Read Batak Angkola JEREMIA 27 Bible Online

JEREMIA 27 - Batak Angkola bible

JEREMIA 27

¹Nada sadia honok dung gabe raja si Zedekia[10] anak ni si Josia di Juda, disuru TUHAN ma au

²mambaen tali-tali dohot auga sian hayu, lalu hupasang di tangkuhukku.

³Dung i disuru TUHAN Na Markuaso i, Debata ni Israel ma au palaluhon tonaNia tu angka raja ni Edom, Moab, Amon, Tirus dohot Sidon, marhite angka suruan ni halahi na ro tu Jerusalem manopot Raja Zedekia. On ma tona ni TUHAN i,

⁵“Marhite hagodangan ni kuasongKu dohot hagogoanKu, madung Hutompa tano dohot jolma dohot sandok binatang jana tarlehen Au do i sanga na tu ise giotKu.

⁶Au ma da na pasahatkon bangso on sudena tu bagasan kuaso ni naposongKu si Nebukadnesar raja ni Babel i. Salang dohot binatang pe Hupasahat do tusia sirajaanna.

⁷Mangoloi tusia do sandok bangso, tu anaknia dohot tu pahompunia lopus dapot hatihana madabu bangsonia i. Anggo di hatiha i mangoloi ma bangso Babel tu angka bangso na gogo dohot tu angka raja na godang.

⁸Tapi anggo bangso sanga harajaan na so ra tunduk tu si Nebukadnesar, uhumonKu do i marhite porang, tangkuraparon, dohot nyae lopus ujungna tunduk bangso i tusia.

⁹Ulang patangi-tangi hamu angka panurirang, sanga na ise pe tehe na mangorai hamu tunduk tu raja ni Babel, haru pe dioku halahi na dung manjagit panuturion halahi sian nipi, angka tondi na so niida, sanga marhite gogo ni hadatuon.

¹⁰Na paoto-otohon hamu do i lopus dioban hamu dao sian tanomunu. UsironKu ma hamu sian tanomunu jana mago ma hamu.

¹¹Tapi anggo bangso na ra tunduk jana mangoloi tu raja ni Babel, padiaronKu do maringanan di bona buluna sandiri, jana martani disi. Au TUHAN, madung mandok songon i.”

¹²Hupalalu muse ma songon i tu si Zedekia raja ni Juda. Hudok ma, “Manyora ma da tu raja ni Babel. Tunduk ma da ho tusia dohot tu bangsonia i, anso malua raja i.

¹³Madung didokkon TUHAN, sanga bangso dia na so tunduk tu raja Babel mate ma baenon ni porang, tangkuraparon dohot nyae masa. Biasi ra raja i dohot rayat songon i parmatena?

¹⁴Ulang dipatangi-tangi raja i angka panurirang na mangorai raja i tunduk tu raja ni Babel, angke na paoto-otohon raja i do halahi.

¹⁵Didok halahi, manghatai halahi mangasahon goar ni TUHAN, hape na margabus do halahi, TUHAN sandiri mandok, nada Ia marsuru halahi. Hara ni i giot sarsarkononNia noma raja i jana matehononNa rap dohot angka panurirang na margabus tu raja i.”

¹⁶Dung i hupaboa ma tu angka malim dohot tu sude rayat i na nidok ni TUHAN songon on, “Ulang patangi-tangi hamu angka panurirang na mandok na giot obanon ma santongkin nari angka barang-barang na di BagasKu mulak sian Babel. Pargabus do halahi.

¹⁷Ulang patangi-tangi hamu i. Manyora ma hamu tu raja ni Babel anso malua hamu. Aha ma he gunana maronco kota on?

¹⁸Anggo na tutu do halahi panurirang, jana na dung manjagit tona sian Au, angkon pangidoon ni halahi saonnari tu Au, TUHAN Na Markuaso, anso ulang dioban tu Babel angka barang-barang na adong dope di BagasKu dohot di bagas godang na di Jerusalem.

¹⁹Angke Au TUHAN Na Markuaso, Debata ni Israel, madung mamutuskon angkon obanon sude barang-barang i tu Babel, jana hot noma i disi lopus Huparrohahon mangulahi. Di hatiha i baru pe anso Huoban mangulahi tu inganan on. Au TUHAN, madung mandok songon i.” Angka barang-barang na adong dope di Bagas Ni TUHAN i, i ma: angka tiang, bak tumbaga, angka kareta, dohot deba nari barang na asing nampuna ni Bagas Ni TUHAN. Nada dohot angka barang i dioban tu Babel di na hona oban ni Raja Nebukadnesar tu Babel si Joyakin anak ni si Joyakim raja ni Juda dohot angka hatobangon ni halak Juda.