Read Batak Angkola JEREMIA 43 Bible Online

JEREMIA 43 - Batak Angkola bible

JEREMIA 43

¹Madung hupalalu sude tona sipalaluonku na sian TUHAN, Debata ni Israel tu rayat i.

²Jadi didok si Asarya anak ni si Hosaya dohot si Johanan anak ni si Kareah na bulbul i ma tu au, “Margabus do ho. Nada disuru TUHAN Debatanami ho mangorai hami anso ulang kehe maringanan tu Mesir.

³Si Barukh anak ni si Neria i do manjujui ho laho mangalo hami, anso ditaluhon halak Babel hami jana dibunu sanga dioban tu Babel.”

⁴Si Johanan pe dohot sude parpangkat i maradu rayat i, nada ra mangoloi parenta ni TUHAN i anso tinggal halahi di tano Juda.

⁵Dioban si Johanan dohot angka parpangkat i ma sude tu Mesir sandok halak na adong di Juda, songon i muse dohot halak na dung marmulahan sian luat na asing inganan parserahan ni halahi.

⁶Halaklahi, dadaboru, angka dakdanak, dohot angka boru ni raja na nipasahat ni si Nebusaradan jagoon ni si Gedalya, dohot ma au disi dohot si Barukh, dioban ma sude tu Mesir.

⁷Dialo halahi do parenta ni TUHAN jana kehe halahi tu Mesir lopus lalu tu kota Tahpanhes.

⁸Didok TUHAN ma disi tu au,

⁹“Pambuati ma angka batu na godang-godang, lalu tanom i di bagasan tano di jolo ni pintu masuk tu bagas inganan ni pamarenta ni kota i. Usahahon ma anso diida angka halak Juda dikarejohon ho pangalaho i.

¹⁰Lalu dokkon ma tu halahi, bahaso Au TUHAN Na Markuaso, Debata ni Israel, giot paroonKu naposongKu si Nebukadnesar raja ni Babel tu inganan on. Jana di ginjang ni angka batu na nitanommu di bagasan tano i, giot pajongjongonnia ma habangsania lalu pahirbangonnia bandar ni harajaannia.

¹¹Giot ro ma si Nebukadnesar jana taluhononnia Mesir. Jana marmatean ma baenon ni nyae masa angka halak na dung ditontuhon mate. Halak na ditontuhon obanon gabe taban, angkatonna ma i gabe taban jana halak na ditontuhon mate di parporangan, mate ma i panganon ni porang.

¹²Pagaraonnia ma api di angka inganan pamelean ni debata ni Mesir, jana tutungan ni raja ni Babel ma angka patung na di inganan pamelean i sanga obanonna tu kotana. Songon parmahan na paiaskon pakeanna sian tusa, songon i muse ma ias ni Mesir sapuon ni raja ni Babel, lalu kehe ma ia mulak maroban hamonangan.

¹³Roncohononnia ma angka tugu ni gana-ganaan na di Heliopolis[13] di Mesir, jana angka inganan pamelean ni angka debata ni Mesir abis ma tutunganna.”