Read Batak Angkola JEREMIA 9 Bible Online

JEREMIA 9 - Batak Angkola bible

JEREMIA 9

¹Sugari sumur na gok ma nian ulungku, jana pancur na torus mardalan ma matangku! Tarbaen au ma tangis arian dohot borngin, mangandungi angka jolma sabangsongku na nibunu ni musu.

²Sugari dapot au ma di padang halongonan inganan parbornginan di halak na mardalanan! Hutadingkon noma bangsongku, jana marlojong au tusi laho mandao sian halahi. Panghianat do halahi sudena, sada punguan ni halak na so setia,

³jana hum na margabusi. Di sandok luat nada markuaso hatigoran, jana hageduhan noma hatontuanna. Didok TUHAN ma, “Nada marnamantak bangsongKi mambaen hajahatan, nada dioKu halahi Au Debata.”

⁴Angkon jamot do halak maradopkon donganna salang dongan saama pe nada haposan, angke songon si Jakob, laing songon i ma halahi marsipaoto-oto kahanggina. Pahae-pahulu ganop be pasarkon hata manilakoi dohot gabus.

⁵Marsigabusan sudena nada adong marhata na tigor; somal do pamanganna i mamburas nada ra halahi manadingkon dosana. Hakejaman mardapot hakejaman, gabus tu gabus sai torus ma i dipambaenan, ditulakkon halahi do TUHAN.

⁷Jadi patunda ni i didok TUHAN Na Markuaso i ma, “UjionKu ma bangsongKi anso gabe pita halahi. Angke aha dope na bolas baenonKu maradopkon bangsongKu?

⁸Gok parmaraan do angka hata ni halahi, tarbaen mamatehon songon pana na marbisa. Hum gabus sajo do hata ni halahi. Tabo do hata ni halahi manarik tu roha, hape anggo satutuna na manaon sambil do halahi.

⁹Patut ma he nada Hudabuhon uhum tu halak na songon i? Patut ma he nada baloskononKu i? Tu bangsongKi songon i ma didokkon TUHAN!”

¹⁰Au si Jeremia, hudok ma, “Tangis ma au jana marsak hara ni padang dohot angka dolok na dung mahiang mangkarogang boti nada dibolus-bolus halak. Nada habegean be sora ni pahan-pahanan, marlojongi sude unggas dohot sude pahan-pahanan.”

¹¹Didok TUHAN, “Gabe lobu baenonKu Jerusalem inganan partabunian ni sorigala. Mamolngit ma angka kota ni Juda, inganan na so adong be pangisina.”

¹²Husapai ma, “O TUHAN, biasi dipadiar luat on harsang jana marogang songon padang halongonan gabe so adong halak na mamolussa? Adong dope he na tuk mangastui sasudena on? Tu ise dehe Hulehen hatorangan anso tarpalalusa i tu halak na asing?”

¹³Dialusi TUHAN ma, “Patunda ni bangsongKu ma i na so ra marrohahon angka pangajaran na Hulehen tu halahi. Nada unduk halahi tu Au, jana nada ra mangihutkon parentangKu.

¹⁴Jogal do roha ni halahi jana marsomba tu Baal do halahi songon na niajarkon ni angka ompu ni halahi.

¹⁵Hara ni i, tangihon hamu sanga aha na giot baenonKu, Au TUHAN Na Markuaso, Debata ni Israel na giot mangalehen suan-suanan na paet sipanganon dohot rasun siinumon.

¹⁶PaserahonKu ma halahi tu tonga-tonga ni angka bangso na so ditanda ni halahi sanga ompu ni halahi. TongosonKu ma tentara na mamorangi halahi lopus abis sudena.”

¹⁷“Parrohahon ma! Pioma dadaboru na malo mangandung anso ro halahi, jana suruna marpio angka dadaboru na pistar anso ro halahi.

¹⁸Sigop ma halahi ro jana tumatangis hara ni hita, anso marlinang matanta jana manetek ilunta.”

¹⁹Tarbege ma sora ni na tangis di Sion, “Mago do hita jana dipaila. Tadingkononta ma hape tanonta, masego ma angka bagasta.”

²⁰Hudok ma, “Tangihon ma angka hata ni TUHAN, o hamu angka dadaboru sudena! Ajarkon ma tu angka dakdanakmu ende andung, tu angka donganmu ende ni siluluton.

²¹Ma pola masuk hamatean sian jandela, madung manyaroso tu bagasan bagas godang; disaroso angka dakdanak di angka dalan songon i muse angka na poso di alaman.

²²Marampar angka bangke niida songon rompak di tano parragena; songon bona ni gandum na tading jana na so dipalagut be. I ma tona ni TUHAN na angkon baritahononku.”

²³Didok Tuhan ma, “Nada pola manggodang na pistar hara ni hapistaranna, halak na gogo hara ni hagogoanna, dohot halak na kayo hara ni sinadonganna.

²⁴Sanga ise na giot manggodang hara ni bagi aha, manggodang ma hara ni na nitandana Au; jana diboto angka sangkapKu. Dibotosa do na so marujung holong ni rohangKu jana bonar boti tigor pambaenanKu. Sudena do i pajop rohangKu. Au do TUHAN na mandok i sudena.”

²⁵Didok TUHAN ma, “Dapot do i hatihana, uhumanKu halak Mesir, Juda, Edom, Amon, Moab dohot halak na mangingani padang halongonan na manggusting pendek obukna.[3] Na dung marsunat do sude angka jolma i, hape halahi sandiri bope halak Israel nada maniop parjanjianKu na nigambarkon ni sunat i.”