Read Batak Angkola JEREMIA 5 Bible Online

JEREMIA 5 - Batak Angkola bible

JEREMIA 5

¹O hamu halak Jerusalem, bolus hamu ma angka dalan di kotamu! Jalahi ma disi, jana ligi sandiri ma! Pareso hamu ma di angka tano lapang ni kota i sanga adong do sada halak na tigor na bonar maradopkon Debata. Muda adong do antong, ampunan ni TUHAN ma Jerusalem.

²Haru pe didok halahi, “Marhite TUHAN na mangolu,” tapi marsumpa pargabus do halahi.

³Anggo satutuna na nipangido ni TUHAN, anso setia do hamu. Dibalbal Tuhan do hamu, tapi nada mangarti hamu. Digopu Ia hamu, hape na so tarajar do hamu. Sijogal roha do hamu jana nada ra muba sian angka dosamunu.

⁴Gabe ning rohangku di bagasan, “Iale tehe, halak na menek do halak on, na so umboto bagi aha. Na bodo do pambaenan ni halahi, angke nada diastui halahi na nipangido ni TUHAN Debata ni halahi.

⁵Dumengganan ma au kehe tu angka halak na godang anso mangkatai dohot halahi. Anggo halahi pasti diboto halahi sanga aha hagiot ni TUHAN Debata ni halahi.” Hape halahi sude pe nada ra diparenta Tuhan; nada ra halahi mangoloi Ia.

⁶I ma dalanna gabe soroon ni singa na sian harangan halahi, jana diparsuragehon ni sorigala na sian padang halongonan. Humadeap ma angka angguliman manjalahi soroanna di bagasan angka kota ni halahi, jana sanga ise na ruar sian bagasna soroanna noma i. Patunda ni na dung bahat do halahi mardosa umbaen na tarjadi sudena i, jana marpupu halahi manghudukkon Debata.

⁷Bia do lakna, bisa dope ampunanKu hamu? Madung ditadingkon angka anakmu Au, jana marsumpa marhitehon na so debata. Dung Hupabutong halahi, marmainan do halahi jana kehe tu bagas parkarosuan.

⁸Songon dia ma kudo jantan na mokmok halahi jana sai gintal marboru-boru; ganop be sai hum na giot mangarohai dadaboru ni donganna.

⁹Nada he patutna ma angkon uhumanKu halahi jana baloskonon sandok na nibaen ni halahi?

¹⁰SuruonKu ma musu i laho manyegohon kobun anggur ni halahi, tapi nada jabat pola mambaen buang kobun i. SuruonKu ma musu i manggotap ranting ni angka bona ni anggur ni halahi, angke nada Au antong nampuna angka rantingna i.

¹¹Tutu situtu do na dung mangalayasi halak Israel dohot Juda tu Au. Au TUHAN, madung mandok songon i.

¹²Madung mangalo bangso ni TUHAN maradopkon Tuhan i. Didok halahi, “Tole ma da, nada pola baenonNia bagi aha. Nada pola hona parmaraan hita jana nada pola songgop tu hita porang sanga haleon.

¹³Etong ma angka panurirang i songon alogo, angke nada adong tona ni TUHAN di halahi.” Dung i didok TUHAN Debata Na Markuaso i ma tu au, “Hara ni na songon i didok angka jolma i, baenonKu ma hatangKu songon api di bagasan pamanganmu. Gabe songon soban ma bangso on, jana tutungon ni api i ma halahi lopus abis.”

¹⁵O hamu halak Israel, madung diparo TUHAN sada bangso sian na dao laho mamorangi hamu. Na dung adong hian do bangso i sian narobi ni narobi, nada diboto hamu hata ni halahi. Sun do gogo ni halahi,

¹⁶jana angka na garang do sitiop sior ni halahi; na mamatehon sajo do halahi nada mananda ibo ni roha.

¹⁷Pangabison ni halahi ma suha ni tano dohot panganonmunu jana bunuonna ma angka dakdanakmunu. Sambolon ni halahi ma angka lombu dohot pahan-pahananmunu, jana segohonon ni halahi ma angka kobun anggur dohot bona ni hayu aramunu. Roncohonon ni halahi ma angka kota na marbenteng na sai dipangasahon hamu.

¹⁸Didok TUHAN, “Haru pe songon i, di hatiha i pe nada pola abiskononKu bangsongKi.

¹⁹Tapi muda sapa-sapa halahi sanga hara ni aha umbaen na songon i Hubaen tu halahi, dokkon ma ale Jeremia tu halahi sanga songon dia panadingkon ni halahi di Au di tano ni halahi sandiri laho mangoloi angka debata na asing, laing songon i muse ma halahi gabe hatoban ni angka halak na asing di luat na leban.”

²⁰Disuru TUHAN ma au palaluhon tona on tu pomparan ni si Jakob na maringanan di Juda.

²¹“Hamu halak na bodo dohot na so marpikiran tangihon hamu! Adong do matamunu tapi nada marnida, marpinggol do nian tapi nada marbinege!

²²Au ma da TUHAN; biasi nada mabiar hamu tu Au? Sapatutna angkon humitir do hamu nian maradopkon Au! Au do da mambaen pante gabe batas ni laut na so hasalpuansa salolot-lolotna. Tarbaen laut i do marombak jana tarbaen galumbang i do mangamuk, tapi nada tarsalpuisa batas i.

²³Tapi anggo hamu jogal do rohamunu jana sai mangalo; madung manyimbil hamu jana ditadingkon hamu Au.

²⁴Nada unjung diingot hamu laho pasangapkon Au, hape Au do nian na manongos udan, mamungka sian bona ni ari nonat lopus tu ujungna; laing Au muse do na mangalehen masa ni sabion di hamu ganop taon.

²⁵Tapi angka dosamunu i ma na mangambat sandok na denggan i gabe nada didai hamu.

²⁶O hamu bangsongKu, adong do sian tonga-tongamunu angka halak na jahat. Songon halak na manaon sambil laho manangkup unggas, songon i ma ditaon halahi jorgong laho manangkup jolma.

²⁷Songon parburu unggas na pamasuk unggas tu karanjangna, songon i muse ma halahi mangisi bagas ni halahi dohot angka barang-barang na ditipu. Songon i ma dalanna gabe markuaso jana mamora halahi;

²⁸boti mamokmok be jana maduma. Nada marbolat hajahatan ni halahi. Disoadahon halahi do hak ni na so marama so marina, jana nada diondihon halahi angka halak na hona sosak.

²⁹Tapi patunda ni sasudena i, Au TUHAN, giot uhumanKu ma halahi giot baloskononKu angka pambaenan ni bangso on.

³⁰Madung masa sada pangalaho na jorbut jana habiaran di luat on:

³¹Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”