Read Batak Angkola JEREMIA 50 Bible Online

JEREMIA 50 - Batak Angkola bible

JEREMIA 50

¹On ma tona ni TUHAN tu au taringot tu kota Babel dohot halak na maringanan disi,

²“Paboa ma barita tu angka bangso! Pasar ma barita i. Baen ma tanda anso sar barita i. Ulang tabuni-tabunihon barita i. Madung hona taban Babel! Madung maila Debata Bel, madung tarsonggot Marduk! Madung maila angka gana-ganaan i.

³Na giot ro ma sada bangso sian Utara mamorangi Babel jana mambaen luat i gabe padang na harsang. Marlojongi ma jolma dohot pahan-pahanan jana nada adong be na ra maringanan disi.”

⁴Didok TUHAN ma, “Anggo di hatiha i marroan ma halak Israel dohot Juda mardongan tangis manjalahi Au, Debata ni halahi.

⁵Sapaan ni halahi ma dalan tu Sion, lalu mardalan ma halahi sabola tusi. Baenon ni halahi ma parjanjian na hot dohot Au jana nada langgaron ni halahi janji i.

⁶Tudos ma bangsongKi tu biri-biri na dipadiar ni parmahanna lilu di dolok. Maot-aot ma halahi sian dolok na sada tu na sada nari nada diboto halahi be bara ni halahi.

⁷Sudena na marsuo dohot halahi marsisoro ma tu halahi. Didok musu ni bangsongKi do, ‘Aha na hita baen, nada adong sala ni i, angke na dung mardosa do angka jolma i tu TUHAN. Porsaya do antong ompu ni halahi tu TUHAN, jadi halahi pe sapatutna do angkon setia tuSia.’

⁸O hamu halak Israel, lojongi hamu ma sian Babel! Pajolo hamu ma kehe, anso mangihut na asing i.

⁹Husosoi pe angka bangso na gogo-gogo na adong di Utara anso diporangi halahi Babel. Aturon ni halahi ma barisan laho martempur mangalo Babel lalu manaluhonsa. Angka parsior na malo-malo do halahi jana anak ni pana ni halahi nada unjung na so mangonai.

¹⁰Rampasonna noma Babel jana pambuatan ni pangarampas i ma sanga na aha giot ni rohana, Au TUHAN, madung mandok songon i.”

¹¹Didok TUHAN ma, “O hamu halak Babel, disamun hamu ma bangsongKi. Marjop ni roha ma hamu songon kudo na panyihal-nyihalon jana pahae-pahulu hamu songon lombu na mardege gandum.

¹²Hape kotamu sandiri na godang i angkon palayason jana pailaon. Gabe padang na harsang noma Babel, mahiang jana gabe na ummurar sian tonga-tonga ni sandok harajaan.

¹³Hara ni na muruk Au, gabe tinggal sego-segona noma Babel jana gabe lobu. Sude halak na mamolus sian i gabe tarsonggot jana longang.

¹⁴Hamu ale angka panyior! Atur hamu ma barisanmunu laho mangaroro dohot manghobuk Babel. Tembakkon hamu ma anak ni siormunu adop Babel, dibaen madung mardosa ia naradopkon Au.

¹⁵Marsurak ma hamu paboahon parporangan humaliang kota i! Saonnari madung tunduk Babel. Angka tembokna i madung dirumpakkon jana diparunggalkon. Na palalu hosom do Au saonnari tu Babel. Hara ni i, baen hamu ma tu halahi songon na nibaen ni halahi tu angka halak na asing.

¹⁶Ulang paloas hamu jolma disi marsuan-suanan sanga manyabi. Marmulahan noma sude halak na asing na maringanan disi tu tanona be, dibaen mabiar do halahi tu tentara na ro i.”

¹⁷Didok TUHAN ma, “Tudos do halak Israel dohot biri-biri sahulanan na hona kojar jana na marserak dibaen singa. Mula-mulana ro ma raja ni Asur manyerang halahi, dung i ro muse ma si Nebukadnesar manyingkili holi-holi ni halahi.

¹⁸Hara ni i, Au TUHAN Na Markuaso, Debata ni Israel, uhumanKu ma Raja Nebukadnesar dohot luatnia i laing songon panguhumingKu di raja Asur.

¹⁹PaulahonKu noma halak Israel tu tano ni halahi. Panganon ni halahi ma suha ni tano na sian Dolok Karmel dohot tano Basan. Butongan ma halahi marhite suha ni tano na sian Luat Efraim dohot Gilead.

²⁰Anggo di hatiha i, ias noma Israel dohot Juda sian dosa, angke na giot ampunanKu noma angka halak na dung Hupalua i. Au TUHAN, madung mandok songon i.”

²¹Didok TUHAN ma tu bangso na sian Utara i,[14] “Serang hamu ma halak Merataim dohot Pekod. Bunu jana patimpas hamu ma halahi. Dalankon hamu ma na Huparentahon i.”

²²Gumadobur ma sora ni parporangan di luat i, jana masa ma hasegoan na godang.

²³Sandok tano on maropuk dipotuk Babel. Saonnari madung maponggol potuk-potuk i! Tarsonggot ma sandok bangso umbege na tarjadi tu luat i.

