Read Batak Angkola JEREMIA 15 Bible Online

JEREMIA 15 - Batak Angkola bible

JEREMIA 15

¹Didok TUHAN ma tu au, “Indada ra Au maribo ni roha mida bangso on, haru pe jongjong dison si Musa dohot si Samuel mangido ibo ni roha sian Au tu halahi. Suru ma kehe bangso on; nada jop rohangKu paida-ida halahi.

²Muda disapai halahi tu ho, sanga na tu dia halahi kehe, songon on ma dokkon alusna, ‘Didok TUHAN, na ditontuhon parmatena hara ni nyae padiar ma mate hara ni nyae. Na kehe tu hamatean, tu hamatean ma! Na kehe tu podang, tu podang ma! Na kehe tu tangkuraparon, tangkuraparon ma! Na kehe tu tabanan, tu tabanan ma!’

³Au TUHAN, madung Hutontuhon opat pangalaho na jorbut giot masa tu halahi; marmatean ma halahi di parporangan, sarat-saraton ni anjing ma bangke ni halahi, papanganan ni unggas jana pangabison ni binatang panyoro.

⁴BaenonKu ma manyikur sandok bangso na di tano on marnida halahi. Patunda ni parbuatan ni si Manase anak ni si Hiskia ma Hubaen sudena i, i ma pangalahonia di Jerusalem dompak na gabe raja ia di Juda.”

⁵Didok TUHAN do, “O hamu halak Jerusalem, ise ma he maribo roha tu hamu? Ise ma he na marsak rap dohot hamu? Ise ma na ra maradian manyapai na masa tu hamu?

⁶Madung ditulak jana ditadingkon hamu Au, hara ni i Huondamkon botohonKu laho mangabisi hamu. Ma pola loja Au mangorom muruk ni rohangKu.

⁷Hupiari ma halahi dohot anduri di sude inganan di luat on. BaenonKu ma bangsongKu agoan anak, jana pangabisonKu halahi, harana inda maruba halahi sian pangalahona.

⁸Gok ma na mabalu di tanomunu umbahat sian horsik na di topi ni laut. ParoonKu ma tu angka ina dohot na poso pambunu di tonga ari. Ompot Huparo tu halahi biar dohot hagogotan.

⁹Markancit ma ina na dung pitunoli tubuan anak, hosana mangkip-angkip. Madung manggolap mataniari disia di tonga ari maila ma ia jana heput. Na tinggal sian halahi lehenonKu ma tu podang di jolo ni musuna songon i ma didok TUHAN.”

¹⁰Na sial ma da au on! Tu aha do umbaen na ditubuhon dainang au? Angkon martongkar jana martangkangi au dohot sandok jolma na adong di luat on. So jungada au painjamkon sanga manginjam, hape haru songon i pe sude jolma mamurai au.

¹¹O TUHAN, muda na so denggan do tutu hudalankon karejongku, jana nada huondihon angka musungku di joloMu taran marsak jana susa halahi, sai tulus ma nian bura ni angka jolma i. (

¹²Nada adong halak na tarbaen mamonggolkon bosi, lumobi bosi na sian Utara na dung marcampur dohot tumbaga.)

¹³Didok TUHAN ma tu au, “TongosonKu ma musu laho maroban sinadongan dohot arta ni bangsongKu songon uhuman hara ni angka dosa na nipambaenan ni halahi di ganop inganan.

¹⁴Giot baenonKu noma halahi gabe hatoban ni musu ni halahi di tano na asing na so ditanda ni halahi, angke madung gurgur murukKu songon api na marjimbur-jimbur jana na so ra mintop.”

¹⁵Dung i hudok ma, “Diboto Ho do ale TUHAN. Ingot ma au jana urupi. Baloskon ma tu halahi na manyosak au. Ulang mabahattu sobarMu maradopkon halahi gabe sanga lalu dibunu halahi au. Ingot ma antong, hara ni Ho do da umbaen na marlayas au.

¹⁶Muda marsuo au dohot angka hataMu, gabe hutangihon ma i gabe hasonangan do di au hataMi, jana gabe jop ni rohangku. Angke madung dibaritahon tu au goarMi, ale TUHAN Na Markuaso.

¹⁷Sai giot oloanku do Ho, jadi hara ni i nada hupasayang hatihangku dohot-dohotan martata-tata jana margonjak-gonjak rap dohot angka jolma, tapi mamunjung do au mardongan pangkilalaan na muruk.

¹⁸Biasi dehe sai torus au marhancit? Biasi banga gasangku jana nada marnamalum? Betak na giot lebak do au baenonMu songon batang aek na mahiang di ari logo?”

¹⁹Dialusi TUHAN ma, “Muda mulak ho, jagitonKu do ho mangulahi. Jana gabe naposongKu ho muse. Muda dibaritahon ho angka pangalaho na marguna jana nada hum hata-hata sajo, jadi gabe naposongKu ma ho mangulahi. Marroan ma angka jolma tu ho mangulahi.

²⁰BaenonKu ma ho songon benteng tumbaga maradopkon halahi. Porangan ni halahi ma ho, tapi nada tartaluhon halahi. DongananKu ma ho jana jagohononKu anso malua ho.

²¹PaluaonKu do ho sian kuaso ni angka jolma na jahat jana na kejam. Au TUHAN, madung mandok songon i.”