Read Batak Angkola JEREMIA 31 Bible Online

JEREMIA 31 - Batak Angkola bible

JEREMIA 31

¹Didok TUHAN ma, “Dapot do i hatihana gabe Au Debata ni sude marga ni Israel, jana halahi gabe bangsongKu.

²Hupatuduhon holong ni rohangKu di padang halongonan tu halahi na dung malua sian hamatean. Dompak na manjalahi hademahan Israel,

³Hupatidahon do diringKu sian na dao tu halahi. O ale bangso Israel, sian najolo do sai holong rohangKu mida hamu, jana laing torus do tu joloan on giot patuduhononKu na holong rohangKu mida hamu.

⁴PadengganonKu ma mangulahi parngoluonmunu. Sanoli nari buatonmunu ma rapano jana manortor ma hamu marjop ni roha.

⁵Mambuka kobun anggur ma hamu di dolok na di Samaria jana putihon ni na manyuan ma batu ni anggurna.

⁶Tutu do dapot do i hatihana marsurak ma angka panjago ni kota ni partoran Efraim, ‘Beta hita manangkok tu Sion, mandapotkon TUHAN, Debatanta.’ ”

⁷Didok TUHAN do, “Marende ma hamu marjop ni roha di Israel bangsongKi, bangso na gumodang sian sandok bangso do i. Endehon hamu ma ende puji-pujian. ‘Na teba sian bangsoNa madung dipalua TUHAN.’

⁸Sian Utara Huoban halahi mangulahi; Hupalagut halahi sian angka ujung ni portibi. Halak na mapitung dohot na lumpu pe dohot do disi, songon i muse ina na baru horas dohot na giot di api. Giot marroan ma halahi sudena, songon bangso na godang tu luat on.

⁹Mardongan ilu-ilu mardalan halahi, Huapoi jana Huiring-iring halahi. Huoban halahi mamolus sian inganan na bahat aek, mamolus dalan na hornop na so tartuktuk patna be. Anggo di Israel songon ama do Au; Efraim ma anak panggoaran di Au.”

¹⁰Didok TUHAN do, “Tangihon hamu ma ale angka bangso! Palalu ma tonangKu tu bariba ni laut: BangsongKu na dung Hupaserakkon giot palagutonKu jana pasari-sarionKu songon parmahan na manjago biri-birina.

¹¹Madung malua Hubaen halak Israel sian bangso na gogo halahi Hupalua.

¹²Marroan ma halahi tu Dolok Sion jana marende disi marjop ni roha, hara ni sude na Hulehen tu halahi: gandum, miak, anggur dohot biri-biri. Tudos ma halahi tu kobun na tuk aekna, jana na so hurangan di bagi aha.

¹³Manortori ma disi angka bujing-bujing marjop ni roha bage. Na matobang dohot na poso, rap marmoga-moga do, dibaen giot lehenonKu tu halahi apo-apo. Hupauba arsak ni halahi gabe moga, hasusaan Hugonti gabe tua.

¹⁴PapuasonKu ma angka malim dohot panganon na marlobi-lobi; jana lehenonKu sude haporluan ni bangsongKu. Au TUHAN, Au do na mandok songon i.”

¹⁵Didok TUHAN ma, “Tarbege do di Rama sora ni andung dohot na holsoan maradu na tangis monggung-onggung. Ditangisi si Rahel do angka dakdanakna, nada haapoan patunda ni anakna na dung soada.

¹⁶Antak ma da na tangis i jana pahiang ilu ni matami! Nada magopo halolojamu tu dakdanakmi. Jagitonmu do tumbasna marmulahan do dakdanakmi sian tano ni musu.

¹⁷Adong do arop ni rohamu tu hatiha na ro; marmulahan do angka dakdanakmi mangulahi tu huta hagodanganna.

¹⁸Hubege do halak Israel mangkuling di bagasan arsak godang, ‘Ale Tuhan, tudos do hami tu lombu riar na so dipajinak hape diajar Ho do hami anso patu, saonnari madung rade hami mulak tu adopanMu. Antong, oban ma hami mangulahi, ale TUHAN, Debatanami.

¹⁹Madung hami hudukkon Ho tapi parbuatannami i hami solsoli do. Dung diuhumi Ho hami, mangunduk do ulunami hara ni arsaknami. Maila hami jana marbile dibaen mardosa taran poso dope.’

²⁰O Israel, ho do anak hasianKu, anak haholongan, tampuk ni pusu-pusungKu. Ganop Huondam ho sai lungun do rohangKu marningot ho. Gok ibo ni roha do giot baenonKu tu ho.

