Read Batak Angkola JEREMIA 19 Bible Online

JEREMIA 19 - Batak Angkola bible

JEREMIA 19

¹Disuru TUHAN ma au kehe manobusi kendi, dung i angkon piohononku piga-piga halak hatobangon dohot deba malim na tobang-tobang,

²anso rap hami kehe tu Rura Hinom mamolus sian Pintu Horbangan Beling. Angkon disi ma paboaonku tonaNia i.

³Dongkon ma, “Tangihon ma hata ni TUHAN, ale raja-raja ni Juda dohot rayat Jerusalem! Songon on ma hata ni TUHAN Na Markuaso, Debata ni Israel: Satutuna paroonKu ma parmaraan tu inganan on, gabe marnginging ma pinggol ni halak na umbegesa.

⁴Angke madung ditadingkon halahi Au, madung dilehen halahi inganan on tu debata na asing, jana madung manghaulkon haul situtungon halahi tu debata na asing i. Na so tinanda ni ompu ni halahi dohot angka raja ni Juda. Madung dihodari halahi muse inganan on marhite mudar ni halak na so marsala.

⁵Madung dipajongjong halahi langgatan pamelean tu Baal laho manutungi anak ni halahi gabe haul situtungon tu Baal, hape nian so jungada Huparentahon sanga Huhatahon songon i jana nada jungada torbit dirohangKu si songon i.

⁶Jadi hara ni i dapot do i hatihana nada goaron be inganan on Tofet sanga Rura Hinom tapi Rura Panyambolan.

⁷SundatanKu ma di inganan on tahi ni halak Juda dohot Jerusalem. PadiaronKu ma halahi rumpak baenon ni podang ni musu, baenon ni tangan na giot mambuat hosa ni halahi. PadiaronKu ma bangke ni halahi dipapangani angka unggas na di langit dohot angka binatang na di tano on.

⁸BaenonKu hamamago na mansai jorbut tu kota on, anso sude halak na mamolus sian i tarsonggot jana mangupir.

⁹Hobuhon ni musu ma kota on jana manggogo ma halahi mamunu halakna. Hara ni jebuna panghobukna i jabat marsipanganan angka jolma na di bagasan kota i, salang angka dakdanakna sandiri pe tehe panganonna.”

¹⁰Dung i disuru TUHAN ma anso hutaporkon kendi i di jolo ni angka halak na mangihutkon au.

¹¹Angkon dokkononku tu halahi na didokkon TUHAN Na Markuaso i songon on, “Giot sego-segoonKu ma bangso on dohot kota on lopus songon kendi na masarsar i na so tarpauli be mangulahi. Kuburkonon ni halak ma angka bangke ni halahi di Tofet, hara ni na so adong be inganan pananomanna na asing.

¹²Giot baenonKu kota on dohot halak na manginganisa songon Tofet.

¹³Sude bagas na adong di Jerusalem dohot sude bagas ni angka raja ni Juda gabe hodar ma i songon Tofet; angke madung ditutung halak di ginjang ni ganop bagas[6] i dupa tu angka debata langit, jana dipelehon anggur tu angka debata na asing.”

¹⁴Dung ditadingkon ia Tofet, i ma inganan na nisuru palaluonnia tona ni TUHAN i, kehe ma ia tu alaman ni Bagas Ni Debata jana jongjong ia disi, lalu dipaboa ma tu sandok halak,

¹⁵bahaso na nidok ni TUHAN Na Markuaso i Debata ni Israel songon on, “Giot paroonKu noma tu kota on dohot tu angka huta pagaran na humaliangsa sandok parmaraan na dung Husangkaphon humani, hara ni jogal ni rohamunu dohot na so ra hamu manangihon.”