Read Batak Angkola JEREMIA 40 Bible Online

JEREMIA 40 - Batak Angkola bible

JEREMIA 40

¹Mangkuling ma TUHAN tu au dung dipalua si Nebusaradan komandan ni tentara i au di Rama. Na dioban do au tusi tarrante rap dohot halak na asing sian Jerusalem dohot Juda na dioban tu Babel gabe taban.

²Dipiohon komandan ni tentara i ma sasada au jana didok ma, “Na dung diondam ni TUHAN Debatamu do laho mangaroncohon luat on.

³Saonnari madung dipatulus pangalaho i, hara ni na dung mardosa bangsomu jana nada ra mangoloi tuSia.

⁴Saonnari hupalua ma rante on sian tanganmu jana hupalua ma ho. Muda ra ho, tola do ho dohot tu Babel, jana husarihon pe ho. Tapi muda nada ra ho, nada pola bia. Bebas do ho di luat on sanga na tu dia giotmu kehe.”

⁵Taran so kehe si Nebusaradan, didok ia ma, “Muda ra ho, tola do ho kehe mulak tu si Gedalya anak ni si Ahikam pahompu ni si Safan na dung diangkat ni raja ni Babel gabe gubernur di angka kota ni Juda. Tola do ho maringanan rap dohot ia di tonga-tonga ni rayat i, sanga kehe ho tu dia sajo giot ni rohamu.” Dung i dilehen ia ma balanjo dohot silua di au jana dipaborhat ia ma au.

⁶Kehe ma au tu si Gedalya di Mispa jana maringanan ma au disi rap dohot ia di tonga-tonga ni rayat na ditadingkon i di tano Juda.

⁷Madung diangkat raja ni Babel si Gedalya gabe gubernur di Juda na mamarenta tu sude jolma na teba di Juda, i ma angka jolma na umpogos i. Deba sian angka perwira dohot parajurit ni Juda na so ra manyora tu Babel, tarbege ma tu halahi taringot tu pangangkatan ni si Gedalya i.

⁸Jadi kehe ma si Ismael anak ni si Netanya, si Johanan anak ni si Kareah, si Seraya anak ni si Tanhumet, dohot angka anak ni si Efai na sian Netofa, dohot si Jesanya na sian Maaka kehe rap dohot angka halakna be mandapotkon si Gedalya di Mispa.

⁹Didok si Gedalya ma tu halahi, “Nada pola porlu mabiar hamu manyora tu halak Babel. Di tanonta on sajo ma hamu maringanan jana tunduk ma hamu tu raja ni Babel. Hujamin ma malua hamu.

¹⁰Au sandiri maringanan di Mispa do, jana au ma da mangwakili hamu muda pala sai ro angka halak Babel i tuson. Tola do hamu palagutkon dohot manyimpan anggur, buah-buahan dohot miak zetun, dohot maringanan di angka kota siingananmunu.”

¹¹Hatiha i muse tarbege ma tu halak Israel na maringanan di Moab, Amon, Edom dohot angka luat na asing, bahaso na dung dipaloas raja ni Babel deba halak Israel tinggal di Juda, dohot na dung diangkat ia si Gedalya gabe gubernur.

¹²Jadi ditadingkon halahi be ma angka inganan parserahan ni halahi, kehe ma halahi tu Juda. Didapotkon halahi ma si Gedalya di Mispa, jana dipalagut halahi ma anggur dohot buah-buahan bahat sajo.

¹³Dung salpu i, ro ma si Johanan dohot angka perwira na so ra tunduk tu musu mandapotkon si Gedalya di Mispa

¹⁴jana didok ma, “Diboto ho dehe na dung disuru si Baalis raja ni halak Amon i si Ismael mamunu ho?” Hape nada porsaya si Gedalya di hata ni halahi i.

¹⁵Dung i sip-sip ma didok si Johanan tu si Gedalya, “Denggan ma i kehe au mamunu si Ismael; sahalak pe nada adong na umboto i. Biasi padiaron antong ia mamunu ho? Gabe masarsar muse do mangulahi halak Juda na dung marlagut rap dohot ho muda tulus songon i, jana i ma boncir ni hasusursar ni sude rayat na teba di Juda.”

¹⁶Tapi dialusi si Gedalya ma, “Ulang! Nada tutu na nidokmi taringot tu si Ismael!”