²¹Baen ma tanda ni dalan, jana baen ma parningotan jalahi ma dalan na nibolusmu hian. O ale Israel, mulak ma ho! Ulahi ma mangingani angka kotamu humani.

²²Sadia honok nari sai torus ganggu ho, ale dakdanak dadaboru na so setia tu Au? Madung Hutompa na imbaru di tano on, dadaboru mangondingi halaklahi.”

²³Didok TUHAN Na Markuaso i, Debata ni Israel, “Muda dung Huoban bangsongKu mangulahi tu tano ni halahi sandiri, tarbege muse ma di tano Juda dohot di angka kotana i dokkonon ni halak, ‘Sai dipasupasu TUHAN ma da, ho ale inganan hasintongan ho ale dolok na badia!’[11]

²⁴Maringanan ma halak di Juda dohot di angka huta na disi. Adong ma disi partani dohot parmahan na marmahani pahan-pahananna.

²⁵Angka na loja sian halahi giot pargogoanKu, jana pabutongonKu angka na garse hara ni na tangkuraparon.

²⁶Dokkonon ni halak ma di hatiha i, ‘Dung sinok au tarpodom, togar ma huhilala.’

²⁷Au, TUHAN mandok dapot do i hatihana gohanKu Israel dohot Juda markite-hite jolma dohot pahan-pahanan.

²⁸Songon panjagoonKu sahonokna on di halahi, i ma na giot mambutbuti dohot mangarumpakkon, mangaroncohon jana pamatehon halahi, laing songon i ma panjagoonKu, patoguhon jana mambangun halahi mangulahi, songon i ma hata ni TUHAN.

²⁹Anggo di hatiha i nada be dokkonon ni halak, ‘Simatobangna do mangankon batu ni hayu na ancom, hape anakna do ngiluan ipon.’

³⁰Tapi sanga ise mangankon parbatu na ancom, ia sandiri do na ngiluan ipon. Mate ma ganop halak hara ni dosana sandiri.”

³¹Didok TUHAN ma, “Dapot do i hatihana baenonKu parjanjian na imbaru tu halak Israel dohot Juda.

³²Tapi nada sarupa parjanjian i dohot parjanjian na Hubaen tu ompu ni halahi di na Hutogu halahi haruar sian Mesir. Haru pe Au songon halaklahi ni halahi, tapi digagai halahi do parjanjianKu dohot halahi.

³³On ma parjanjian na imbaru na giot baenonKu dohot halahi: BaenonKu ma angka aturanKu tu bagasan roha ni halahi, jana suratkononKu di ate-ate ni halahi. Au ma gabe Debata ni halahi, jana halahi gabe bangsongKu.

³⁴Sahalak pe sian halahi nada porlu be mangajari donganna laho mananda TUHAN. Angke sude halahi, na menek sanga na magodang, tandaonna ma Au. HalupahononKu ma angka hasalaan ni halahi, jana Huampuni angka dosa ni halahi. Au TUHAN, madung mandok songon i.”

³⁵Dipasingkop TUHAN do mataniari laho manorangi arian; bulan dohot angka bintang laho manorangi borngin. Digaor Ia laut i anso marombak galumbangna, TUHAN Na Markuaso i, i ma da goarNa.

³⁶“Satutuna, songon angka aturan on nada morot sian adopanKu, songon i ma pomparan ni Israel nada marnamantak gabe bangso diadopanKu salolot ni lolotna. Songon i ma didok TUHAN.

³⁷Sugari di sada hatiha bolas suhaton langit i, jana ojahan ni tano tarsihiri, di hatiha i ma tulahonKu Israel hara ni sude parbuatan ni halahi na jahat i. Au TUHAN, madung mandok songon i.”

³⁸Didok TUHAN, “Dapot do i hatihana, paulion mangulahi sude Jerusalem songon kotangKu, sian Palas-palas Hananeel na di Hasundutan lopus tu horbangan na di suhi-suhi.

³⁹Sian i ma batasna tu Tor Gareb, mangelgok ma i tu Goa.

⁴⁰Sude rura i, tanoman ni na mate i dohot inganan habuangan ni sirabun i, dohot sude kobun na di atas ni Batang aek Kidron lopus tu Horbangan kudo sabola Habincaran gabe badia ma i di TUHAN nada be rumpakkonon sanga roncohonon ni bagi ise kota i salolot-lolotna.”