Read Batak Angkola JEREMIA 39 Bible Online

JEREMIA 39 - Batak Angkola bible

JEREMIA 39

¹Di bulan sampulu taon pasambilankon si Zedekia mamarenta gabe raja ni Juda, ro ma si Nebukadnesar raja ni Babel rap dohot sude parangannia mamorangi Jerusalem.

²Di ari sambilan bulan opat taon pasabolaskon mamarenta Raja Zedekia, dionjar musu i ma tembok ni kota i,

³jana ditaluhon ma Jerusalem.[12] Jadi marroan ma sude angka perwira tinggi ni raja Babel jana diingani ma Pintu Horbangan Tonga. Deba sian halahi i ma si Nergal-Sareser, si Samgar Nebo, si Sarsekim kepala ni rumahtangga ni bagas godang, si Nergal-Sareser Rabmag dohot angka parpangkat na asing.

⁴Dung diida Raja Zedekia dohot sude tentarania i sude na masa i, diuji halahi ma maporus paluahon dirina kehe tu Rura Jordan laing di borngin i. Dibolus halahi dalan manyalpui taman ni bagas godang lalu haruar mamolus sian pintu horbangan na padomuhon tembok na dua di inganan i.

⁵Tapi diayak tentara Babel i ma halahi jana ditangkup ma si Zedekia di napa ni Jeriko. Dung i dioban ma ia tu Raja Nebukadnesar di kota Ribla na di tano Hamat, lalu diuhum mate ma ia.

⁶Laing di kota i di jolo ni matania sandiri dibunu ma angka dakdanaknia, dohot sude na sangap ni Juda dibunu muse ma.

⁷Dung i dipulsikkon ma mata ni si Zedekia, dirante lalu dioban ma ia tu Babel.

⁸Disurbu angka halak Babel i muse ma bagas godang ni raja i dohot angka bagas ni rayat lalu diparrumpakkon ma angka tembok ni Jerusalem i.

⁹Ujungna angka rayat na tinggal dope di kota i dohot angka halak na dung sanga lari tu pihak ni halak Babel, dioban si Nebusaradan komandan ni tentara ni Babel i ma halahi tu Babel.

¹⁰Deba sian rayat i angka na umpogos na so marsinadongan ditadingkon ia ma i di Juda, dilehen ia kobun anggur dohot ladang.

¹¹Madung disuru Raja Nebukadnesar komandan ni parangannia si Nebusaradan paruarkon parenta songon on,

¹²“Kehe ma ho manjalahi si Jeremia jana denggan ia jagohon. Ulang hahua ia; patulus sanga aha pangidoannia.”

¹³Dohot dua halak perwirania na marpangkat, i ma si Nebusasban dohot si Nergal-Sareser maradu sude dohot perwira ni Babel na asing rap ma si Nebusaradan

¹⁴mangalap au tu bagas godang. Dung i dipasahat ma au tu si Gedalya anak ni si Ahikam jana pahompu ni si Safan, i ma na mangurus au lopus tarbaen au mulak di bagasan hahorasan. Jadi maringanan ma au di tonga-tonga ni rayat i.

¹⁵Dompak na ditahan i au di alaman ni bagas godang i, disuru TUHAN ma au

¹⁶mandok tu si Ebedmelek halak Sudan i bahaso na nidok ni TUHAN Na Markuaso i, Debata ni Israel songon on, “Songon na Hudok na salpu i, na giot paroonKu parmaraan tu kota on, jana nada hasonangan. Idaonmu do tarjadi na masa i.

¹⁷Tapi Au TUHAN, ondihononKu do ho. Nada pasahaton ho tu angka jolma na nihabiaran ni rohamu.

¹⁸Nada bunuon ho, angke giot paluaonKu do ho. Malua do hosamu angke marpangunsandean do ho tu Au. Au TUHAN, Au do na mandok i.”