Read Batak Angkola JEREMIA 47 Bible Online

JEREMIA 47 - Batak Angkola bible

JEREMIA 47

¹Taran so diporangi raja Mesir dope Gasa mangkuling ma TUHAN tu au salaho tu tano Pilistin.

²Didok TUHAN, “Ligi da, mardalan do aek sian Utara jana mangalantap songon aek magodang na mangalingkup tano i dohot isina, angka kota dohot halak na manginganisa. Mangangguhi ma halak mangido tolong jana mangandungi ma rayat sudena.

³Tarbege ma di halahi sora ni parlojong ni kudo, sora ni pargaruntang ni kareta, dohot pargarutuk ni angka rodana. Gabe manggalei ma pangkilalaan ni angka na matobang, jana nada be dipikirkonsa dakdanakna angke madung gale sanga nada margogo be.

⁴Madung dapot hatihana patimpason bangso Pilistin sudena, lopus nada dapotan pangurupion be Tirus dohot Sidon. AbiskononKu ma sude halak Pilistin sian Kreta. Au TUHAN na mambaensa.

⁵Dondonan ni arsak na godang ma halak Gasa; Askelon manguntam. Sadia honok ulaning halak Pilistin na teba i sai manyaroso?

⁶Marsurak hamu, ‘Sadia honok nari ho ale podang ni TUHAN sai manyaroso? Mulak ma da ho tu sarungmu jana disi ma ho sonang!’

⁷Tapi, tarbaen ia ma he sonang disi anggo dung Huparentahon do laho manyerang Askelon dohot halak na maringanan di topi ni laut?”