Read Batak Angkola ANDUNG 4 Bible Online

ANDUNG 4 - Batak Angkola bible

ANDUNG 4

¹Sere na marlinang i ma pola mondap madung marserak di dalan i angka batu ni Bagas Ni Debata.

²Najolo songon sere na arga do angka na bajar di kota Sion, hape saonnari tudos tu hudon tano noma dibaen.

³Salang induk ni sorigala, dipasusu do anakna, hape anggo bangsongku na kejam do tudos songon pambaen ni unggas unto di halongonan.

⁴Nada dipasusu be dakdanak na menek, gabe mate nguasan ma. Mangido mangan angka dakdanak, tapi nada adong mangalehensa.

⁵Na somal hian halahi mangankon na tabo-tabo, gabe mate tangkuraparon di dalan-dalan i, jana na mangolu di bagasan na marlobi-lobi, hape anggo saonnari payak-payak di sarop-sarop.

⁶Hona uhum bangsongku, umborat sian tu halak Sodom na salpu di bagasan sangkidop mata manigor maropuk dibaen tangan ni Debata.

⁷Najolo polin do angka pamimpinnami songon hapas na mamontar ias do i. Tohong jana margogo halahi, horas torkis jana jogi-jogi.

⁸Hape saonnari payak do halahi nada ditanda be di dalan lumomlom bohina sian hagolapan. Markerut huling-hulingna i di holi-holina, songon hayu na mahiang pora-pora.

⁹Maruntungan noma mate di parporangan, sian na mate malean. Mardangol halahi boti muli-muli markancit, hara ni na so adong panganon sian ladang.

¹⁰Jorbut ma da parmaraan i na mandondoni bangsongki; salang angka ina parroha na lambok dilompa ia noma anakna sandiri baen pangisi ni butuhana.

¹¹Palalu hosom ma TUHAN tu Sion, kotaNa i disurbu Ia lopus mangornop tu tano i.

¹²Nada adong na porsaya sian tonga-tonga ni angka raja dohot halak na saportibi bahaso na bolas masuhan ni musu do angka horbangan ni kota Jerusalem.

¹³Tapi madung tarjadi na songon i, hara ni dosa ni angka malim dohot panurirang. Manduruskon mudar do halahi, mudar ni halak na so marsala muse do i.

¹⁴Songon halak na so marnida maot-aot di dalan tudos tusi ma da angka pamimpin ni Jerusalem. Hara ni mudar, hodar ma pakean ni halahi gabe nada adong halak na ra dais tu halahi.

¹⁵Didok halak ma, “Morot ho sian on! Ramun do hamu, ulang dais tu hami on!” Gabe mompas-ompas ma halahi sian bangso tu bangso, jana nada adong sanga ise na marhagiot.

¹⁶Nada be diparrohahon TUHAN bangsoNia, Ia sandiri do paserakkonsa, dohot mambaen angka malim nada be mararga; angka pamimpin nada adong mangkaholongisa.

¹⁷Manatap do matanami, paintehon pangurupi na so ra ro i. Hami arop do nian ro pangurupi sian sada bangso, hape nada adong na mangalehen.

¹⁸Nada tarbaen hami ruar tu alaman, hara ni panjago ni alo na rongkingan. Dapot ma da ajalnami, madung marujung ari-arinami.

¹⁹Humipas do na mangayak hami sian unggas rajawali; di dolok dohot di halongonan dikojar jana diolat halahi do hami.

²⁰Ditangkup halahi raja na nitodo ni TUHAN i, i ma halak na sai hami pangasahon i na mangalehen hangoluan jana maradopkon musu songon pangondian.

²¹Ale bangso Edom dohot Us martata be ma hamu, salolot habolasan, marmoga-moga ma hamu! Tu ho pe giot ro muse do parmaraan; lenong ma hamu marbuka pakean.

²²Madung didalani Sion uhumanna hara ni angka dosa na nibaenna; saonnari nada be hami padiaron ni TUHAN jana nada be obanonNa tu bagasan habuangan. Tapi anggo ho ale Edom, uhuman ni TUHAN noma ho. Ungkapon noma angka dosamu.