Read Batak Angkola JEREMIA 33 Bible Online

JEREMIA 33 - Batak Angkola bible

JEREMIA 33

¹Dompak na ditahan au di alaman i, hujagit muse ma tona na asing sian TUHAN,

²na manjadihon tano dohot na manompa jana na mamayakkonsa di hapayahanna. Didok Ia,

³“Pio-pio ma ho tu Au, jadi gabe alusanKu ma; giot paboaonKu tu ho angka pangalaho na jeges-jeges jana na pahomang roha na so diboto ho dope.

⁴Au TUHAN, Debata ni Israel mandok, na giot hobuhon ma anggo kota Jerusalem jana disaroso lopus marumpak bagas godang ni raja Juda dohot angka bagas na di kota i.

⁵Parcuma do nialo halak Babel i, harana hum na pabahat-bahat bangke ni jolma do i lopus gok kotamunu, i ma angka na Humatehon di bagasan muruk dohot rimasKu maradopkon halahi. Nada ringkot be rohangKu mida kota on, hara ni angka jolma na disi na dung mambaen jahat.

⁶Tapi pasuangonKu do muse pangalaho ni kota on dohot halakna; margogo do halahi mangulahi. LehenonKu do tu halahi hasonangan dohot hadamean na sumurung.

⁷Sonang baenonKu Juda dohot Israel jana pasuangonKu halahi songon di mulana.

⁸Giot paiasonKu halahi sian angka dosa na dung dibaen halahi maradopkon Au; Huampuni angka dosa dohot pangalaho ni halahi na so ture.

⁹Gabe hamogaan dohot hagodangan ni rohangKu ma Jerusalem. Sandok bangso na di tano on gabe mabiar jana humitir gabe pasangap Au muda dibege halahi taringot tu sude hadengganan na Hubaen tu halak Jerusalem dohot taringot tu hadameon na Hulehen tu kota i.”

¹⁰Didok TUHAN ma, “Pandok ni halak, songon padang halongonan do inganan on, nada adong jolma sanga binatang maringanan dison. Tutu do nian na nidok ni halahi i, harana na dung rumar do sudena angka kota na di Juda dohot angka dalan na di Jerusalem; nada adong jolma sanga binatang na maringanan disi.

¹¹Tapi habegean ma mangulahi di angka inganan i sora ni jop ni roha dohot hamogaan maradu sora ni na haroan boru. Tarbege muse ma ende ni halak na maroban haul hatarimakasion tu bagasKu. Dokkonon ni halahi ma, ‘Mandok tarimakasi ma tu TUHAN Na Markuaso i, angke na burju do Ia jana hot do holong ni rohaNa i.’ Sonang ma baenonKu luat on songon di mulana. Au TUHAN, madung mandok songon i.”

¹²Didok TUHAN Na Markuaso i ma, “Nada diingani jolma sanga binatang luat na songon padang halongonan on. Tapi haru songon i pe adong do i muse di pudian ni ari angka padang hatubuan ni duhut inganan ni halak marmahani angka biri-birina.

¹³Di angka kota na di tano partoran di pat ni angka dolok, di tano Negeb, dohot di Luat Benyamin dohot di angka huta na adong humaliang Jerusalem, dohot di angka kota na di Juda, etongon ni halak ma bilangan ni angka biri-biri ni halahi. Au TUHAN, madung mandok songon i.”

¹⁴Didok TUHAN, “Dapot do i hatihana, patulusonKu janji na Hubaen dohot Israel bope dohot Juda.

¹⁵Anggo di hatiha i pilionKu ma sada raja na tigor sian pomparan ni si Daud. Padalanon ni raja i ma hatigoran dohot na sintong di sude luat.

¹⁶Paluaonna ma halak Juda dohot halak Jerusalem jana sonang baenon ngolu ni halahi. Goaron ma kota Jerusalem, ‘TUHAN do hatigoranta.’

¹⁷Au TUHAN, marjanji do Au paboa na tongtong adong sada raja di Israel sian pomparan ni si Daud;

¹⁸tongtong adong angka malim sian Marga Levi na markobasi tu Au dohot na manghaulkon haul situtungon, haul gandum dohot haul pahan-pahanan.”

¹⁹Didok TUHAN ma tu au,

²⁰“Madung Hupudun sada parjanjian dohot arian dohot borngin, anso tongtong ro di hatihana be arian dohot borngin; nada tarsoadahon be janji i.

²¹Laing songon i muse ma, madung Hupudun parjanjian dohot naposongKu si Daud, na mandok na giot adong sada sian pomparannia na gabe raja; jana madung Hupudun parjanjian dohot angka malim pomparan ni Marga Levi paboa na tongtong oloan ni halahi Au. Nada tarsesa be angka parjanjian i.

²²PabahatonKu ma pomparan ni naposongKu si Daud dohot angka malim sian Marga Levi lopus gabe sabahat ni horsik na di topi ni laut dohot sabahat ni bintang na di langit na so taretong bilanganna bahat ni halahi.”

²³Didok TUHAN ma tu au,

²⁴“Madung he diparrohahon ho angka hata-hata ni halak na mandok na dung Hubuang Israel dohot Juda, bangso na dua na dung Hutodo i? Layas diida angka jolma i bangsongKi jana nada dietong roha ni halahi be i songon sada bangso.

²⁵Tapi songon na Hubaen, Au TUHAN mambaensa, sada parjanjian na nipudun dohot arian dohot borngin, jana na mambaen aturan na manontuhon langit dohot tano,

²⁶laing songon i ma tongtong tioponKu parjanjianKu dohot pomparan ni si Jakob dohot naposongKu si Daud. TodoonKu ma sahalak sian pomparan ni si Daud laho mangarajai pomparan ni si Abraham, si Ishak dohot si Jakob. Maribo ni roha ma Au tu bangsongKu jana sonang halahi baenonKu.”