Read Batak Angkola JEREMIA 14 Bible Online

JEREMIA 14 - Batak Angkola bible

JEREMIA 14

¹Didok TUHAN ma songon on tu au taringot tu logo ni ari na manangging,

²“Marsak ma roha ni Juda giot mate ne noma angka kotana. Marpayahan di tano angka halakna jana humolos be rohana. Pio-pio Jerusalem mangido diurupi.

³Angka pangoloi ni halak na mora disuru manjalahi aek sun tu dia; kehe halahi tu angka sumur hape aek madung abis sudena. Rumar ma parmuhatan na nioban ni halahi muli. Mardongan ganggu dohot dele ni roha ditutupi halahi bohina tanda ni arsakna.

⁴Nada ro udan jana tano mahiang mangkarogang; digupgupi partani bohina patunda ni arsakna.

⁵Ruput so adong be ursa boruboru pe ma kehe. Anakna na baru sorang ditadingkonsa di padang halongonan.

⁶Di puncu ni dolok jongjong sajo halode riar pede-pede matana i hara ni ruput na so adong; humosa-hosa songon sorigala.

⁷Pio-pio tu Au bangsongKu, ‘O TUHAN, dosanami tu hami manudu urupi ma hami hombar tu baga-bagaMu. Madung hami tadingkon Ho marpupu; tutu do na dung mardosa hami tu Ho.

⁸Hum sasada Ho do di Israel pos ni roha, na paluahon hami sian hasusaan. Hape biasi songon halak na asing Ho di tanonami, songon halak na hum saborngin maradian lalu kehe?

⁹Biasi Ho songon halak na dut roha; songon halak na gogo na so malo mangurupi? Tapi di tonga-tonganami do Ho, TUHAN! Ulang ma tadingkon hami bangsoMon!’ ”

¹⁰Salaho tu bangso i didok TUHAN, “Nada jop rohangKu paida-ida angka jolma i na sai manadingkon Au, jana na so ra mangarajai dirina. Nada ra be Au manghalupahon hasalaan ni halahi, uhumanKu do halahi hara ni dosa ni halahi.”

¹¹Didok TUHAN ma tu au, “Ulang pangido Au mangurupi angka jolma i.

¹²Haru pe puaso halahi, nangkon na ra Au manerge pio-pio ni halahi mangido tolong; jana haru pe dihaulkon halahi tu Au haul situtungon dohot haul gandum, nangkon na sonang rohangKu mida halahi. Tapi marhite porang, haleon dohot hamamasa ni nyae giot pangabisonKu halahi.”

¹³Dung i hudok ma, “O Tuhan DEBATA, diboto Ho do na dung didok angka panurirang tu rayat i bahaso na so adong giot ro porang sanga haleon, angke antong madung dijanjihon Ho, anggo di luat on sai na dumpang do hasonangan.”

¹⁴Tapi dialusi TUHAN ma, “Hata gabus do na dihatahon ni angka panurirang i mangasahon goarKu; nada Au marsuru halahi, jana nada adong Huparentahon tu halahi sanga manghobari Au tu halahi. Nada sian Au angka parnidaan na dihatahon ni halahi i; angka pangalaho na so marguna do na nilumbahon ni halahi i, i ma sian tubu-tubu ni rohana sandiri.

¹⁵Didok halahi ma mangasahon goarKu bahaso na so tondongon ni parporangan luat on sanga haleon, hape nada Husuru halahi mandok songon i. Au TUHAN, giot paboaonKu tu ho Jeremia, sanga aha na giot baenonKu tu angka panurirang na so Husuru i. BunuonKu ma halahi marhite porang dohot tangkuraparon.

¹⁶Angka jolma na manjagit barita ni halahi i pe bunuonKu do songon na tu halahi i. Ambungkonon ma angka bangke ni halahi tu angka dalan na di Jerusalem jana nada adong na mananomsa. Songon i ma baenanKu tu halahi dohot dongan sabagasna maradu angka dakdanakna. Angkon baenonKu ma halahi manaonkon parbatu ni hajahatan ni halahi.”

¹⁷Disuru TUHAN ma au paboahon arsak ni rohangku tu bangsoNa i. Angkon dokkononku songon on, “Tangis noma au torus-torusan, arian na borngin ilu maraburan. Dibaen banga do bugang ni bangsongku jana tarlobi do pardangolanna.

¹⁸Muda kehe au tu padang, huida ma angka bangke na nipangan ni porang. Di bagasan kota huida parkancitan; angka jolma na giot mate malean. Didalankon panurirang dohot malim langgamanna so diboto sanga aha na nipambaenanna.”

¹⁹Na dung situtu ma he ale TUHAN ditulak Ho Juda jana na mangingani Sion di Ho hagigian ni roha? Biasi jabat songon i gogona pamukulMu di hami lopus nada tarpamalum be hami? Nada marguna hami jalahi hadamean, nada marguna be diarop rohanami hamaluman, angke hum na mangasa gogo do na masa.

²⁰Ale TUHAN, hami oku do dosanami dohot dosa ni ompunami. Tutu madung mardosa hami tu Ho.

²¹Ulang ma tulakkon hami hara ni goarMu jana ulang ma pabile habangsa hamuliaonMu Ingot ma janjiMu tu hami, ulang ma nian sundati i.

²²Adong ma he lakna na bisa parohon udan sian tonga-tonga ni debata gana-ganaan ni angka bangso i? Sanga tarbaen langit i ma lakna paporkon udan? Hum Ho do ale TUHAN, Debata na hami haporsayai, na bisa mambaen sasudena i!