Read Batak Angkola JEREMIA 3 Bible Online

JEREMIA 3 - Batak Angkola bible

JEREMIA 3

¹Didok TUHAN, “Muda disirangkon halaklahina sada dadaboru, lalu marbagas anak boru i tu bayo na asing, nada tola be halaklahina i humani mambuat dadaboru i mangulahi gabe ripena, angke pasego-segohon do pangalaho na songon i di luat on. Antong ho ale Israel, madung bahat sajo haholongan ni rohamu, biasi dope puluk ho mulak tu Au?

²Manaili ma jolo ho tu ginjang, tu puncu ni angka dolok! Na dia dope inganan i na so unjung ditopot ho laho marmainan? Songon halak Arab na juguk di padang halongonan, songon i ma ho juguk di topi dalan painte-intehon halak na giot manandangi ho. Gabe hodar luat on dibaen ho hara ni parmainanmu.

³Patunda ni i do gabe so aek sian langit, jana udan na somal di musimna nada unjung ro. Suman do ho tu siboru panggampang na so umboto hahaila.

⁴Saonnari didok ho tu Au, Amangmu Au, na holong do rohangKu di ho mamungka sian hamenehanmu.

⁵Salolot ni lolotna dehe Ia giot muruk sanga mambaen hosom satorusna? Songon i ma didokkon ho tapi dipupu ho mangkarejohon na jat.”

⁶Di na gabe raja si Josia, didok TUHAN ma songon on, “Madung he diida ho na nibaen ni Israel dadaboru na so setia i? Di sandok dolok na gincat dohot di toru ni sude hayu na rumbun, marmainan ia.

⁷Didok rohangKu do: Dung dikarejohon ia sudena i, mulak ma ia nian tu Au, tapi nada mulak ia. Madung diligi Juda sude na i, ibotonia dadaboru panggampang i.

⁸Diligi ia, hara ni na manggampang ia madung Husirangkon Israel, dadaboru na murtad i, jana mangalehen tusia surat sirang: Tapi Juda, ibotonia dadaboru na so setia i nada mabiar, jana ia sandiri pe kehe do manggampang.

⁹Marhite panggampangannia i dipahodar ia tano i jana markarosuan marhite na manyomba hayu dohot batu.

¹⁰Dung dipambaeni sudena i, dipaula-ula Juda na so setia i ma mulak tu Au, tapi nada sian bagasan rohania na giot mulak i. Au, TUHAN, madung mandok songon i.”

¹¹Dung i muse dipaboa TUHAN ma tu au, haru pe na dung dihudukkon Israel Ia, hape dumenggan dope Israel ulang pado Juda na so setia i.

¹²Disuru TUHAN ma au kehe tu Israel lalu mandok songon on, “O ale Israel na so setia, mulak ma ho tu Au! Gok ibo ni roha do Au jana nada sapanjangna Au muruk tu ho.

¹³Sandok okui sajo ma paboa na marsala dohot na dung mangalo ho tu TUHAN, Debatamu. Okui ma na dung dipataridahon ho holong ni rohamu maradopkon debata ni angka bangso na asing di toru ni ganop hayu na rumbun, dohot na so dioloi ho angka na Huparentahon. Au, TUHAN, madung mandok songon i.”

¹⁴“O hamu bangso na so setia, mulak ma hamu tu Au! Au do nampuna hamu. BuatonKu noma hamu, sahalak sian ganop kota, dua halak sian ganop partubu, jana obanonKu hamu mangulahi tu Dolok Sion.

¹⁵LehenonKu ma di hamu angka pamimpin na burju mangoloi Au. Pimpinon ni halahi ma hamu mardongan habisuhon bope marhite parbinotoan.

¹⁶Jadi muda dung mabahat hamu di luat on, nada taringotan ni halak be mangulahi salaho tu Poti Parjanjian. Nada pikiran sanga ingot-ingoton ni halahi be i, nada be tehe porlu i di halahi sanga pe mambaen Poti Parjanjian na asing.

¹⁷Goaron ma Jerusalem di hatiha i ‘Habangsa ni TUHAN’, jana marlagut ma di kota on sandok bangso laho manyomba Au. Nada be ihutkonon ni halahi giot-giot ni roha ni halahi na oto bope na jat i.

¹⁸Mardomu ma Israel dohot Juda, jana rap ro ma halahi sian tano habuangan na di Utara. Mulak ma halahi tu luat na dung Hupasahat tu ompu ni halahi gabe tano pusako.”

¹⁹Didok TUHAN, “O ale Israel, por do rohangKu manjagit ho songon anakKu, dohot mangalehen tu ho tano hasonangan, luat na jumeges di sandok tano on. Por do rohangKu didok ho Au Amangmu, jana nada lari be ho sian Au.

²⁰Hape songon ripe na so setia, ho pe na so setia do tu Au. Au TUHAN, madung mandok songon i.”

²¹Tarbege do sora ni na gaor di puncu ni angka dolok; i ma sora ni halak Israel na martangisan jana mangido-ido hara ni na dung mardosa halahi jana lupa tu TUHAN Debata ni halahi.

²²O hamu sude na manadingkon Tuhan, mulak ma hamu! PamalumonNia ma hamu, jana baenonNia ma hamu setia. Didok hamu, “Olo da, saonnari ma hami ro tu TUHAN, angke Ia do antong Debatanami.

²³Nada adong gunana marsomba gana-ganaan hami di puncu ni angka dolok! Hum sian TUHAN Debatanami do pangurupion anggo tu Israel.

²⁴Anggo na manyomba tu Baal, gana-ganaan na pailahon i hum na mambaen hamamago do i tu angka dakdanaknami dohot tu lombu maradu biri-biri, i ma sasudena na dung dikarejohon ni ompunami mamungka sian narobi.

²⁵Jadi padiar ma maila hami jana padiar ma marlayas hami. Angke madung mardosa hami dohot ompunami maradopkon TUHAN Debatanami, jana nada jungada hami oloi angka parentaNia.”