Read Batak Angkola JEREMIA 41 Bible Online

JEREMIA 41 - Batak Angkola bible

JEREMIA 41

¹Di bulan pitu di taon i, kehe ma si Ismael anak ni si Netanya jana pahompu ni si Elisama rap dohot sampulu halak donganna tu Mispa laho marsuo dohot si Gedalya. (Horong na mora-mora do si Ismael, perwira tinggi do ia di harajaan.) Dompak rap mangan halahi sudena,

²disintak si Ismael dohot sisampulu halak i ma podang ni halahi jana dibunu ma si Gedalya.

³Dohot muse do sude halak Israel na rap dohot si Gedalya di Mispa dohot sude tentara ni Babel na topet ro tusi dibunu si Ismael.

⁴Ancogotna i taran so tarboto tu halak na hona bunu si Gedalya,

⁵ro ma salapan pulu halak sian Sikem, Silo dohot Samaria. Madung marcukur janggut halahi, masibak pakean ni halahi, jana digariangi pamatangna. Dioban halahi ma gandum dohot hamonyan sihaulkonon di Bagas Ni TUHAN.

⁶Jadi haruar ma si Ismael sian Mispa mangalo-alo halahi. Tangis ma ia jana didok ia, “Beta ma taligi si Gedalya.”

⁷Disi lalu halahi tu tonga-tonga ni kota i, manigor dipungka si Ismael ma dohot donganna i mamatehon halahi. Tapi adong ma sampulu halak sian halahi na mandok tu si Ismael, “Ulang bunu hami! Adong dope gandumnami, jawawut, miak zetun dohot aer ni loba hami bunihon di balian ni kota.” Jadi hara ni i nada dibunu si Ismael be halahi. Hape anggo na asing i dibunu ia do jana diambungkon ia bangkena i tu bagasan sumur.

⁹Sumur na godang do sumur i na nihuar ni Raja Asa dompak na diserang ni si Baesa raja ni Israel ia.

¹⁰Dung i ditangkup si Ismael ma angka boru ni raja i dohot sude halak na adong dope di Mispa i ma angka na nipasahat ni si Nebusaradan tu si Gedalya sijagoonnia. Ditangkup ia ma halahi lalu kehe ma ia rap dohot halahi tu sabola Luat Amon.

¹¹Tarbege ma tu si Johanan dohot sude parpangkat na rap dohot ia taringot tu hajahatan ni si Ismael i.

¹²Jadi kehe ma halahi rap dohot angka anak bua ni halahi mangkojar laho mandapoti si Ismael di tobat na bidang na di Gibeon.

¹³Marnida haroro ni si Johanan rap dohot angka parpangkat i, jop ma roha ni angka tahanan ni si Ismael i,

¹⁴marputar ma halahi marlojong mandapotkon rombongan ni si Johanan i.

¹⁵Tapi luncat do anggo si Ismael dohot dongannia salapan halak jana gilo ma halahi tu tano Amon.

¹⁶Dung i dipalagut si Johanan rap dohot angka perwira i ma angka tentara, dadaboru, angka dakdanak dohot angka pagawe ni bagas godang na nitahan ni si Ismael i dung jolo dibunu ia si Gedalya.

¹⁷Gabe mabiar ma halahi sudena tu halak Babel hara ni na nibunu ni si Ismael si Gedalya na niangkat ni raja Babel i gabe gubernur ni luat i. Jadi gabe lari ma halahi tu Mesir. Di tonga dalan, maradian ma halahi di Kimham na di lambung ni Betlehem.