Read Batak Angkola JEREMIA 18 Bible Online

JEREMIA 18 - Batak Angkola bible

JEREMIA 18

¹Didok TUHAN ma tu au,

²“Kehe ma ho tu bagas ni sitopa hudon; disi ma Hupalalu tonangKu tu ho.”

³Jadi kehe au antong tu bagas ni sitopa hudon jana huida ma ia topet markarejo di pangordongan.

⁴Muda hurang denggan hudon na dikarejohonnia i, gabe dikarejohon ia ma i mangulahi gabe hudon na asing, hombar tu giot ni rohania.

⁵Dung i disuru TUHAN ma au mandok tu halak Israel,

⁶“O hamu bangsongKu, na so tarbaen Au ma he lakna tu hamu songon na nibaen ni sitopa hudon i tu tano liatnia i? Songon tano liat di tangan ni sitopa hudon i, songon i do hamu di tanganKu.

⁷Muda dapot di sada hatiha giot Huputuskon laho mangarampas, mangarumpakkon dohot mangaroncohon sada bangso sanga harajaan,

⁸hape muba roha ni bangso i sian dosana, jadi gabe Husundati do nietKi.

⁹Alo ni i muse, muda Huputuskon laho pajongjongkon sanga patoguhon sada-sada bangso sanga harajaan,

¹⁰hape nada mangoloi bangso i tu Au muse, lalu mambaen na jahat, sundatanKu do niet ni rohangKi.”

¹¹Didok TUHAN ma tu au, “Saonnari paboa ma tu angka halak Juda dohot tu halak na mangingani Jerusalem paboa na mambaen sangkap do Au saonnari laho mangalo halahi, dohot pasidungkon uhuman tu halahi. Suruhon ma anso diantak halahi parngoluon ni halahi na mardosai i jana dipadenggan halahi pangalaho dohot parbuatan ni halahi.

¹²Tapi alusan ni halahi ma, ‘Aha guna ni i? Aha sundatna muda giot sai tongtong hami ihutkon hagiotnami na jahat i?’ ”

¹³Didok TUHAN ma, “Sapai ma tu ganop bangso, sanga na unjung tarjadi songon on. Madung dibaen halak Israel pangalaho na jorbut i!

¹⁴Na so ra mantak do salju sian dolok batu na di Libanon. Nada jungada mahiang aek na borgo na mardalan di partoran.

¹⁵Hape madung dihalupahon bangso i anggo Au, jana manutung dupa halahi tu gana-ganaan. Tartuktuk halahi di dalan narobi na angkon siboluson ni halahi, gabe manyimbil tu dalan na so dipahornop.

¹⁶Madung dibaen halahi luat on gabe inganan na jorbut jana gabe sihata-hataan sapanjangna. Sandok halak na mamolus marsiupirkon uluna be hara ni jorbut ni pangkilalaanna.

¹⁷Songon abu na niombuskon ni alogo Habincaran, songon i ma giot paserahonKu bangsongKi di jolo ni musuna, muda ro parmaraan, giot hudukkononKu noma halahi jana nada urupanKu halahi. Sanga na bia pe, nada urupanKu be halahi!”

¹⁸Didok halahi ma, “Tole ma martahi hita mangalo si Jeremia. Haru so adong pe ia laing na adong do angka malim na mangalehen pangajaran, laing na malo do angka halak na bisuk mangalehen sipaingot; jana laing tarbaen angka panurirang do palaluhon angka tona ni Debata tu hita. Beta ma hita aduhon ia tu paruhuman jana nada be patangi-tangionta angka hatania.”

¹⁹Jadi martangiang ma au, “O TUHAN, tangihon ma tangiangkon parrohahon ma sanga na aha na nidok ni musungku taringot tu au!

²⁰Patut ma he baloskonon hadengganan dohot hajahatan? Hape madung dihuar halahi godung anso madabu au tu bagasan. Ingot ma na dung huondihon halahi di adopanMu anso ulang muruk Ho tu halahi.

²¹Hara ni i, padiar ma mate tangkuraparon angka dakdanak ni halahi sanga mate dipangan podang. Padiar ma angka dadaboru ni halahi agoan halaklahi dohot dakdanakna; padiar ma marmatean angka halaklahi baenon ni nyae masa jana angka doli-dolina marmatean di parporangan.

²²Suru ma tompu ro angka panyamun tu bagas ni halahi anso mangangguhi halahi hara ni songgotna. Madung dihuar halahi godung anso madabu au tu bagasan, jana ditaon halahi jorgong laho manangkup au.

²³Tapi diboto Ho do ale TUHAN sasude na nitahi ni roha ni halahi laho mamatehon au. Hara ni i, ulang be ampuni halahi; ulang sesa hasalaan ni halahi. Potuk ma halahi lopus dabu. Maralo ma Ho tu halahi di bagasan muruk ni rohaMu.”