Read Batak Angkola JEREMIA 38 Bible Online

JEREMIA 38 - Batak Angkola bible

JEREMIA 38

¹Disuru TUHAN ma au palaluhon tona on tu rayat i, “LehenonKu ma kota on tu tentara ni Babel, jana taluhonon ni halahi ma kota on. Sanga ise na tading di kota on, mate ma i di parporangan, baenon ni tangkuraparon dohot baenon ni nyae masa. Tapi sanga ise na ruar pasahatkon dirina tu halak Babel, nada pola bunuonna; malua do hosana.” Dibege si Sefaca anak ni si Matan, si Gedalya anak ni si Pashur, si Jukal anak ni si Selemia, dohot si Pashur anak ni si Malkia do sude na hudokkon i.

⁴Jadi kehe ma angka pagawe i mandapotkon raja i jana didok halahi ma, “Angkon mate niuhuman do bayo on. Angke hara ni na nidoknia songon i, gabe gale do roha ni angka parajurit dohot halak na asing na adong dope di kota on. Nada diurupi ia rayat i, tapi diago ia do.”

⁵Dialusi Raja Zedekia ma, “Denggan ma i, baen hamu ma tusia sanga aha giotmunu, nada tarantahi au hamu.”

⁶Dung i dialap halahi ma au jana ditantan halahi ma au dohot tali tu bagasan sumur ni si Malkia anak ni raja i. Di alaman ni bagas godang i do sumur i. Nada adong aek di bagasan sumur i, hum bustak do jana masuk ma au tu bustak i.

⁷Adong do sada halak Sudan na karejo hatiha i di bagas godang ni raja i. Si Ebedmelek goarna. Tarbege ma tusia na dung dipamasuk au tu bagasan sumur i. Taran manguluhon rapot raja i di pintu Horbangan Benyamin,

⁸kehe ma si Ebedmelek tusi jana didok ia ma tu raja i,

⁹“Ale Rajanami na marmulia, nada denggan pambaenan ni angka jolma i. Dipamasuk halahi do Panurirang Jeremia tu bagasan sumur; musti gabe mate so mangan ia disi, harana madung abis sipanganon di kota on.”

¹⁰Dung i diparentahon raja i ma si Ebedmelek, “Oban ma donganmu tolu halak jana paruar ma si Jeremia sian sumur i painte so mate ia.”

¹¹Jadi kehe ma si Ebedmelek dohot sitolu halak nari i tu gudang ni bagas godang, jana dipambuati halahi ma sian i angka abit na buruk-buruk, dipaijur halahi ma i dohot tali tu au di bagasan sumur i.

¹²Disuru si Ebedmelek ma hugampitkon angka abit i di gidik-gidikku gabe songon ganjalna anso ulang hancitan au dibaen tali i, jana huoloi ma na nidoknia i.

¹³Dung i ditarik halahi ma au tu ginjang, haruar sian sumur i. Dung i ditahan ma au di alaman ni bagas godang i.

¹⁴Sanoli nari di hatiha na asing, disuru Raja Zedekia ma halak maroban au mangadop tusia di pintu patoluhon di Bagas Ni TUHAN. Didok ia ma tu au, “Na giot adong do sapaanku tu ho, jana angkon alusanmu do torang. Ulang buni-bunihon sanga na aha.”

¹⁵Hualusi ma, “Muda hudok hata na tutu, pasti do dabuhonon ni raja i tu au uhuman mamatehon au; jana muda hulehen sipaingot, na so ra do raja i mangoloi sipaingotki.”

¹⁶Marjanji ma Raja Zedekia tu au sip-sip, ning ia ma, “Mangasahon Debata Na Mangolu i, Debata na mangalehen ngolu di hita, husumpahon ma na so dabuhononku uhuman mamatehon ho sanga pasahatkon ho tu angka jolma na giot mamunu ho.”

¹⁷Dung i hudok ma tu si Zedekia, songon on do didok TUHAN Na Markuaso i, Debata na nisomba ni halak Israel, “Muda dipasahat ho do dirimu tu angka tentara ni raja Babel i, nada bunuonna ho, jana kota on pe nada tutungonna. Malua do ho dohot dongan sabagasmu.

¹⁸Tapi muda nada ra ho manyora, madabu ma kota on tu tangan ni halak Babel; surbuon ni halahi ma kota on lopus abis, jana ho pe nada tarbaen malua.”

¹⁹Dialusi raja i ma, “Mabiar do au mida halak hita na dung lari i mamihak tu halak Babel. Ulang so dipasahat pe au muse tu halahi jana disiksa.”

²⁰“Nada,” ningku mangalusi, “Nada pasahatonna raja i tu halahi. Gomos ma pangidoanku anso dioloi raja i ma nian tona ni TUHAN on; sidung do sudena i muse, jana nada hona bunu be raja i.

²¹Tapi anggo inda ra raja i pasahatkon dirina, na dung dipatidahon TUHAN do tu au sanga aha na giot tarjadi.

²²Di bagasan parnidaan i huida ma sude dadaboru na adong dope di bagas godang ni raja Juda ditogu tu ruar mandapotkon angka perwira ni raja Babel i. Di na mardalan i didokkon halahi ma, ‘Madung tarpaoto-oto raja i dibaen angka ale-alena i, jana guru dok ni halahi noma i. Saonnari dung bonom patna tu bustak mandao be halahi sudena.’ ”

²³Hudok ma mangulahi, “Sude isi ni bagas ni raja i obanon ni halak Babel ma haruar. Raja i sandiri pe nada malua. Tangkupon ni raja Babel ma raja i jana kota on surbuonna ma sude.”

²⁴Dung i didok si Zedekia ma, “Ulang paboa pangkataionta on sanga na tu ise pe, anso ulang tarancam hosamu.

²⁵Muda tarboto do naron tu angka na marpangkat i na dung manghobari au dohot ho, marroan do i halahi manyapai tu ho taringot tu pangkataionta on. Janjihonon ni halahi do i nada bunuonna ho, muda dicaritohon ho sudena tu halahi.

²⁶Jadi dok sajo ma na dielek-elekmu au anso ulang hutongos ho mangulahi tu hurungan jana lalu mate disi.”

²⁷Nada sadia honok, marroan ma antong angka parpangkat i manyapa-nyapai tu au. Hupaboa ma tu halahi laing songon na niparentahon ni raja i tu au. Jadi dung songon i, nada tarbaen halahi be sanga na aha tu au, angke sahalak pe nada adong na umboto pangkataion ni raja i dohot au.

²⁸Hot dope au ditahan di alaman ni bagas godang i lopus tu ari hatatalu ni Jerusalem.