Read Batak Angkola JEHESKIEL 12 Bible Online

JEHESKIEL 12 - Batak Angkola bible

JEHESKIEL 12

¹Mangkuling ma TUHAN tu au mangulahi, ning Ia ma,

²“Ale anak ni jolma, di tonga-tonga ni bangso pangalo do ho maringanan. Marmata do halahi, tapi nada marnida; marpinggol do nian tapi nada marbinege, angke sai na mangalo do giot ni halahi.

³Hara ni i, ale anak ni jolma, taran torang dope ari, hobasi ma barang-barangmu di bagasan sada gendongan songon na somal dibaen halak pangungsi. Painte so dapot borngin, kehe ma ho di torang ni ari di jolo ni halak songon halak na dioban tu buangan. Baen ma lubang di dingding ni bagasmi jana oban ma gendonganmu na marisi angka barang-barangmu ruar sian lubang i. Porsan ma gendonganmi di abaramu, kehe ma ho tu golap-golap i; papitpit ma matami anso ulang diida ho dalan na nibolusmi. Padiar ma dipaida-ida bangso Israel sude na nibaenmi, anso gabe sipaingot di halahi. Betak na ra do halahi mamoto bahaso na jahat pangalo halahi.”

⁷Dung i hupatulus ma na niparentahon ni TUHAN i tu au. Laing di na sadari i, arian dope, huhobasi ma angka barang-barangku tu sada gendongan, songon na somal dibaen halak pangungsi. Dung mamungka samon ari, hubaen ma lubang dohot tanganku di tembok ni bagaski, lalu haruar ma au sian lubang i. Laing diparrohahon jolma i sude, huporsan ma gendongan i di abarangku, lalu kehe ma au.

⁸Ancogotna i didok TUHAN ma tu au, ning Ia ma,

⁹“Ale jolma parsantongkinan, bangso Israel, disapai bangso pangalo i do tu ho sanga aha na nikarejohonmi.

¹⁰Jadi hara ni i palalu ma tu halahi sanga aha na Hudok, Au Tuhan DEBATA mandok tu halahi. Sipalaluon tu raja na di Jerusalem do tonangKi dohot tu sude halak kota i.

¹¹Patorang ma tu halahi, sanga aha na dibaenmi gambaran ni na giot tarjadi do i tu halahi, i ma: Gabe pangungsi noma halahi jana tabanan.

¹²Di borngin marimpot-impot porsanon ni raja ni halahi ma gendonganna di abarana lalu kehe. Pambaenan ni halak ma lubang di tembok anso ulang diidasa dalan na nibolusna.

¹³Tapi sampakkononKu ma jalangKu laho manangkup ia. Dung i obanonKu ma ia tu kota Babel jana disi noma marujung ngolunia, so jungada diida matania kota i.

¹⁴Marserak ma baenonKu sude halak na mangingani bagas godang i, dohot angka panuturi dohot angka pangawal ni raja i sun tu dia. Jalak-jalahan ni halak ma halahi lalu bunuonna.

¹⁵Di na Huparserakkon halahi di tonga-tonga ni angka bangso na asing di tano sileban, botoon ni halahi ma bahaso Au do TUHAN.

¹⁶Adong do saotik sian halahi na giot paluaonKu sian parporangan, sian tangkuraparon dohot nyae, anso diboto halahi di tonga-tonga ni bangso sileban i hajorbuton ni pambaenan ni halahi. Jadi okuon ni halahi ma disi, Au do TUHAN.”

¹⁷Didok TUHAN ma tu au,

¹⁸“Ale jolma parsantongkinan, humitir ma ho taran mangan, jana manghutur ma ho mabiar taran minum ho.

¹⁹Jana dokkon ma tu pangisi ni kota on; songon on do pandok ni Tuhan DEBATA taringot tu pangisi ni Jerusalem na di Israel: Angkon humitir ma halahi mangan jana manghutur laho minum anso gariang tano ni halahi angke nada adong be pangisina, hara ni hakejamon ni sude halak na tinggal disi.

²⁰Angka kota na laing diingani halak angkon gabe maronco jana tano ipe angkon gabe gariang, dung i botoonmunu ma bahaso Au do TUHAN.”

²¹Didok TUHAN ma tu au,

²²“Ale anak ni jolma, biasi sai tagi dihilala halak Israel mandok umpama on: ‘Margonti ari, hape angka alatan nada unjung tarjadi?’

²³Antong paboa ma tu halahi, Au Tuhan DEBATA, mangalehen alus songon on: SesaonKu ma umpama i, anso ulang dipardokkon-dokkon i di Israel. Dokkon ma tu halahi songon gontina, bahaso na dung dapot hatihana jana tarjadi ma sandok alatan.

²⁴Di Israel, nada adong be ro parnidaan sanga alatan gabus.

²⁵Au Tuhan DEBATA, Au sandiri noma manghobari tu bangso Israel jana sude na Hudokkon musti angkon tarjadi, nada pola marlambat-lambat be. Tangihon hamu ma, ale angka pangalo! Taran di ngolumunu on dope, dalankononKu ma sandok na dung Hupaboa hian tu hamu. Au Tuhan DEBATA madung mandok songon i.”

²⁶Didok TUHAN ma tu au,

²⁷“Ale anak ni jolma, pandok ni angka halak Israel, anggo parnidaan dohot alatanmi, honok sajo dope i baru anso tarjadi.

²⁸Hara ni i, dokkon ma tu halahi, na Hudok, Au Tuhan DEBATA mandok: Sasude na Hudokkon i musti angkon tarjadi, nada be marlambat-lambat. Au Tuhan DEBATA madung mandok songon i!”