Read Batak Angkola JEREMIA 7 Bible Online

JEREMIA 7 - Batak Angkola bible

JEREMIA 7

¹Hata ni TUHAN na ro tu si Jeremia, songon on:

²“Jongjong ma ho di horbangan ni Bagas Ni TUHAN, baritahon ma hata on jana dokkon ma, ‘Tangihon hamu ma hata ni TUHAN, ale halak Juda, na masuk sian sude horbangan on laho marsomba TUHAN!’

³Songon on do hata ni TUHAN Na Markuaso i, Debata ni Israel, ‘Pauba ma pangalahomu dohot pambaenanmu anso ra Au maringanan di inganan on rap dohot hamu.’

⁴Ulang haporsayai hamu hata gabus na mandok, ‘On ma Bagas Ni TUHAN, Bagas Ni TUHAN, Bagas Ni TUHAN.’

⁵Pauba hamu ma ngolu dohot pangalahomunu. Baen hamu ma na tigor na sada tu na asing.

⁶Ulang sai sosak hamu halak na leban, dakdanak na so marama so marina, dohot angka na mabalu. Ulang bunu hamu halak na so marsala di luat on. Ulang marsomba hamu tu angka debata na asing angke mangalapi hamagoanmunu do i.

⁷Muda songon i, ra ma Au maringanan rap dohot hamu di inganan on, di tano na Hulehen tu ompungmunu sian na jolo lopus tu salolot-lolotna, luat na dung Hulehen gabe tano pusako di ompungmunu.

⁸Tapi anggo satutuna, porsaya tu gabus do hamu.

⁹Manangko do hamu, mambunu, marmainan, manyaksihon gabus, manghaulkon haul tu Baal, dohot marsomba angka debata na so nitandamunu.

¹⁰Dung dipambaeni hamu sasude na Huhagigihon i, ro ma hamu mangadop tu Au di BagasKon jana didok hamu ma, ‘Aman do hami!’

¹¹Adong he na dietong rohamunu do asar ni panyamun BagasKon? Huida do sude pangalahomunu i.

¹²Tu Silo[1] ma hamu kehe, kota na Hutodo narobi gabe inganan paribadatan tu Au. Ligi hamu ma sanga songon dia na Hubaen maradopkon kota i hara ni dosa ni bangsongKu Israel.

¹³Haru pe marpupu Au mandok hata tu hamu, na so ditangihon hamu do i. Sude do dosa i dipambaeni hamu, jana nada ra hamu mangalusi muda Hupiohon hamu.

¹⁴Antong baenonKu ma songon na tu Silo narobi tu BagasKu na nipangasahonmunu on jana na Hulehen tu ompumunu dohot tu hamu.

¹⁵PaorotonKu ma hamu sian jolongKu songon pangusirKu di kahanggimunu halak Israel i.”

¹⁶Didok TUHAN, “Ale Jeremia, ulang tangiangkon angka jolma on. Ulang mangido tolong sanga ditangiangkon ho salaho tu halahi: Ulang sosak-sosak Au angke nada ra Au manangihon pangidoanmi.

¹⁷Diida ho sandiri do parkarejoan ni halahi di angka kota na di Juda dohot di angka dalan na di Jerusalem!

¹⁸Dipalagut angka dakdanak do soban, halaklahi na magodang pagarahon api jana dadaboru mancampur adonan laho pature kue di debata boru-boru na nigoaran ni halahi Ratu Banua Ginjang. Jana na pahancit rohangKu dihaulkon halahi muse ma anggur tu angka debata.

¹⁹Hape anggo satutuna nada rohangKu na nipahancit ni halahi, tapi dirina sandiri do, gabe maila ma halahi.

²⁰Au Tuhan DEBATA, padondonkononKu ma murukKu na jorbut i tu bagas paribadatan on, tu jolma dohot tu binatang dohot tu suan-suanan dohot tu suha ni tano. Marjimbur-jimbur ma murukKu songon api na so haintopan.”

²¹Didok TUHAN Na Markuaso, Debata ni Israel, “Tambahon ma haul situtungonmu tu haul na tola panganon jana pangan ma sudena i!

²²Di na Huoban angka ompu na umpompar hamu ruar sian Mesir, nada adong Hulehen tu halahi aturan salaho tu haul situtungon maradu angka haul na asing i.

²³Anggo na Huparentahon tu halahi, hum pangoloion tu Au do anso Au gabe Debata ni halahi, jana halahi gabe bangsongKu. Husuru halahi anso mangolu mangihutkon angka na Huparentahon anso martua halahi.

²⁴Hape nada ra halahi manangihon dohot mamparrohahonsa. Tubu-tubu ni roha ni halahi na pir boti na jat i sandiri do dipaihut-ihut halahi. Indada mur dumenggan halahi tapi mur tu jahatna noma.

²⁵Mamungka sian na haruar ompumunu sian Mesir lalu tu sadari on sai Husuru do angka naposongKu, angka panurirang tu hamu.

²⁶Hape nada adong na manangihon sanga na mamparrohahon. Mur jumogal do rohamunu jana mur jumahat sian ompumunu.”

²⁷Dung i didok TUHAN ma tu si Jeremia, “Hara ni i ale Jeremia, haru pe dipaboa ho sudena i tu bangsongKu, nada na ra halahi mamparrohahon angka hata na nidokmi. Haru pe halahi dipiohon nada ra halahi mangalusi i.

²⁸Hara ni i dokkon ma tu halahi, ‘On ma bangso na so ra manangihon TUHAN, Debata ni halahi, jana na so ra manjagit pangajaran!’ Madung mago roha haburjuon sian pamangan ni halahi.”

²⁹Didok TUHAN, “Ale halak Jerusalem, marsiluluton ma hamu! Gusting ma obukmu jana ambungkon ma i! Endehon hamu ma ende andung di puncu ni dolok di partoran. Au TUHAN, dibaen hamu gabe gusar saonnari gabe Hutulak hamu sudena.

³⁰Mambaen hajahatan do halak Juda. Dibaen halahi do angka gana-ganaan ni halahi na Huhagigihon i di bagasan BagasKu, gabe hodar dibaen halahi.

³¹Madung dipajongjong halahi sada langgatan na margoar Tofet di Rura Hinom laho manghaulkon angka dakdanak ni halahi baen haul situtungon. Hape so jungada Husuru halahi mambaen sisongon i, salang tubu di bagasan rohangKu pe nada unjung na songon i.

³²Hara ni i, dapot do hatihana nada goaron be inganan i Tofet sanga Rura Hinom, tapi goaron noma i Rura Panyambolan. Gabe kuburan ma tano i hara ni na so adong be inganan na asing.

³³Angka bangke i ma panganon ni unggas dohot binatang panyoro jana nada adong manyosaksa.

³⁴Gabe padang na harsang ma tano i. AntahonKu ma sora na marmoga-moga dohot sora ni pesta haroan boru di angka kota ni Juda dohot di angka dalan ni Jerusalem.