Read Batak Angkola JEREMIA 16 Bible Online

JEREMIA 16 - Batak Angkola bible

JEREMIA 16

¹Didok TUHAN ma mangulahi tu au,

²“Ulang ho mambuat boru dohot mardakdanak di inganan on.

³Hupaboa pe tu ho sanga aha na giot tarjadi tu angka dakdanak na sorang dison dohot tu simatobangna.

⁴Marmatean do halahi hona nyae na mambaen mate, jana marmatean ma halahi di parporangan sanga mate tangkuraparon. Sahalak pe nada adong na manangisi halahi sanga na manguburkonsa. Marampar do bangke ni halahi songon rompak-rompak di tano i, jana dipapangani unggas ma i dohot angka binatang.

⁵Ulang ho kehe tu bagas ni halak na hatiha marsak, ale Jeremia. Ulang ho dohot marsak hara ni sanga ise pe. Nada pasupasuonKu be bangsongKu dohot hadamean jana indangkon na ra be Au patuduhon holong ni roha sanga ibo ni rohangKu tu halahi.

⁶Marmatean ma halak na kayo dohot halak na pogos di luat on jana nada adong halak na manguburkon halahi. Sahalak pe nada adong na mamparkanciti dirina sanga mancukur uluna songon tanda ni arsak roha ni halahi.

⁷Nada adong muse na giot mambaen pangapulion laho mangapoi halak na marsiluluton. Nada adong halak na dohot mararsak ni roha, haru pe tu halak na agoan ama sanga ina.

⁸Ulang ho masuk tu bagas ni halak na topet marpesta. Ulang ho mangan sanga minum dohot halahi.

⁹Tangihon tangkas sanga aha na giot dokkononKu tu ho. Au TUHAN Na Markuaso. AntahonKu ma sora jop ni roha dohot hamogaan dohot hariburan ni pesta ni na marbagas. Idaon ni angka jolma na mangolu saonnari do pangalaho i tarjadi.

¹⁰Muda dipabolkas ho sudena on tu halahi, sapa-sapa ma halahi sanga hara ni aha umbaen na ra Au manguhumi halahi songon i boratna. Sapa-sapa ma halahi sanga aha hasalaan dohot dosa ni halahi maradopkon Au TUHAN Debata ni halahi.

¹¹Paboa ma tu halahi na Hudokkon songon on, ‘Madung ditadingkon ompumunu Au laho marsomba jana mangoloi tu angka debata. Dipasiding halahi do Au jana nada ra halahi mangoloi angka TonangKu.

¹²Hape jumahat dope na nibaenmunu. Na jogal do rohamunu jana rohamunu na jahat i do diparrohahon hamu. Nada ra hamu mangoloi Au.

¹³Hara ni i, paorotonKu noma hamu sian luat on jana buangonKu tu sada luat na asing situtu di hamu dohot di ompumunu. Anggo disi arian na borngin mangoloi tu angka debata na leban noma hamu, jana nada maribo ni roha be Au mida hamu.’ ”

¹⁴Didok TUHAN, “Ro do hatihana, nada marsumpa be jolma mangasahon Au Debata na mangolu, na maroban halak Israel ruar sian Mesir,

¹⁵tapi mangasahon Au Debata na mangolu, na maroban halak Israel ruar sian sada luat na di Utara dohot sude luat na asing sanga na di dia halahi Hupaserak. ObanonKu ma halahi mangulahi mulak tu bona bulu ni halahi, luat na dung Hulehen tu ompu ni halahi.”

¹⁶Didok TUHAN ma, “Giot piohononKu bahat halak parihan laho manangkupi angka jolma on. Dung i piohononKu ma bahat halak parburu laho marburu halahi di sandok dolok dohot partoran, dohot di angka liang ni dolok batu.

¹⁷Huida do sude na nibaen ni halahi. Nada adong na buni di Au; angka dosa ni halahi pe Huida do.

¹⁸BaloskononKu ma dosa dohot hajahatan ni halahi i marhite uhuman dua lompit, hara ni na dung hodar dibaen halahi tanongKu marhite gana-ganaan na bahat na so marhosa songon bangke.”

¹⁹O TUHAN, Ho do na mangondihon au dohot na margogoihon au; diurupi Ho do au taran di hagogotan. Marroan ma angka bangso sian ujung ni tano on tu Ho jana dokkononna ma, “Hum debata na so tutu jana na so marguna do debata ni ompunami.

²⁰Tarbaen jolma ma he mambaen debatana sandiri? Bia ma pambaen ni i! Pasti nada Debata na nibaenna i.”

²¹“Hara ni i boto ma, paboaonKu ma tu halahi, sanoli on angkon paboaonKu ma tu halahi kuasongKu dohot hagogoonKu, anso diboto halahi bahaso TUHAN do goarKu.”