Read Batak Angkola JEREMIA 26 Bible Online

JEREMIA 26 - Batak Angkola bible

JEREMIA 26

¹Dung si Joyakim anak ni si Josia gabe raja di Juda,

²manigor didok TUHAN ma tu au, “Kehe ma ho jongjong di alaman ni BagasKu jana palalu ma tu halak Juda na ro marsomba tusi, sandok na Huparentahon tu ho sipalaluonmu tu halahi. Saotik pe ulang urahi.

³Betak na ra do bangso i manangihon, gabe mantak mambaen na jahat gabe Husundati rohangKu laho mangago halahi hombar tu pambaenan ni halahi na jahat i.”

⁴Disuru TUHAN ma au mandok tu halahi, “Au TUHAN, madung mamarentahon anso mangoloi hamu tu Au jana angkon dalan — kononmunu do angka aturan na dung Hulehen tu hamu.

⁵Angkon laing parrohahononmunu muse do hata ni naposongKu, i ma angka panurirang na sai marpupu Husuru tu hamu. Hape nada ra hamu mangoloi sanga aha na didok ni halahi.

⁶Anggo laing tong do hamu manangkang, baenonKu do bagas paribadatan on songon na Hubaen tu Silo,[9] lopus sandok bangso na satano on mamake goar ni Jerusalem on gabe bura.”

⁷Sude na hudokkon i di Bagas Ni Debata, dibege angka malim i angka panurirang dohot halak na bahat.

⁸Disi hupabotohon sude tona ni TUHAN songon na niparentahonNia i tu au, manigor ditangkup halahi ma au lalu marsurahi halahi, “Angkon mate ho!

⁹Papuluk-pulukkon ho mandok mangasahon TUHAN na giot songon Silo BagasNa on, dohot kota on roncohonon jana gabe lobu,” ning halahi. Dung i dirongomi halak na bahat i ma au.

¹⁰Di na tarboto tu angka pamimpin ni Juda na masa i, diompoti halahi ma haruar sian bagas godang ni raja i lalu kehe tu Bagas Ni TUHAN jana marjuguhan halahi di Pintu Horbangan Baru.

¹¹Didok angka malim ma dohot angka panurirang tu angka pamimpin dohot tu rayat i, “Patut do mate bayo on niuhuman, harana diparuar ia do angka hata na mangalo kota on. Hamu sandiri pe, madung mambege.”

¹²Dung i hudok ma, “TUHAN do da na marsuru au palalu tona mangalo Bagas Ni Debata dohot kota on songon na nibegemunu.

¹³Hara ni i pauba hamu ma parngoluonmunu dohot angka pangalahomunu; oloi hamu ma TUHAN Debatamunu anso disundati Ia nietNia laho mangago hamu.

¹⁴Anggo taringot tu diringku, tutu do di tanganmunu kuaso laho patupahon sanga aha sajo marguru tu hagiotmunu.

¹⁵Tapi ingot hamu ma, muda dibunu hamu au, hamu noma dohot halak kota on mananggung hasalaan hara ni pamunuon maradopkon halak na so marsala. Angke TUHAN do na marsuru au laho palaluhon sipaingot i tu hamu.”

¹⁶Jadi gabe didok angka pamimpin dohot rayat i ma tu angka malim, dohot angka panurirang i, “Mangasahon goar ni TUHAN Debatanta do bayo on mangkatai; nada patut ia mate niuhuman.”

¹⁷Dung salpu i, ro ma tu jolo piga-piga halak na tobang-tobang mandok tu angka jolma na marlagut disi,

¹⁸“Taran si Hiskia raja di Juda dipalalu Panurirang Mika na sian Moreset do hata on sian TUHAN Na Markuaso i, ‘Ombahon ma Sion songon ladang, Jerusalem gabe timbunan ni na marsegoan jana Dolok Ni Bagas Ni Debata gabe harangan.’

¹⁹Hape nada dibunu Raja Hiskia dohot rayat i si Mika. Mur mabiar roha ni si Hiskia tu TUHAN jana mangido ibo ni roha ia. Jadi gabe ditarik TUHAN mangulahi ondam-ondamNia i laho mangago halahi. Jana saonnari pe, ra dehe hita mangalapi hamagoan godang tu dirinta?”

²⁰Jungada muse do adong sada halak nari na mangkuling mangalo kota dohot bangsonta on mangasahon goar ni TUHAN, songon na hubaen on. Si Uria goar ni bayo i, anak ni si Semaya na sian Kiryat-Jearim.

²¹Di na nibege ni Raja Joyakim rap dohot angka perwirania dohot angka na marpangkat di harajaan i angka pandohan ni si Uria i, diusahahon ia do mamunu si Uria. Tapi tarbege ma i tu si Uria, gabe mabiar ma ia lalu kehe ia gilo tu Mesir.

²²Tapi disuru Raja Joyakim ma si Elnatan anak ni si Akbor rap dohot deba nari halak na asing kehe tu Mesir mangalap si Uria.

²³Dung i dioban halahi ma ia mulak mangulahi tu Raja Joyakim. Dung i disuru raja i ma anso dibunu ia, jana diambungkon bangkena i tu kuburan ni halak na bahat.

²⁴Hape saonnari hara ni pangurupion ni si Ahikam anak ni si Safan, au si Jeremia nada dipasahat tu rayat i anso dibunu.