Read Batak Angkola ANDUNG 2 Bible Online

ANDUNG 2 - Batak Angkola bible

ANDUNG 2

¹Di bagasan murukNa do dibaen Tuhan, dilingkup Ia Sion dohot hagolapan. Hagodangan ni Israel na salangit i, madung disampakkon Ia tu portibi. Taran di parmuruk ni Tuhan, bagasNia na di Sion i pe nada diSia marhaporluan.

²Ganop kota na adong di Juda, dironcohon Ia nada adong ibo ni roha. Angka benteng na mangondingi luat i dionjarkon Ia lopus marumpahi. Didabuhon Ia lopus marbile noma harajaan i dohot angka pamimpinna.

³Di bagasan parpiar ni murukNa, gogo ni Israel diponggolkon Ia. Taran ro musu mangaroro, nada ringkot rohana mangalehen pangurupiNia. Songon api na manggasa-gasa mangabisi sasudena, songon i ma Tuhan muruk tu Israel.

⁴Songon musu i, marmetar Ia manembakkon anak ni pana, jana dipaadop tu hita. Sude jolma na pasonang rohanta, abis hona bunu dibaen Ia. Dibursikkon Ia hamuruhonNia i tu bagasan kota Sion songon api.

⁵Gabe tudos tu musu do Tuhan; dilibas Ia Israel lopus mardabuan. Dironcohon Ia angka benteng dohot bagas godang, jana diparo Ia pardangolan tu halak ni Juda.

⁶BagasNia sandiri pe na dung dironcohon Ia do; lupa dibaen Ia halak di Sion tu Ari Sabat dohot tu ari pesta. Hara ni santakna muruk ni TUHAN, malim pe dohot raja nada be niakuan.

⁷Ditulak Tuhan do langgatanNa na badia i. Nada ra be Ia mangakui bagasNia sandiri; dipadiar Ia musu i mangaroncohon angka tembokna i. Di ingananta na salpu i maribadat marjop ni roha, marsurak musu songon na marpesta.

⁸Madung putus di roha ni TUHAN anso tarbaen Ia manyegohon Sion i sudena. Angka tembok dohot palas-palasna, ma pola gabe maropuk i sudena.

⁹Ditutup tano angka horbanganna, marponggolan dohot angka goruk-gorukna; di habuangan noma raja dohot na umboto mamarenta. Uhum Ni TUHAN nada be diajarkon; panurirang pe nada be manjagit boa-boa sian TUHAN.

¹⁰Marjuguhan hatobangon ni kota Sion markutondo di tano; marsisampakkon abuan tu ginjang ni ulu, jana mamake abit goni tanda ni marsakna. Angka nauli bulung pe paunduk ulu lalu tu tano.

¹¹Marbosoli matangku hara ni na so mantak tangis, marhancit tondingku songon na dihoris. Loja au holosan paida-ida haruruncur ni bangso i, na baru sorang dohot dakdanak marompasan di dalan ni kota i.

¹²Martangisan halahi mangido panganon tu inangna. Songon halak na margasa halahi, tinggang noma lalu mate di ampuan ni inangna.

¹³O ale Jerusalem, na ni haholongan, aha ma dohononku tu ho? Bia ma baenonku mangapuli ho? Nada adong dope jungada manaon na songon on. Nada marbatas hamamagomu songon laut na bidang, nada adong be si arophononmu.

¹⁴Na niturihon ni angka panurirang tu ho, hum gabus do i jana buras sajo. Paoto-oto hamu do angka hata ni halahi, nada jungada dipatorang halahi dosamunu i, gabe nada dipauba hamu rohamunu. Didokkoni halahi do angka hata gabus na paliluhon hamunu.

¹⁵Mangincahi ma tu hamu angka pamolus jana martata, dibaen madung sego kota Jerusalem sudena. Didok halahi, “I ma he ibana kota na jumeges lakna? Kota pujian ni portibi on sudena?”

¹⁶Margoyak ni roha sude musumu mangida bohimi, dipartatai halahi do ho jana disurahi. Didok halahi, “Ma pola hami luntak kota i! Ujungna dapot ma hatiha na hami painte i!”

¹⁷Madung didalankon TUHAN sangkapNia i na dung dipaingotkon Ia tu hita na salpu i. Dilantuk Ia do hita nada adong ibo ni rohaNa, dilehen Ia hamonangan di musunta. Dibaen Ia halahi marjop ni roha paida-ida hadadabunta.

¹⁸Ale angka tembok ni Jerusalem, pio-pio ma tu Tuhan! Marilu-ilu ma hamu songon aek na mabaor borngin bo arian. Torus ma hamu tangis, ulang maradian lopus loja pamatang!

¹⁹Pupu hamu ma tarsunggul sasaborngin laho marsurak mangido ibo ni roha ni Tuhan i. Usehon na di rohamu taringot tu dakdanakmu na malean jana na marompasan di sude pangeldohan ni dalan.

²⁰Ligi ma ale TUHAN, pareso ma angka na niparkancitanMi! Dipangan ina do anak haholongan ni rohana, malim dohot panurirang hona bunu di Bagas Ni Debata.

²¹Na poso dohot na matobang marragean di dalan, na poso-nauli bulung marmatean dibaen podang. Dibuat Ho do hosa ni halahi taran na muruk Ho, disamboli Ho do halahi nada adong ibo.

²²Dihara Ho angka musungku mambaen pesta na gok hakejamon humaliang au. Di ari ni hamumurukMu, sahalak pe nada tarbaen malua sian uhumanMu. Angka na huhaholongi dohot na hupasari-sari ma pola dibunu angka musu i.