Read Batak Angkola JEHESKIEL 11 Bible Online

JEHESKIEL 11 - Batak Angkola bible

JEHESKIEL 11

¹Dung i diangkat Tondi i ma au lalu dioban tu pintu horbangan sabola Habincaran na di Bagas Ni TUHAN. Huida ma disi adong dua pulu lima halak halaklahi, dua halak sian i, i ma pamimpin ni bangso i, si Jaasanya anak ni si Asur dohot si Pelaca anak ni si Benaya.

²Didok Debata ma tu Au, “Ale jolma parsantongkinan, on ma da angka jolma na mambaen sangkap hajahatan di kota on dohot na mangalehen sipaingot na paliluhon.

³Na mandok: Nada he santongkin dope dung tabangun angka bagasta on muse? Kota on do hudon jana hita juhutna.

⁴Hara ni i palalu ma tonangKu adop halahi, palalu ma tonangKu, ‘Ale anak ni jolma!’ ”

⁵Dung i digohi Tondi Ni TUHAN ma au, jana disuru TUHAN ma au mandok hata tu bangso Israel, “Ale bangso Israel, Huboto do sanga aha na nidok dohot na nisangkapmu.

⁶Songon i ma bahatna jolma na hona bunu dibaen hamu, jabat gok bangke angka dalan ni kota i.

⁷Hara ni i, Au Tuhan DEBATA, mandok tu hamu: Tutu ma da i, hudon do antong kota on, tapi anggo juhutna di bagasan nada hamu, tapi bangke ni angka jolma na nibunumunu do! Anggo hamu usironKu do sian kota on!

⁸Mabiar do hamu tu podang, tapi paroonKu ma podang tu hamunu, songon i ma pandok ni Tuhan DEBATA.

⁹ObanonKu noma hamu ruar sian kota i jana Hupasahat tu halak na leban. Madung Huputuskon uhuman mate tu hamu.

¹⁰Mate di porang do hamu di tanomunu sandiri, jadi gabe botoonmunu ma bahaso Au do TUHAN.

¹¹Jadi nada adong be hasonanganmunu di kota on, nada songon juhut na di bagasan hudon. KojaronKu hamu jana uhumanKu sanga na di dia pe hamu di tano Israel.

¹²Jadi gabe botoonmunu ma bahaso Au do TUHAN jana hona uhum ma hamu Hubaen hara ni na mangalaosi angka aturanKu jana nayang rohamunu di angka parentangKu marhite na mangoloi angka tona ni negara-negara na humaliangmu.”

¹³Taran na mandok hata i au, ompot ma si Pelaca madabu lalu mate. Jadi manungkap ma au jana pio-pio, “Iale, Tuhan DEBATA! Na giot bunuonmu dehe sude Israel na teba on?”

¹⁴Mangkuling muse ma TUHAN tu au,

¹⁵“Ale anak ni jolma, topet do hatiha dihatai halak na di Jerusalem dohot ho dohot angka donganmu na tarbuang i. Didok halahi, ‘Madaotu do angka halak buangan i sian Jerusalem laho marsomba tu TUHAN. Na dung dilehen TUHAN do tano Israel di hita.’

¹⁶Hara ni i, palalu ma jolo tonangKon tu angka donganmu na tarbuang i, Au do na maroban halahi songon i daona tu tonga-tonga ni angka bangso jana paserakkon halahi di angka luat i. Tapi haru songon i pe, sai na dongananKu do halahi taran disi halahi.

¹⁷Au, Tuhan DEBATA, mandok, sai na palagutonKu do halahi sian angka luat inganan parserahan ni halahi, jana paulahonKu tano Israel tu halahi.

¹⁸Muda mulak halahi, ambungkonon ni halahi noma sude gana-ganaan sihagigian dohot na jorbut i na nidapot ni halahi.

¹⁹LehenonKu ma tu halahi roha na imbaru dohot taroktok na imbaru. BuatonKu ma roha ni halahi na songon pir ni batu i jana gontionKu dohot roha na marpangoloion tu Au.

²⁰Jadi oloan ni halahi ma angka aturanKu jana haburjuhononna mangihutkon sandok parentangKu. Gabe bangsongKu ma halahi jana Au gabe Debata ni halahi.

²¹Tapi anggo angka halak na sai marhagiot marsomba gana-ganaan na jorbut jana sihagigian i, uhumanKu do i hara ni pangalaho ni halahi.” Songon i ma pandok ni Tuhan DEBATA i.

²²Habang ma kerub i ihut muse ma angka roda-roda i. Di ginjang ni halahi do sinondang na silo i tanda ni haroro ni Debata.

²³Dung i ditadingkon sinondang na silo i ma Jerusalem jana pinda ma tu dolok na di Habincaran ni kota i.

²⁴Di bagasan parnidaan i, diangkat Tondi Ni Debata ma au jana dipaulak tu angka jolma buangan na di Babel. Dung i mago ma parnidaan i.

²⁵Dung i hucaritohon ma tu angka halak buangan i sude na nipatidahon ni TUHAN i tu au.