu. Rap mangalaosi do halak Israel dohot Juda di parjanjian na Hubaen dohot ompu ni halahi.

¹¹Patunda ni i, Au TUHAN, madung Hupaingot bahaso na giot paroonKu hamamago tu halahi, jana nada tarbaen halahi pasidingkonsa. Muda pio-pio halahi mangido tolong tu Au, nada ra Au manangihonsa.

¹²Dung i kehe tu angka debata na asing noma halak Juda dohot halak Jerusalem mangido tolong, i ma tu angka debata na nisomba ni halahi marhite na manghaulkon haul. Tapi nangkon na margogo angka debata i paluahon halahi di hamamasa ni parmaraan i.

¹³Sun do bahatna debata ni halak Juda, sarupa dohot bahat ni kota ni halahi. Madung dipajongjong halak Jerusalem angka langgatan sabahat ni angka dalan di kota Jerusalem, i ma parhaulan ni haul tu Debata Baal sihagigian i.

¹⁴Jadi hara ni i ale Jeremia, ulang tangiangkon halahi sanga mangido tolong tu Au salaho tu halahi! Muda susa halahi jana mangido tolong tu Au, nada tangihononKu be halahi.”

¹⁵Didok TUHAN ma, “Bangso haholongan ni rohangKu madung patupahon angka pangalaho na jat. Nada adong be hak ni halahi di BagasKu. Diambang halahi do tarolat halahi ma hamamago i marhite na mambaen angka janji dohot na manghaulkon angka binatang. Martua ma he halahi baenon ni karejo na songon i?

¹⁶Jungada do Hugoari halahi bona ni zetun na rumbun, gok parbatuna na jeges. Hape anggo saonnari marhite sora na mangaronggur giot tipulkononKu ma sude rantingna i jana Hututungi angka bulungna i.

¹⁷Au do na pajongjong Israel dohot Juda, Au TUHAN Na Markuaso tapi anggo saonnari madung Husangkapi laho parohon hamamago tu halahi. Halahi sandiri do mangalap-alapi sudena i, patunda ni hasalaan ni halahi; dihaulkon halahi haul tu Baal, hara ni i do umbaen na gabe muruk Au.”

¹⁸Dipaboa TUHAN ma tu au taringot tu sangkap na jahat sian angka musungki maradopkon au.

¹⁹Songon biri-biri na so mardongan biar do au na ditogu tu panyambolan. Nada huboto hapengani au do na giot honaan ni halahi di angka sangkap na jahat i. Didok halahi, “Tole ma hita taba bona ni hayu on dompak ra dope marbatu; tabunu ma i anso dihalupahon halak goarnia.”

²⁰Dung i martangiang ma au, “Ale TUHAN Na Markuaso, Ho do panguhum na tigor; Ho do na manguji pikiran dohot roha ni jolma. Tu Ho do Hupasahat parkarongkon; sugari nian tarbaen au ma manyaksihon balos ni angka parange ni jolma on.”

²¹Anggo halak Anatot,[5] giotna mate ma au. Didok halahi do, “Muda sai dipupu ho do palaluhon angka tona ni TUHAN tu hami, bunuonnami noma ho.”

²²Jadi hara ni i, didok TUHAN Na Markuaso i ma, “UhumanKu ma halahi! Marmatean di parporangan ma angka doli-doli ni halahi; angka dakdanak ni halahi mate tangkuraparon.

²³Madung Hubuhul ari laho parohon hamamago tu angka halak Anatot, jana muda dapot hatihana i, sahalak pe nada adong na malua.”