²⁴Didok TUHAN, “Babel, dialo ho do Au, hara ni i gabe tarhapit ho di bagasan jorgong na Hutaon tu ho, hape nada diboto ho i.

²⁵Madung Hubuka panyimpanan ni sinjatangKu, jana mardongan muruk Huparuar angka sinjata i dibaen Au sandiri Tuhan DEBATA Na Markuaso, angkon patulusonKu do sada karejo di Babel.

²⁶Porangi hamu ma Babel sian sudena jana bungkar hamu ma angka gudang panyimpanan ni gandumna! Palagut hamu ma angka barang-barang na dirampas i songon na palagutkon gandum! Abiskon hamu ma luat i! Ulang jabat adong na teba!

²⁷Bunu hamu sude tentarana i! Matehon sudena i! Marjaya ma Babel! Madung dapot hatihana hona tona uhum!” (

²⁸Dicaritohon angka halak na lari sian Babel tu Jerusalem ma sanga songon dia pamalos ni TUHAN Debatanta di parbuatan ni halak Babel maradopkon bagas na badiaNia.)

²⁹Didok TUHAN, “Suru hamu ma angka parpana manyerang Babel. Arahon hamu ma sandok halak na malo mamake pana. Hobuk hamu ma kota i jana sahalak pe ulang paloas hamu luncat. Baloskon sude pambaenanna i jana baen hamu ma tusi hombar tu pangalahona angke na dung salpu do pambaenna maradopkon Au, Na Sun Badia, Debata Ni Israel.

³⁰Angka doli-dolina i pe angkon bunuon do di angka dalan na di kota i dohot tentarana i pe sude diputusi ma di ari i. Au TUHAN, madung mandok songon i.

³¹Babel, maginjangtu do rohamu! Hara ni i, Au Tuhan DEBATA Na Markuaso, mangalo ho. Madung hatihana uhumanKu ho.

³²Tartuktuk ma bangsomu siginjang roha i jana tinggang. Sahalak pe nada adong na mangurupi laho pajongjongkon ho. SurbuonKu ma angka kotamu, jana sandok na adong humaliang ni kota i, Huabisi.”

³³Didok TUHAN Na Markuaso i ma, “Rap marhancit do Israel dohot Juda. Sude na manaban halahi manjagoi halahi pir pambaenanna jana nada ra paluahon halahi.

³⁴Tapi gogo do Au pambela ni halahi TUHAN Na Markuaso i do goarKu. Au sandiri do na manjuljulkon parkaro ni halahi dohot na maroban dame tu portibi on. Tapi anggo tu halak Babel paroonKu ma hasusaan.”

³⁵Didok TUHAN ma, “Angkon dipatimpas Babel rap dohot rayat dohot parkuaso maradu barisan na malo marroha.

³⁶Angkon bunuon sude angka panurirang ni Babel, angke pargabus do halahi jana na oto. Tentara ni Babel pe angkon laing bunuon do; mabiar do halahi sudena.

³⁷Kudo dohot karetana angkon diropuhi, angke tentara na niongkosan nada be margogo. Diabiskon ma sude hakayoan ni Babel, sinadonganna i dirampas.

³⁸Sude batang aek angkon mahiang angke gok do Babel dibaen angka gana-ganaan na jorbut, na mambaen rintik angka na mamele tusi.

³⁹Hara ni i, gabe inganan parbeguan noma Babel dohot inganan ni tondi na jahat maradu angka unggas unto. Ro di salolot-lolotna nada adong be halak na ra maringanan disi.

⁴⁰Tarjadi muse ma tu Babel sanga aha na tarjadi tu Sodom dohot Gomora di na Huroncohon kota i rap dohot angka pagaran na adong humaliangna. Sahalak pe nada adong be na tading disi. Au TUHAN, madung mandok songon i.

⁴¹Sian luat na dao di Utara, ro ma sada bangso na gogo. Bahat do raja na ro rap dohot halahi. Ma pola hobas halahi manyintak sinjatana.

⁴²Pana dohot podang do sinjata ni halahi; jingar jana na so umboto ampun do i. Songon sora ni laut na marombak songon i ma sora ni kudona na dipacu anso maju mamorangi Babel. Madung hobas halahi marporang mangalo luat i.

⁴³Umbege barita i raja Babel gabe manggalei. Didondoni biar ma ia, jana markancit, songon dadaboru na giot di api.

⁴⁴Songon singa na muldop sian harangan godang na di lambung ni Batang aek Jordan mandapotkon padang panjampalan ni biri-biri songon i ma, Au TUHAN, giot ro jana mambaen marlojongi halak Babel sian kota ni halahi tompu. Dung i todoonKu ma sada halak pamimpin laho mamarenta luat i. Ise ma he na tarpatudos tu Au? Ise ma he na puluk mangalo Au? Adong dehe pamimpin na margogo mangalo Au?

⁴⁵Hara ni i, tangihon ma sanga aha na dung Husangkaphon maradopkon kota Babel dohot na giot baenonKu tu angka halak na disi. Angka dakdanak ni halahi pe saraton do kehe jana sandok jolma gabe mabiar.

⁴⁶Muda madabu Babel, tarbege ma hagaoron na lobi gogo jabat humutur portibi on; begeon ni angka bangso na asing ma angguk ni halahi.”