Read Batak Angkola ANDUNG 3 Bible Online

ANDUNG 3 - Batak Angkola bible

ANDUNG 3

¹Au ma da halak na dung manaon parkancitan, hara ni uhuman ni Debata.

²Mur dao au dioban Ia tu bagasan inganan na golap bulita.

³Dibalbali au marulak noli, so adong ibo ni roha sasadari.

⁴Margasa banga sibukku jana markerut-kerut huling-hulingku dibaen Ia, jana holi-holingku marponggolan.

⁵Dilingkupkon Ia tu iba parkancitan dohot arsak ni roha.

⁶Dipayakkon Ia iba mangkohom di bagasan hagolapan songon halak na mate di hatiha narobian.

⁷Dirahut Ia do au dohot rante, nada adong arop ni rohangku malua be.

⁸Pio-pio au mangido pangurupi, hape nada ra Debata umbege i.

⁹Diolat Ia do au hatiha mardalan, pagar tembok mangolat au.

¹⁰Songon gompul Ia painte-intehon au, songon singa Ia mangadang dalanku.

¹¹Diayak Ia do au lopus manyimbil sian dalan, jana disuakkon dagingku jubakjabik, lalu ditadingkon Ia songon i.

¹²Disintak Ia siorNia, jana dibaen Ia ma au papanganan ni anak ni pana.

¹³Tombus pamatangki dibaen panaNia lopus masuk tu pusu-pusungku.

¹⁴Gabe sipartataan sajo noma au di sude halakku, jana marlayas dibaen halahi sasadari.

¹⁵Hum hapaeton do dipadaihon Ia tu au baen panganon dohot inumonku.

¹⁶Diogoskon Ia bohingku tu tano, disotukkon Ia iponku tu batu lopus maropang.

¹⁷Disirang Ia hosangku sian hasonangan; ma jabat lupa au di pangkilalaan jop ni roha.

¹⁸Nada adong be di au habonggalan, ma pola mago arop ni rohangku tu TUHAN.

¹⁹Maot-aot au jana marnyae; mamikirkon i songon na mangankon rasun na paet.

²⁰Sai torus ma i hupikir-pikiri, gabe mur menek ma rohangki.

²¹Tapi haru songon i pe mulak gurgur do arop ni rohangki, di na huingot pangalaho on mangulahi.

²²Hot do manongtong holong dohot asi ni roha ni TUHAN,

²³mulak imbaru do i ganop manyogot; songon parbincar ni mataniari do habonaran ni TUHAN.

²⁴Hum TUHAN sajo do na adong di au, tuSia sajo do hupapos rohangku.

²⁵Burju do TUHAN tu halak na mararop ni roha tuSia, dohot tu halak na jalak-jalak diSia.

²⁶Antong, painte ma di bagasan sonang lopus ro TUHAN mangalehen partolongan.

²⁷Angke denggan do i marsiajar anso sobar taran di haposoon dope iba.

²⁸Dompak dilehen TUHAN parkancitan, juguk ma sugari hita hohom sasada iba.

²⁹Tapatoruk ma rohanta jana manyora, harana betak adong dope siaropon ni roha.

³⁰Haru pe dibalbal dohot hona hata, laing hita jagit ma da i sasudena.

³¹Haru pe diloas Tuhan hita di pardangolan, nada ditulak Ia hita torus sapanjangna.

³²Haru pe dibaen Ia hita susa, tapi nauli basa do anggo Tuhan, hot do holong ni rohaNia marlobi-lobian.

³³Nada sian pangonjar ni rohaNa dipadiar Ia hita mardangol jana mararsak roha.

³⁴Muda didege-dege halak angka na di hurungan di tano on,

³⁵muda mago hakta na nilehen ni Tuhan, ampot hatigoran dihusor marbalihan,

³⁶diboto Tuhan do i jana diparrohahon.

³⁷Hum hagiot ni Tuhan sajo do na giot mardalan;

³⁸hara ni parentaNia sajo do mardalan na denggan sanga na jat.

³⁹Biasi angkon sai holsoan hita muda diuhum hita hara ni angka dosanta?

⁴⁰Denggan ma da hita tangkasi ngolunta jolo, jana mulak ma hita tu TUHAN Debatanta.

⁴¹Beta ma taungkap rohanta jana martangiang tu Debatanta di banua ginjang,

⁴²“Mardosa do hami jana mangalo tu Ho, ale TUHAN, jana nada dilehen Ho ampunan.

⁴³Dikojar Ho do hami jana dibunu Ho, buni do holong ni rohaMu di bagasan na muruk Ho.

⁴⁴Songon ombun na hapal do murukMu gabe nada tartombus angka tangiangnami i.

⁴⁵Dibaen Ho do hami songon rompak-rompak di mata ni sude portibi on.

⁴⁶Dilayasi jana dipartatai sude musunami do hami;

⁴⁷didondoni parmaraan dohot hasegoan do hami, jana mangolu di bagasan bahaya dohot biar do hami.

⁴⁸Mabakbak ilu ni matangku, hara ni na hona hasegoan bangsongku.

⁴⁹Nada mantak be au tangis,

⁵⁰lopus diparrohahon TUHAN sian banua ginjang, hami.

⁵¹Magopu rohangku paida-ida angka dadaboru di kotanami.

⁵²Songon unggas au dikojar musu soada dalan margoyak ni roha tu au.

⁵³Diambungkon halahi tu sumur au lalu didangguri dohot batu.

⁵⁴Dibonom aek lalu tu ulungku, jana marpikir ma au, ‘Tammat ma hape baritangku!’

⁵⁵Ale TUHAN, pio-pio do au tu Ho, sian tandolan ni sumur na bagas i.

⁵⁶Gomos pangidoanku ulang be da tulak au. Jadi gabe ditangihon Ho pangidoanki jana didok Ho, ‘Ulang ho mabiar.’

⁵⁷

⁵⁸Ale Tuhan, ro do Ho jana dipalua Ho au. Madung dipalua Ho hosangku.

⁵⁹Diida Ho do hajahatan na dibaen tu au, bela ma parkarongku, ale TUHAN!

⁶⁰Diboto Ho do sogo ni roha ni musungku tu au, dohot sanga na bia tahi ni halak i mangago au.

⁶¹Dibege Ho do, ale TUHAN, dipalayas au; diboto Ho do sangkap ni halahi sudena.

⁶²Dihata-hatai halahi do au sasadari, laho mangago au, dibaen halahi do sihagigian.

⁶³Sian manyogot lalu tu borngin, sipartataan sajo ma au dibaen.

⁶⁴Uhumi ma halahi, ale TUHAN, hombar tu parbuatanna.

⁶⁵Burai jana padiar ma halahi di bagasan pandelean.

⁶⁶Ayak-ayak jana haromkon ma halahi sude lopus hais sian tano on sude.”