Read Batak Angkola JEREMIA 21 Bible Online

JEREMIA 21 - Batak Angkola bible

JEREMIA 21

¹Diutus si Zedekia raja ni Juda ma tu au Malim Pashur anak ni si Malkia dohot Malim Zefanya anak ni si Maaseya. Disuru ia halahi laho palaluhon pangidoan tu au songon on,

²“Mangkobari ma jolo ho dohot TUHAN salaho tu hita, harana madung dihobuk si Nebukadnesar raja ni Babel rap dohot paranganna kotanta on. Betak na giot baenon ni TUHAN do hahomangan di hita, jana paksaonNa si Nebukadnesar manarik mundur parangannia.”

³Dung i ninna si Jeremia ma tu halahi, “Songon on ma dokkon hamu tu si Zedekia:

⁴Paboahon na nidok ni TUHAN, Debata ni Israel songon on, “Zedekia, pataluonKu ma paranganmi na topet marporang mangalo raja ni Babel dohot paranganna. PagukguhonKu ma angka sinjata ni tentaramu di tonga-tonga ni kota i.

⁵Au sandiri giot mamorangi hamu sagogongKu jana mardongan gilap ni murukKu.

⁶BunuonKu ma halak na mangingani kota on; bope jolma sanga binatang marmatean ma baenon ni nyae masa na jorbut.

⁷Ho dohot angka pagawemu maradu angka jolma na malua sian parporangan, tangkuraparon dohot nyae masa, padiaronKu sudena i hona tangkup baenon ni Raja Nebukadnesar dohot baenon ni angka musu na giot mamatehon ho. Bunuon ni si Nebukadnesar ma hamu sude nada adong ampunan dohot ibo ni rohana. Au TUHAN, mandok songon i.”

⁸Dung i disuru ma au mandok tu bangso i songon on, “Tangihon! Au TUHAN, mangalehen tu hamu sada sipilion: Dalan na manuju tu hangoluan sanga dalan na manuju tu hamatean.

⁹Ganop halak na tinggal di bagasan kota mate ma baenon ni podang, tangkuraparon sanga nyae masa. Tapi sanga ise na haruar laho tunduk tu halak Babel na mamorangi kota on, malua do halahi jana nada hona bunu.

¹⁰Madung Huputuskon do laho mangaroncohon kota on jana nada adong pangusayangna. Pasahaton noma kota on tu raja Babel; giot surbuonnia kota on lopus abis sudena. Au TUHAN madung mandok songon i.”

¹¹Disuru TUHAN ma au palalu tona on tu bagas ni raja ni Juda, pomparan ni si Daud, “Tangihon sanga aha na Hudok, Au TUHAN mandok. Parayak ma anso didalankon hatigoran ganop ari. Palua ma halak na hona incop sian tangan ni halak na mangincopsa. Muda nada songon i gabe gara ma murukKu songon api na so haintopan baenon ni hajahatan na nipambaenanmunu.”

¹³Satutuna gabe alomu ma Au, o kota na di ginjang ni rura, dolok batu di adaran; Au TUHAN mandok songon i, o hamu na mandok: Ise ma he na puluk ro tu hami jana ise ma he na puluk masuk tu inganannami?

¹⁴Tapi uhumanKu ma ho patunda ni parbuatanmu. SurbuonKu ma bagas godangmi, jana puntung muse ma sandok na adong di Humaliangna. Au TUHAN, madung mandok songon i.”